ព្រឹត្តិការណ៍ថ្មើរជើងប្រវត្តិសាស្ត្រ រួមចំណែកព្យាបាលរបួសផ្លូវចិត្តពលរដ្ឋ នៅស្រុកអន្លង់វែង

កីឡាជាតិ

ជាតិ

ព្រឹត្តិការណ៍ថ្មើរជើងប្រវត្តិសាស្ត្រ រួមចំណែកព្យាបាលរបួសផ្លូវចិត្តពលរដ្ឋ នៅស្រុកអន្លង់វែង

15, Feb 2020 , 9:29 am

រូបភាព

សកម្មភាពកីឡាក្នុងព្រឹត្តិការណ៍ថ្មើរជើងប្រវត្តិសាស្ត្រ, រូបភាពពី Cambodia SEA Games 2023

ដោយ:

ព្រឹត្តិការណ៍ថ្មើរជើងប្រវត្តិសាស្ត្រមិនត្រឹមតែជួយផ្សព្វផ្សាយពីតំបន់ទេសចរណ៍ និងទាក់ទាញភ្ញៀវទេសចរឲ្យមកកម្សាន្តនៅស្រុកអន្លង់វែងប៉ុណ្ណោះទេ តែវាបានក្លាយជាថ្នាំជួយព្យាបាលរបួសផ្លូវចិត្តរបស់ពលរដ្ឋ ដែលដក់ជាប់ជាមួយសង្គ្រាមស៊ីវិលក្នុងរបបខ្មែរក្រហម។ ព្រឹត្តិការណ៍ដែលរៀបចំដោយក្រសួងទេសចរណ៍ សហការជាមួយរដ្ឋបាលខេត្តឧត្តរមានជ័យមួយនេះ ក៏ជាឱកាសបើកទំព័រវិនិយោគនៅស្រុកនេះ សម្រាប់វិនិយោគិនជាតិ និងអន្តរជាតិផងដែរ។

លោក ហោ ជិនវីរៈយុទ្ធ អភិបាលស្រុកអន្លង់វែង ចាត់ទុកព្រឹត្តិការណ៍ថ្មើរជើងប្រវត្តិសាស្ត្រ ជាឱសថក្នុងការរួមចំណែកព្យាបាលរបួសផ្លូវចិត្តរបស់ប្រជាពលរដ្ឋដែលមានស្នាមអតីតកាលជាមួយសង្គ្រាមស៊ីវិលនៃរបបខ្មែរក្រហម។ ស្រុកអន្លង់វែងដែលជាទីតាំងចុងក្រោយនៃរបបខ្មែរក្រហម មានពលរដ្ឋ៧០ទៅ៨០ភាគរយជាអតីតកម្មាភិបាល និងជាសមាជិកនៃរបបឈ្លោះគ្នាឯងមួយនេះ។ នេះបើតាមការលើកឡើងរបស់លោកអភិបាលស្រុកអន្លង់វែង។

តាមរយៈព្រឹត្តិការណ៍ទេសចរណ៍នេះដែរ វាបានផ្តល់ទំនុកចិត្តនិងភាពក្លាហានដល់ពលរដ្ឋ ដែលរស់នៅជាមួយការលាក់បាំងរឿងអតីតកាលក្នុងរបបខ្មែរក្រហមជាច្រើនឆ្នាំ ហ៊ាននិយាយលាតត្រដាងពីតួនាទីរបស់ខ្លួនក្នុងអតីតកាលប្រាប់អ្នកដទៃជាសាធារណៈ។ លើសពីនេះ ធ្វើឲ្យពួកគេមានទំនុកចិត្តកាន់តែខ្លាំងក្នុងការរស់នៅ និងប្រកបរបររកស៊ី ជាពិសេសចូលរួមក្នុងសកម្មភាពអភិវឌ្ឍន៍សង្គមជាតិ។

លោក ហោ ជិនវីរៈយុទ្ធ អភិបាលស្រុកអន្លង់វែង, រូបភាពពី Cambodia SEA Games 2023

«យើងដឹងហើយថា ខ្មែរក្រហមមុនធ្វើសមាហរន្តកម្ម គឺគាត់មានការបែកបាក់គ្នា លាបពណ៌គ្នា ធ្វើឲ្យទំនុកចិត្តនិងការរស់មិនសូវមានសតិអារម្មណ៍ល្អនោះទេ។ ប៉ុន្តែតាមរយៈព្រឹត្តិការណ៍នេះ ធ្វើឲ្យគាត់មានមោទកភាព និងមានស្មារតីក្នុងការចូលរួម....យើងសង្កេតឃើញការចាប់អារម្មណ៍ចុងក្រោយ ប្រតិបត្តិករមួយចំនួន ដែលមិនហ៊ានបង្ហាញខ្លួនថា គាត់ជាអតីតមេបញ្ជាការ មានតូនាទីនេះ តួនាទីនោះក្នុងអតីតកាល តែឥឡូវគាត់ហ៊ាន»។ នេះជាការលើកឡើងរបស់លោក ហោ ជិនវីរៈយុទ្ធ។

សម្រាប់លោកអភិបាលស្រុក ព្រឹត្តិការណ៍ថ្មើរជើងប្រវត្តិសាស្ត្រ គឺជាស្ពានផ្សារភ្ជាប់ស្រុកអន្លង់វែងទៅកាន់ពិភពលោក ជាពិសេសប្រទេសដែលគិតអវិជ្ជមានមកលើស្រុកកូនពៅគេក្នុងការទទួលបានសន្តិភាពនៅកម្ពុជាមួយនេះ។ «ព្រឹត្តិការណ៍នេះ គឺជាការទាក់ទាញ និងផ្សព្វផ្សាយ ដើម្បីភ្ជាប់អន្លង់វែងទៅនឹងពិភពលោក និងប្រទេសដែលគេធ្លាប់តែស្គាល់ថា ស្រុកនេះជាតំបន់ឃោឃៅ និងបន្សល់នូវភាពឈឺចាប់ តែឥឡូវអន្លង់វែងក្លាយជាតំបន់ដែលមានសន្តិភាព និងមានភ្ញៀវទេសចរមកកម្សាន្តនៅទីនេះ»។ នេះជាការបន្ថែមរបស់លោក ហោ ជិនវីរៈយុទ្ធ។

មិនខុសគ្នាពីលោកអភិបាលស្រុកអន្លង់វែងនោះទេ លោក ឌី រ៉ាដូ អភិបាលរងខេត្តឧត្តរមានជ័យ បានចាត់ទុកព្រឹត្តិការណ៍ថ្មើរជើងប្រវត្តិសាស្ត្រ គឺជាឱកាសផ្សព្វផ្សាយ និងបង្ហាញឲ្យពលរដ្ឋខ្មែរ និងពិភពលោកឃើញថា អន្លង់វែង ដែលជាទីតាំងមានអតីតកាលមិនល្អនៅសម័យសង្គ្រាមស៊ីវិល មានសន្តិភាពពេញលេញដូចស្រុកផ្សេងៗដែរ។ អភិបាលរងរូបនេះរំពឹងថា តាមរយៈព្រឹត្តិការណ៍នេះនឹងជួយទាក់ទាញភ្ញៀវទេសចរ និងអ្នកវិនិយោគឲ្យមកកម្សាន្ត និងបោះទុនរកស៊ីនៅស្រុកនេះកាន់តែច្រើន។

«ព្រឹត្តិការណ៍នេះ នឹងជួយផ្សព្វផ្សាយពីស្រុកអន្លង់វែងឲ្យប្រជាពលរដ្ឋកម្ពុជានិងពិភពលោកស្គាល់កាន់តែច្បាស់។ ពីមុនយើងដឹងហើយថា ស្រុកអន្លង់វែងជាកន្លែងដែលមានស្លាកស្នាមសង្គ្រាមស៊ីវិល ហើយព្រឹត្តិការណ៍នេះ ក៏បង្ហាញផងដែរថា ស្រុកអន្លង់វែងមានសន្តិភាពពេញលេញ។ ប្រការនេះ វានឹងជួយទាក់ទាញភ្ញៀវទេសចរ និងវិនិយោគិនឲ្យមកកម្សាន្ត និងបោះទុនរកស៊ីនៅទីនេះកាន់តែច្រើន»។ នេះជាការលើកឡើងរបស់លោក ឌី រ៉ាដូ។

ជាមួយគ្នានេះ លោក ហោ ជិនវីរៈយុទ្ធ ស្នើបណ្តាប្រទេសជឿនលឿននៅលើពិភពលោក បញ្ជូនអ្នកវិនិយោគិនឲ្យមកបោះទុកវិនិយោគរកស៊ីនៅស្រុកអន្លង់វែងឲ្យកាន់តែច្រើន ដ្បិតអន្លង់វែងជាស្រុកមានសក្តានុពលលើវិស័យកសិកម្ម ទេសចរណ៍ប្រវត្តិសាស្ត្រ និងធនធានធម្មជាតិ។ អ្វីដែលកាន់តែពិសេសស្រុកនេះ មានច្រកអន្តរជាតិជាំ ដែលជាទីប្រសព្វរវាងកម្ពុជា-ថៃ។

អន្លង់វែង ដែលជាតាំងចុងក្រោយនៃការបញ្ចប់សង្គ្រាមស៊ីវិលក្នុងរបបខ្មែរក្រហម ស្ទើរត្រូវបានគេបំភ្លេចចោល និងចាត់ទុកជាជាតិសាស្ត្រឯកោ។ ពលរដ្ឋបានរងនូវភាពឈឺចាប់ និងភាពខ្លោចផ្សាពីរបបឈ្លោះគ្នាឯងនេះ ហើយពួកគេរស់នៅជាមួយភាពភ័យខ្លាច និងតក់ស្លុតជាទីបំផុត។ ក្រោយរបបខ្មែរក្រហមដួលរលំនៅឆ្នាំ១៩៧៩និងការទទួលបានសន្តិភាពពេញលេញនៅឆ្នាំ១៩៩៨ ស្រុកអន្លងវែង មានការអភិវឌ្ឍន៍ជាបន្តបន្ទាប់លើវិស័យហេដ្ឋារចនាសម្ព័ន្ធ វិស័យអប់រំ ទេសចរណ៍ និងកសិកម្មជាដើម។

«អន្លង់វែងជាទីតាំងដែលយើងបានរងនូវភាពឈឺចាប់ និងភាពខ្លោចផ្សាដោយសារសង្គ្រាមគ្នាឯង។ ប្រជាពលរដ្ឋក្នុងស្រុកអន្លង់វែងត្រូវបានគេចាត់ទុកជាជាតិសាសន៍ឯកោ ដែលគ្មានទំនាក់ទំនង និងគ្របដណ្តប់ដោយការគិតថា ពួកយើងមានភាពឃោឃៅ»។ លោក ហោ ជិនវីរៈយុទ្ធ លើកឡើងបែបនេះ ហើយអះអាងថា ទោះបច្ចុប្បន្នអន្លង់វែងទទួលបានសន្និភាពពេញលេញក៏ដោយ តែពលរដ្ឋមួយចំនួនដែលជាអតីតកម្មាភិបាល និងជាសមាជិកចលនាខ្មែរក្រហម បានបន្តរស់នៅដោយលាក់បាំងរឿងអតីត។

លោក សន សាន ប្រជាពលរដ្ឋម្នាក់រស់នៅស្រុកអន្លង់វែងដែលបានចូលរួមប្រណាំងទូកក្នុងព្រឹត្តិការណ៍ថ្មើរជើងប្រវត្តិសាស្ត្របានបង្ហាញអារម្មណ៍រំភើបរីករាយយ៉ាងខ្លាំង ដែលក្រសួងទេសចរណ៍សហការជាមួយរដ្ឋបាលខេត្តឧត្តរមានជ័យ និង NOCC បង្កើតឲ្យមានព្រឹត្តិការណ៍ទេសចរណ៍នេះឡើង។ លោកអះអាងថា ស្រុកអន្លង់វែងកម្រមានព្រឹត្តិការណ៍ទ្រង់ទ្រាយធំបែបនេះណាស់។

ព្រឹត្តិការណ៍នេះ មិនត្រឹមតែផ្តល់ភាពសប្បាយរីករាយដល់ពលរដ្ឋប៉ុណ្ណោះទេ តែជាវេទិកាដ៏ធំមួយសម្រាប់ពលរដ្ឋអន្លង់វែង ដែលភាគច្រើនជាអតីតសមាជិកកម្មាភិបាលនៃរបបខ្មែរក្រហមមានឱកាសជួបជុំគ្នា ដើម្បីបង្កើន និងរឹតចំណងសាមគ្គីភាព មិត្តភាពឲ្យតែល្អប្រសើរ។ លើសពីនេះ វាជួយបន្សាបភាពភ័យខ្លាច និងលុបបំបាត់ស្នាមអតីត ដែលបន្សល់ទុកពីសង្គ្រាមស៊ីវិលដល់ពលរដ្ឋទៀតផង។

«អារម្មណ៍ខ្ញុំសប្បាយនិងអរណាស់ដែលស្រុកយើងទទួលបានសន្តិភាព កាលពីមុនគឺអត់មានទេ មានតែស្នូរផ្ទុះអាវុធ ដែលធ្វើឲ្យយើងភ័យខ្លាច និងគិតតែរត់ អត់សូវបានសុខទេ។ ប៉ុន្តែឥឡូវនេះមានសុខសន្តិភាព ហើយសប្បាយ»។ លោក សន សាន លើកឡើងដូច្នេះជាមួយការសំណូមពរឲ្យក្រសួងទេសចរណ៍ និងរដ្ឋបាលស្រុកអន្លង់វែងរៀបចំព្រឹត្តិការណ៍នេះឲ្យកាន់តែច្រើន។

លោក វ៉ាត់ ចំរើន រដ្ឋលេខាធិការក្រសួងទេសចរណ៍បានមានប្រសាសន៍ថា ព្រឹត្តិការណ៍ថ្មើរជើងប្រវត្តិសាស្ត្រ គឺជាឱកាសនៃការអប់រំ ជួបជុំ ផ្សព្វផ្សាយ និងការធ្វើសមាហរន្តកម្មសហគមន៍អន្លង់វែងជាមួយក្រសួង ស្ថាប័ននានាឲ្យកាន់តែល្អប្រសើរ។ បន្ថែមលើការផ្តល់ភាពជឿជាក់ និងទំនុកចិត្តជូនពលរដ្ឋស្រុកអន្លង់វែងក្នុងការរស់នៅ និងប្រកបរបររកស៊ី ព្រឹត្តិការណ៍នេះ ក៏ជួយរឹតចំណងសាមគី្គភាពរវាងកម្ពុជា-ថៃ ឲ្យមានភាពល្អប្រើសើរផងដែរ។

អគ្គលេខាធិការនៃគណៈកម្មាធិការជាតិអូឡាំពិកកម្ពុជារូបនេះបានបញ្ជាក់ថា លោកនឹងបន្តសហការជាមួយរដ្ឋបាលខេត្តឧត្តរមានជ័យនិងរដ្ឋបាលស្រុកអន្លង់វែងរៀបចំព្រឹត្តិការណ៍នេះ ឲ្យមានជារៀងរាល់ឆ្នាំ។ លោកគ្រោងធ្វើសំយោគនៃព្រឹត្តិការណ៍នេះ ដើម្បីដាក់ស្នើទៅកាន់ថ្នាក់ដឹកនាំក្រសួងទេសចរណ៍ និងរាជរដ្ឋាភិបាលកម្ពុជា ដើម្បីសុំជំនួយគាំទ្រក្នុងការរក្សាស្ថេរភាព និរន្តរភាព និងពង្រីកព្រឹត្តិការណ៍នេះកាន់តែធំថែមទៀត។

លោក វ៉ាត់ ចំរើន រដ្ឋលេខាធិការក្រសួងទេសចរណ៍

សម្រាប់លោក វ៉ាត់ ចំរើន ព្រឹត្តិការណ៍កីឡាទេសចរណ៍មិនគ្រាន់តែជួយផ្សព្វផ្សាយពីតំបន់ទេសចរណ៍ និងទាក់ទាញភ្ញៀវទេសចរឲ្យមកកម្សាន្តតំបន់ទេសចរណ៍ប្រវត្តិសាស្ត្រនៅស្រុកអន្លង់វែងប៉ុណ្ណោះទេ តែវាជាឱកាសដើម្បីបង្ហាញពីវិស័យសក្តានុពលក្នុងការទាក់ទាញអ្នកវិនិយោគជាតិនិងអន្តរជាតិទៀតផង។ លោកជឿជាក់ថា តាមរយៈព្រឹត្តិការណ៍ថ្មើរជើងប្រវត្តិសាស្ត្រនេះនឹងជួយទាក់ទាញភ្ញៀវទេសចរ និងអ្នកវិនិយោគឲ្យមកកម្សាន្ត និងបោះទុករកស៊ីកាន់តែច្រើននៅស្រុកអន្លង់វែង។

បើតាមរដ្ឋលេខាធិការក្រសួងទេសចរណ៍រូបនេះ ព្រឹត្តិការណ៍ថ្មើរជើងប្រវត្តិសាស្ត្រលើកទី៣នៅស្រុកអន្លង់វែងខេត្តឧត្តរមានជ័យឆ្នាំក្រោយ គ្រោងរៀបចំចាប់ពីថ្ងៃទី២៩-៣១ ខែមករា ឆ្នាំ២០២១៕