ទោះបីគ្មានការប្រកាសផ្លូវការជាសាធារណៈ ប៉ុន្តែក្លិបបាល់ទាត់ណាហ្គាវើលបានសំងំផ្លាស់ប្តូរកីឡាករបរទេស និងកីឡាករកម្ពុជាមួយចំនួន សម្រាប់ត្រៀមពានរង្វាន់ក្របខណ្ឌមិត្តហ្វូនខេមបូឌានលីគ ដែលនឹងបើករដូវកាលថ្មីនៅថ្ងៃទី ១៥ ខែកុម្ភៈ ឆ្នាំ២០២០។ ណាហ្គាវើល ក៏អះអាងពីការប្រើប្រព័ន្ធលេងថ្មីនៅរដូវកាលនេះផងដែរ។ តែយ៉ាងណា ម្ចាស់ជើងឯកលីគកំពូលឆ្នាំ២០១៨ មួយនេះ ហាក់មិនហ៊ានដាក់ក្តីរំពឹងខ្ពស់នោះឡើយ។
លោក មាស ចាន់ណា គ្រូបង្វឹកក្រុមណាហ្គាវើលបាននិយាយថា ក្លិបណាហ្គាបានផ្លាស់ប្តូរសមាសភាពកីឡាករបរទេសទាំងអស់នៅរដូវកាលឆ្នាំ២០២០ នេះ ហើយក្លិបក៏មានការផ្លាស់ប្តូរសមាសភាពកីឡាករកម្ពុជាមួយចំនួនដែរ។ ការផ្លាស់ប្តូរសមាភាពកីឡាករនេះ ក៏ព្រោះតែណាហ្គាវើលចង់ឲ្យការប្រកួតនៅរដូវកាលនេះ កាន់តែមានភាពស្វិតស្វាញនិងទាក់ទាញ ដ្បិតក្រុមមួយចំនួនរួមមានវិសាខា បឹងកេត ភ្នំពេញក្រោន ព្រះខ័នរាជស្វាយរៀង និងអង្គរថាយហ្គឺរជាដើមសុទ្ធតែបានបង្ហាញពីការត្រៀមខ្លួនយ៉ាងល្អ។
បើតាមគ្រូបង្វឹកកាន់សញ្ញាបត្រកម្រិត A License រូបនេះ ណាហ្គាវើលក៏នឹងផ្លាស់ប្តូរប្រព័ន្ធលេងថ្មីផងដែរ ហើយលោកជឿជាក់ថា តាមរយៈការផ្លាស់ប្តូរសមាភាពកីឡាករបរទេសនិងប្រព័ន្ធលេងថ្មីនេះ នឹងជួយឲ្យទម្រង់លេងរបស់ណាហ្គាវើលកាន់តែប្រសើរថែមទៀត។ តែយ៉ាងណា លោក ក៏បានបង្ហាញក្តីបារម្ភចំពោះការផ្លាស់ប្តូរនេះផងដែរ។
លោក បានបញ្ជាក់ដូច្នេះថា៖«ការផ្លាស់ប្តូរសមាសភាពកីឡាករបរទេសថ្មី វាអាចប៉ះពាល់ទម្រង់លេងខ្លះដែរ ក៏ប៉ុន្តែប្រព័ន្ធលេងខ្ញុំក៏ផ្លាស់ប្តូរប្រព័ន្ធថ្មីដែរ ដោយសារយើងមានកីឡាករចំណូលថ្មី។ កីឡាករខ្ញុំចាស់អ្នកខ្លះអាចយល់ ហើយអ្នកខ្លះប្រហែលជាមិនយល់ពីប្រព័ន្ធលេងថ្មីនេះ។ ខ្ញុំដាក់ប្រព័ន្ធលេងថ្មី តែទម្រង់លេងរក្សានៅដដែល ដូច្នេះកីឡាករចាស់ៗអាចយល់»។
ទោះបីក្លិបណាហ្គវើលផ្លាស់ប្តូរសមាសភាពកីឡាករបរទេស និងប្រព័ន្ធលេងថ្មីក៏ដោយ តែពួកគេហាក់គ្មានទំនុកចិត្ត និងភាពជឿជាក់លើសមត្ថភាពក្នុងការប្រជែងដណ្តើមជើងឯកនៅរដូវកាលនេះឡើយ។ ការមិនហ៊ានដាក់គោលដៅរហូតឈានដល់ការលើកពាន ដោយសារមកទល់ពេលនេះណាហ្គាវើលអះអាងថា ពួកគេមិនទាន់ត្រៀមបាន១០០ភាគរយនោះទេ។
«ទាក់ទងការពង្រឹងក្រុមយើងពង្រឹងបាន៥០ភាគរយ តែគេបាន១០០ភាគរយ និយាយរួមក្រុមបីបួនគេដាក់គោលការណ៍ចេញមក គឺចង់បានពានតែម្តង តែចំពោះយើងមិនសំដៅចង់បានពាននោះទេ គឺចង់បានកម្រិតមួយល្អ។ ដូច្នេះទាក់ទងការចំណាយ គឺយើងនៅទាបជាងក្រុមមួយចំនួន ធម្មតាបើយើងចង់បានពានត្រូវការចំណាយច្រើន»។ លោក មាស ចាន់ណា បានលើកឡើងបែបនេះ ហើយជឿជាក់ថា ពានរង្វាន់លីគកំពូលឆ្នាំនេះមានការប្រកួតប្រជែងខ្លាំង និងស្វិតស្វាញបំផុត។
កីឡាករបរទេសទាំងនោះ រួមមានខ្សែប្រយុទ្ធនីហ្សេរីយ៉ា Bisan George ម្ចាស់ស្បែកជើងមាសពានរង្វាន់លីគកំពូលឆ្នាំ២០១៨ ក្រោយរកបាន១២គ្រាប់ក្នុងការបង្ហាញខ្លួន២៨លើកឲ្យក្លិបណាហ្គាវើល។ វាជាការចូលរួមលើកទី២សម្រាប់ខ្សែប្រយុទ្ធវ័យ២៨ឆ្នាំរូបនេះជាមួយក្លិបណាហ្គាវើល។ ខ្សែប្រយុទ្ធប្រេស៊ីល Marcinho Marques, ខ្សែប្រយុទ្ធអាហ្វ្រិកខាងត្បូង Shane Booysen និងកីឡាករជនជាតិជប៉ុនពីររូបទៀត គឺខ្សែការពារ Noato និងខ្សែប្រយុទ្ធ Yuta Naruse។
ពានរង្វាន់ក្របខណ្ឌមិត្តហ្វូនខេមបូឌានលីគនឹងបើករដូវកាលថ្មីរបស់ខ្លួននៅថ្ងៃទី១៥ ខែកុម្ភៈ ឆ្នាំ២០២០ ដោយឆ្នាំនេះមានក្រុមចួលរួមចំនួន១៣រួមមានព្រះខ័នរាជស្វាយរៀង, វិសាខា, ណាហ្គាវើល, បឹងកេត, ភ្នំពេញក្រោន, ក្រសួងការពារជាតិ, អង្គរថាយហ្គឺរ, អាស៊ីអឺរ៉ុប, សូលទីឡូអង្គរ, អគ្គិសនីកម្ពុជា, គីរីវង់សុខសែនជ័យ, យុវជនអាយុក្រោម១៨ឆ្នាំបាទី និងអគ្គស្នងការដ្ឋាននគរបាលជាតិ។
សម្រាប់ការប្រកួតបើកឆាកនៅថ្ងៃសៅរ៍ ទី១៥ ខែកុម្ភៈ ឆ្នាំ២០២០ មានចំនួន៣គូ ក្នុងនោះយុវជនអាយុក្រោម១៨ឆ្នាំបាទីបើកទ្វារកីឡដ្ឋានខ្លួនស្វាគមន៍ក្រសួងការពារជាតិនៅម៉ោង៣:៣០នាទីរសៀល មុនវិសាខាជួបប៉ូលិសនៅកីឡដ្ឋានព្រីនស៍ និងភ្នំពេញក្រោនប៉ះអគ្គិសនីកម្ពុជានៅកីឡដ្ឋាន RSN នាម៉ោង៦ល្ងាចដូចគ្នា។ ចំណែកនៅថ្ងៃអាទិត្យទី១៦ ខែកុម្ភៈ មាន៣ប្រកួតដូចគ្នាក្នុងនោះ អង្គរថាយហ្គឺរបើកទ្វារកីឡដ្ឋាន SRU ស្វាគមន៍បឹងកេតនៅម៉ោង៣:៣០នាទីរសៀល ខណៈអាស៊ីអឺរ៉ុបជួបគីរីវង់សុខសែនជ័យនៅកីឡដ្ឋាន AEU Sport Park មុនព្រះខ័នរាជស្វាយរៀងទទួលសូលទីឡូអង្គរនៅម៉ោង៦ល្ងាចនាកីឡដ្ឋានខេត្តស្វាយរៀង៕