អន្តរជាតិ
ការកកស្ទះចរាចរណ៍ក្នុងរដ្ឋធានីកូឡុំបូ។ រូបភាព AFP
×![]()
ដោយ: តន ចាន់រិទ្ធារ៉ា
ស្រីលង្កា នឹងបញ្ចេញកងទ័ពដើម្បីដោះស្រាយបញ្ហាចរាចរណ៍ដ៏អាក្រក់ក្នុងរដ្ឋធានីកូឡុំបូ។ នេះបើតាមការប្រកាសរបស់យោធាស្រីលង្កានៅថ្ងៃទី២៤ ខែកុម្ភៈ ដែលបញ្ជាក់ថា ប្រធានាធិបតីស្រីលង្កា ជាអ្នកចេញបញ្ជាឲ្យកងទ័ពទៅជួយវិបត្តិលើដងផ្លូវនេះ។
ខណៈដែលស្ថានភាពចរាចរណ៍ក្នុងរដ្ឋធានីកូឡុំបូកាន់តែយ៉ាប់យ៉ឺននោះ កងទ័ពស្រីលង្កា នឹងត្រូវពង្រាយតាមកន្លែងមួយចំនួនដើម្បីជួយគ្រប់គ្រងចរាចរណ៍ ខណៈប៉ូលិសមិនអាចដោះស្រាយតែឯងបាន។ អ្នកនាំពាក្យកងទ័ពស្រីលង្កា នៅថ្ងៃទី២៤ ខែកុម្ភៈ និយាយថា ប្រធានាធិបតី ហ្គោតាបាយ៉ា រ៉ាចាប៉ាក់សា (Gotabaya Rajapaksa) ដែលជាអតីតមន្ត្រីយោធា ជាអ្នកចេញបញ្ជាឲ្យកងទ័ពជួយប៉ូលិសលើការងារនេះ។
បើតាមទីភ្នាក់ងារព័ត៌មាន Reuters កងទ័ពស្រីលង្កា នឹងត្រូវពង្រាយនៅច្រកចេញចូលសំខាន់របស់ទីក្រុងកូឡុំបូ ដែលមានប្រជាជនជិតមួយលានធ្វើដំណើរចេញចូលរៀងរាល់ថ្ងៃ។ ក្រៅពីនោះ កងទ័ព អាចត្រូវបានពង្រាយនៅតាមទីតាំងដែលត្រូវការឯទៀតផងដែរ។
ដងផ្លូវក្នុងទីក្រុងរបស់ស្រីលង្កាមួយនេះ មានសភាពណែនណាប់តាន់តាប់នៅពេលព្រឹក និងពេលល្ងាច ដែលជាម៉ោងមានការធ្វើចរាចណ៍មមាញឹកបំផុត។ ការណ៍នេះ នាំឲ្យកូឡុំបូជាប់ឈ្មោះជាទីក្រុងមានប្រព័ន្ធធ្វើដំណើរយឺតជាងគេមួយនៅតំបន់អាស៊ីខាងត្បូង។ ប្រភពព័ត៌មានបន្តថា បើតាមការសិក្សានៅពេលថ្មីៗនេះ ល្បឿនយានយន្តបានធ្លាក់មកក្រោម៧គីឡូម៉ែត្រក្នុងមួយម៉ោងនៅពេលព្រឹក និងពេលល្ងាច។
ទោះជាតំបន់ទេសចរណ៍ល្បីឈ្មោះមួយមែន ស្រីលង្កា មិនទាន់មានប្រព័ន្ធដឹកជញ្ជូនល្អនៅឡើយដែរ។ នៅរដ្ឋធានីកូឡុំបូ មិនទាន់មានរថភ្លើងសាធារណៈ ឬឡានក្រុងដែលអាចជួយសម្រាលការធ្វើចរាចរណ៍ឡើយ ដែលនេះតម្រូវឲ្យប្រជាជនប្រើប្រាស់មធ្យោបាយផ្ទាល់ខ្លួនដើម្បីធ្វើដំណើរទៅមក ខណៈដែលទំហំផ្លូវក៏មិនធំប៉ុន្មានដែរ។ យ៉ាងណាមិញ រដ្ឋាភិបាលស្រីលង្កា ក៏ចាប់ផ្ដើមគិតគូរសាងសង់ប្រព័ន្ធរថភ្លើងមួយដែលប្រើលុយខ្ចីពីជប៉ុនទំហំ១,៥ពាន់លានដុល្លារ៕
Tag:
ស្រីលង្កា
ចរាចរណ៍
© រក្សាសិទ្ធិដោយ thmeythmey.com
