អន្តរជាតិ
COVID-19៖ បុគ្គលិកសុខាភិបាលចិន ៦នាក់ស្លាប់ និង១៧១៦នាក់ឆ្លងវីរុស បុគ្គលិកសុខាភិបាល រុញអ្នកជំងឺ COVID-19 នៅក្នុងមន្ទីពេទ្យមួយកន្លែង. រូបភាព៖ EPA-EFE, YUAN ZHENG
× នាថ្ងៃទី១៤ ខែកុម្ភៈ អនុរដ្ឋមន្ត្រីនៃគណៈកម្មការសុខាភិបាលជាតិចិន លោក Zeng Yixin បានអះអាងថា បុគ្គលិកសុខាភិបាលចិនប្រមាណ ១៧០០នាក់ បានឆ្លងជំងឺ COVID-19 និង ៦នាក់បានបាត់បង់ជីវិត ដោយសារជំងឺថ្មីនេះ។
ថ្លែងក្នុងសន្និសីទកាសែតមួយស្តីអំពីការការពារបុគ្គលិកសុខាភិបាលពីកូរ៉ូណាវីរុសប្រភេទថ្មី លោក Zeng Yixin អនុរដ្ឋមន្ត្រីនៃគណៈកម្មការសុខាភិបាលជាតិចិន បានលើកឡើងថា ចំនួនបុគ្គលិកពេទ្យ ដែលឆ្លងជំងឺ COVID-19 គឺបានកើនឡើងគួរឲ្យកត់សម្គាល់។ មន្ត្រីជាន់ខ្ពស់ផ្នែកសុខាភិបាលចិន បានលើកឡើងថា បុគ្គលិកសុខាភិបាលចំនួន ១៧១៦នាក់ បានកើតជំងឺនេះ និង ៦នាក់ផ្សេងទៀត បានស្លាប់គិតត្រឹមថ្ងៃទី១២ ខែកុម្ភៈ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ការឆ្លងវីរុសប្រភេទថ្មីលើបុគ្គលិកសុខាភិបាលជាបន្តបន្ទាប់ និងមានចំនួនច្រើនបែបនេះ គឺបណ្តាលមកពីវិបត្តិខ្វះម៉ាស់ និងសម្ភារការពារសម្រាប់បុគ្គលិកសុខាភិបាលនៅក្នុងប្រទេសចិន។ ពាក់ព័ន្ធនឹងបញ្ហាខ្វះសម្ភារការពារទាំងនេះ គឺកើតឡើងដោយសារតែ រដ្ឋាភិបាលចិន បានពន្យារពេលឈប់សម្រាកដល់ប្រជាជនចិនទាំងអស់ចាប់តាំងពីថ្ងៃចូលឆ្នាំចិនមកម្លេះ ដើម្បីទប់ស្កាត់ការរីកសាយភាយជំងឺ COVID-19 និងតម្រូវការខ្ពស់របស់ប្រជាជនចិន ក្នុងការប្រើប្រាស់សម្ភារទាំងនោះ។
រហូតមកដល់ពេលនេះ មានរោងចក្រផលិតសម្ភារការពារ និងម៉ាស់មួយចំនួននៅក្នុងប្រទេសចិន បានបើកដំណើរការហើយ ប៉ុន្តែរោងចក្រទាំងនោះ បើកដំណើរការត្រឹមតែមួយផ្នែកប៉ុណ្ណោះ ដោយសារតែកូរ៉ូណាវីរុស កំពុងអុកឡុកខ្លាំងនៅក្នុងប្រទេសចិន។ បន្ថែមពីលើនេះ ចិនបានបញ្ជាទិញម៉ាស់ និងសម្ភារការពារជាច្រើនលានសម្រាប់ មកពីបរទេសបន្ថែមទៀត ដើម្បីផ្គត់ផ្គង់តាមមន្ទីរពេទ្យ។
សូមបញ្ជាក់ថា គិតមកត្រឹមពេលនេះ មនុស្សប្រមាណជា១៣៨១នាក់បានស្លាប់ និងមានអ្នកជំងឺប្រមាណ ៦៥០០០នាក់ មានផ្ទុកកូរ៉ូណាវីរុស៕
© រក្សាសិទ្ធិដោយ thmeythmey.com