អន្តរជាតិ
COVID-19៖ អ្នកស្លាប់ទី៤ពីនាវា Diamond Princess ក៏ជាជនជាតិជប៉ុនក្នុងវ័យ៨០ឆ្នាំ អ្នកដំណើរម្នាក់ចាកចេញពីនាវាទេសចរណ៍ Diamond Princess អមដំណើរដោយមន្ត្រីសុខាភិបាលជប៉ុន (AFP)
× អ្នកដំណើរម្នាក់មកពីនាវាទេសចរណ៍ Diamond Princess ដែលចតនៅជប៉ុន បានស្លាប់ដោយសារអ្នកជំងឺផ្លូវដង្ហើមបង្កឡើងដោយកូរ៉ូណាវីរុស (COVID-19)។ បើតាមទូរទស្សន៍ជប៉ុន NHK ចុះផ្សាយនៅថ្ងៃអង្គារ ទី២៥ កុម្ភៈ ភ្ញៀវលើនាវារូបនេះ គឺជាអ្នកស្លាប់ទី៤ហើយ ។
តាមប្រភពព័ត៌មានជប៉ុនដដែល អត្តសញ្ញាណរបស់អ្នកស្លាប់ទី៤ដោយសារជំងឺ COVID-10 នេះ គឺជាបុរសជនជាតិជប៉ុន ដែលស្ថិតក្នុងវ័យ៨០ឆ្នាំ។ ចំណែកអ្នកស្លាប់៣នាក់ផ្សេងទៀតមកពីនាវាទេសចរណ៍ Diamond Princess ក៏ជាជនជាតិជប៉ុនដែលស្ថិតក្នុងវ័យ៨០ឆ្នាំផងដែរ។
រដ្ឋាភិបាលជប៉ុន បានរងការរិះគន់ខ្លាំងៗពាក់ព័ន្ធការគ្រប់គ្រងស្ថានការណ៍លើនាវាទេសចរណ៍នេះ ដែលមានមនុស្សរាប់រយនាក់ឆ្លង COVID-19 ។ តួលេខអ្នកជំងឺ ចេះបន្តកើនឡើងនៅជុំវិញប្រទេសជប៉ុន ខណៈរដ្ឋាភិបាល គ្រោងដាក់ចេញចំណាត់ការបន្ថែមទៀតដើម្បីប្រយុទ្ធនឹងវីរុសនេះ។
ទន្ទឹមនេះ រដ្ឋាភិបាលក្រុង តូក្យូ ក៏កំពុងរងការចោទជាសំនួរថាតើពួកគេចាត់ចំណាត់ការគ្រប់គ្រាន់ឬទេក្នុងការទប់ស្កាត់ការរីករាលដាលនៃជំងឺ COVID-19 ដែលផ្ទុះឡើងដំបូងក្នុងប្រទេសចិន។ គិតមកត្រឹមពេលនេះ កូរ៉ូណាវីរុសថ្មីនេះបានសម្លាប់មនុស្សជាង ២៥០០នាក់ហើយ ខណៈជប៉ុន ត្រៀមរៀបចំធ្វើជាម្ចាស់ផ្ទះកីឡាអូឡាំពិករដូវក្ដៅឆ្នាំ២០២០ នាខែកក្កដា ខាងមុខ។
ត្រលប់មកវិញ មនុស្សជាង ៦០០នាក់ ត្រូវបានរកឃើញថាឆ្លង COVID-19 លើនាវាទេសចរណ៍ Diamond Princess ដែលបានដាក់ឲ្យដាច់ដោយឡែករយៈជាង២សប្តាហ៍នៅផែតំបន់ យូកូហាម៉ា ។ ចាប់តាំងពីថ្ងៃពុធសប្តាហ៍មុនមក អ្នកដំណើរ ៩៧០នាក់ ដែលបានធ្វើតេស្តអវិជ្ជមានក្រោយរដ្ឋាភិបាលធ្វើចត្តាឡីស័កចាប់ពីថ្ងៃ៥ ខែកុម្ភៈមក បានចាកចេញពីនាវា ហើយត្រលប់ទៅផ្ទះពួកគេវិញ។ ចំណែកអ្នកដំណើរខ្លះ ដែលបានទៅដល់មាតុប្រទេសពួកគេវិញនោះ បានរកឃើញថាមានផ្ទុកកូរ៉ូណាវីរុស៕
Tag:
ជប៉ុន
កូរ៉ូណាវីរុស
COVID-19
Diamond Princess
© រក្សាសិទ្ធិដោយ thmeythmey.com