ក្លិបបាល់ទាត់បឹងកេត រំពឹងការផ្លាស់ប្តូរ និងនាំចូលកីឡាករបរទេសថ្មី ជួយស្តារស្ថានការណ៍កាន់តែល្អប្រសើរ សម្រាប់ការប្រកួតពានរង្វាន់មិត្តហ្វូនខេមបូឌានលីគរដូវកាលឆ្នាំ២០២០-២០២១ ដែលបើករដូវកាលនៅថ្ងៃទី១៥ កុម្ភៈ ឆ្នាំ២០២០។ នៅឆ្នាំនេះ បឹងកេតបានចូលកីឡាករបរទេសថ្មី៣រូប បន្តកិច្ចសន្យាពីររូប និងនាំចូលកីឡាករកម្ពុជាមួយចំនួន។ ពានរង្វាន់លីគកំពូលឆ្នាំនេះ អាចមានការទាក់ទាញ និងប្រកួតប្រជែងខ្លាំងជាងមុន ដ្បិតក្រុមមួយចំនួនបានបង្ហាញពីការត្រៀមខ្លួនយ៉ាងល្អនៅរដូវកាលនេះ។
ក្រោយខកខានឱកាសគ្រងជើងឯកពានរង្វាន់លីគកំពូលពីរឆ្នាំ ធ្វើឲ្យបឹងកេតមានការរឹតត្បិត និងប្រយ័ត្នប្រយែងបំផុតក្នុងការនាំចូល និងផ្លាស់ប្តូរកីឡាករ។ ព្រោះការនាំចូលនិងផ្លាស់ប្តូរកីឡាករ មិនប្រាកដថា អាចល្អប្រសើរជាងកីឡាករ ដែលធ្លាប់រួមរស់ជាមួយក្លិបកន្លងមកនោះទេ។ កត្តានេះហើយ ដែលធ្វើឲ្យក្លិបនីមួយៗត្រូវចំណាយពេលច្រើនក្នុងការជ្រើសរើសកីឡាករ ដើម្បីពង្រឹងក្រុម។
តែយ៉ាងណាលោក បែ មករា អ្នកចាត់ការទូទៅក្លិបបឹងកេតហាក់មានជំនឿថា ការផ្លាស់ប្តូរ និងនាំចូលកីឡាកររបស់ខ្លួននឹងជួយកែប្រែស្ថានការណ៍ក្លិបឲ្យកាន់តែប្រសើរ ឬអាចឈានដល់ការគ្រងជើងឯកសាជាថ្មីនៅរដូវកាលនេះ។ លោកអះអាងថា កីឡាករដែលខ្លួនទើបនាំចូលសុទ្ធតែបានឆ្លងកាត់ការជ្រើសរើសយ៉ាងម៉ត់ចត់ និងប្រយ័ត្នប្រយែងបំផុតពីគ្រូបង្វឹកថ្មីរបស់ខ្លួន។
«ដោយសារលទ្ធផលពីរឆ្នាំកន្លងមកយើងមិនទទួលបានជើងឯក ដូច្នេះឆ្នាំនេះយើងត្រូវរឹតបណ្តឹងបន្តិចក្នុងការជ្រើសរើសកីឡាករបរទេស អ៊ីចឹងយើងមានការផ្លាស់ប្តូរកីឡាករបរទេសមួយចំនួន និងយកមកថ្មី។ យើងដឹងហើយថា ការយកកីឡាករពេលខ្លះត្រូវពេលខ្លះខុស ជាហេតុធ្វើឲ្យយើងត្រូវរឹតត្បិត និងប្រយ័ត្នប្រយែងក្នុងការរើសកីឡាករឲ្យមានគុណភាព»។ លោក បែ មករា លើកឡើងបែបនេះក្នុងបទសម្ភាសជាមួយសារព័ត៌មានថ្មីៗតាមទូរសព្ទ កាលពីពេលថ្មីៗ។
ទោះបីមានក្តីរំពឹងខ្ពស់ក៏ដោយ តែលោក បែ មករា ជឿជាក់ថា ការប្រកួតពានរង្វាន់លីគកំពូលឆ្នាំនេះ នឹងមានការប្រកួតប្រជែងខ្លាំងជាងឆ្នាំមុនៗ ដ្បិតក្រុមមួយចំនួនក៏បានត្រៀមខ្លួនយ៉ាងល្អផងដែរ។ ក្រុម ដែលលោកចង់សំដៅរួមមានវិសាខា ភ្នំពេញក្រោន ព្រះខ័នរាជស្វាយរៀង ណាហ្គាវើល ក្រសួងការពារជាតិ និងអង្គរថាយហ្គឺរជាដើម។
ដើម្បីត្រៀមប្រជែងដណ្តើមជើងឯកពានរង្វាន់មិត្តហ្វូនខេមបូឌានលីគឆ្នាំនេះ ក្រុមជើងឯកពានរង្វាន់លីគកំពូល ២០១៦, ២០១៧ មួយនេះបាននាំចូលកីឡាករចំណូលថ្មី៣រួមមានខ្សែការពារកូតឌីវ័រ Anderson Zogbe ដែលទើបចាកចេញពីណាហ្គាវើល, ខ្សែប្រយុទ្ធអាហ្វ្រិកខាងត្បូង Mothusi Gopane និងខ្សែប្រយុទ្ធប្រេស៊ីល Franc Santana Paiva។ ក្លិបក៏បានបន្តកិច្ចសន្យាជាមួយខ្សែបម្រើជនជាតិជប៉ុនពីររួបផងដែររួមមានកីឡាករ Hikaru Mizuno និង Kenta Yamazaki។
ជាមួយគ្នានេះ ក្លិបបឹងកេតបាននាំចូលយុវជនចំនួន៤រូប ដែលសហព័ន្ធកីឡាបាល់ទាត់កម្ពុជារំសាយពីមជ្ឈមណ្ឌលសាលាបាល់ទាត់ជាតិបាទី ដើម្បីត្រៀមប្រជែងក្នុងពានរង្វាន់លីគ និងការពារតំណែងជើងឯកពានរង្វាន់សម្តេច ហ៊ុន សែន ផងដែរ។ កីឡាករទាំង៤រូបនោះរួមមានខ្សែប្រយុទ្ធសៀង ចន្ធា, ខ្សែការពារ សៅ វ៉ៃហ្វី, ជុង មករា និងអ្នកចាំទី ថា ច័ន្ទរិទ្ធី។
សម្រាប់ការប្រកួតបើកឆាកពានរង្វាន់លីគកំពូលបឹងកេតត្រូវប្រជែងជាមួយអង្គរថាយហ្គឺរនៅថ្ងៃទី១៦ ខែកុម្ភៈ វេលាម៉ោង៣:៣០នាទីរសៀលនាកីឡដ្ឋាន S.R.U នៅខេត្តសៀមរាប។ នៅថ្ងៃនោះដែរ ក៏មានការប្រកួតពីរគូទៀតដែរ ក្នុងនោះក្រុមអាស៊ីអឺរ៉ុបបើកទ្វារកីឡដ្ឋាន A.E.U Sport Park ស្វាគមន៍គីរីវង់សុខសែនជ័យនៅម៉ោង៣:៣០នាទី មុនព្រះខ័នរាជស្វាយរៀងប៉ះសូលទីឡូអង្គរនៅកីឡដ្ឋានខេត្តស្វាយរៀង នៅម៉ោង៦ល្ងាច៕