អន្តរជាតិ
COVID-19៖ អ្នកឆ្លងឡើងជិត៨ម៉ឺន ខណៈតួលេខអ្នកស្លាប់ឡើងដល់២៦១៩នាក់ បុគ្គលិកសុខាភិបាលម្នាក់នៅកូរ៉េខាងត្បូងអង្គុយលើកៅអីនៅមុខមន្ទីរពេទ្យមួយនៅក្រុង Daegu ។ រូបថត AFP
× គណៈកម្មការសុខាភិបាលជាតិចិន នាព្រឹកថ្ងៃចន្ទ ទី២៤ ខែកុម្ភៈ នេះ បានបង្ហាញតួលេខអ្នកស្លាប់ដោយសារជំងឺរលាកសួតកូរ៉ូណាវីរុស (COVID-19) ចំនួន១៤៨នាក់បន្ថែម ដែលធ្វើឲ្យចំនួនអ្នកស្លាប់ទាំងនៅចិន និងបណ្តាប្រទេសផ្សេងៗទៀត ឡើងដល់២៦១៩នាក់។
ក្នុងចំណោមអ្នកស្លាប់២៦១៩នាក់ ដោយគិតត្រឹមម៉ោង១០ និង៣០នាទីព្រឹកនេះ មាន២៥៩៥នាក់នៅប្រទេសចិន រីឯប្រទេសដែលមានករណីស្លាប់បន្ទាប់ទៀត ដូចជា អ៊ីរ៉ង់ ៨នាក់ កូរ៉េខាងត្បូង៧នាក់ ជប៉ុន (រួមបញ្ចូលករណីនៅនាវា Diamond Princess) ៤នាក់ អ៊ីតាលី៣នាក់ បារាំង១នាក់ និងហ្វីលីពីន១នាក់។
ជាមួយគ្នានេះ ចំនួនអ្នកឈឺឡើងជិតដល់៨ម៉ឺននាក់ ក្នុងនោះជាង៧៧ ០០០នាក់ស្ថិតនៅប្រទេសចិន។ ជប៉ុនរកឃើញអ្នកជំងឺ១៤៦នាក់ បន្ថែមពីលើ៦៩១នាក់នៅនាវា Diamond Princess ខណៈកូរ៉េខាងត្បូងឡើងដល់៧៦៣នាក់ អ៊ីតាលីដល់១៥៥នាក់។ សិង្ហបុរីមានករណីច្រើនជាងគេក្នុងចំណោមប្រទេសនៅតំបន់អាស៊ាន ដែលមាន៨៩នាក់។
អ្នកជំងឺជិត២៥ ០០០នាក់ ត្រូវបានរាយការណ៍ថា ព្យាបាលសះស្បើយ និងចេញពីមន្ទីរពេទ្យ ខណៈប្រមាណ១២ ០០០នាក់ ស្ថិតក្នុងស្ថានភាពធ្ងន់ធ្ងរ៕
© រក្សាសិទ្ធិដោយ thmeythmey.com