ស្ងាត់មួយសប្តាហ៍ ថៃរកឃើញអ្នកឆ្លង COVID-19 ពីរនាក់ថ្មីដោយម្នាក់ជាអ្នករត់តាក់ស៊ី

អន្តរជាតិ

ស្ងាត់មួយសប្តាហ៍ ថៃរកឃើញអ្នកឆ្លង COVID-19 ពីរនាក់ថ្មីដោយម្នាក់ជាអ្នករត់តាក់ស៊ី

25, Feb 2020 , 4:50 pm

រូបភាព

លោកនាយករដ្ឋមន្ត្រី ប្រាយុទ្ធ ចន្ទអូចា ត្រួតពិនិត្យនៅព្រលានយន្តហោះ សុវណ្ណភូមិ ក្នុងក្រុង បាងកក ថ្ងៃ ២៩ ខែមករា ឆ្នាំ២០២ (AFP)

ដោយ:

ក្រសួងសុខភាពសាធារណៈថៃ នៅថ្ងៃទី ២៥ ខែកុម្ភៈ បានប្រកាសពីករណីឆ្លងជំងឺផ្លូវដង្ហើមបង្កឡើងដោយកូរ៉ូណាវីរុស (COVID-19) ចំនួនពីរករណីថ្មីបន្ថែមទៀត។ អ្នកជំងឺទាំងពីរ គឺសុទ្ធសឹងតែជាជនជាតិថៃ ដោយម្នាក់ជាស្ត្រីដែលមានសាច់ញាតិធ្លាប់ធ្វើដំណើរទៅកាន់ប្រទេសចិន ចំណែកម្នាក់ទៀតគឺជាបុរសអ្នករត់តាក់ស៊ីឲ្យភ្ញៀវទេសចរចិន។ តួលេខថ្មីនេះ ធ្វើឲ្យករណីឆ្លង COVID-19 សរុបក្នុងប្រទេសថៃឡើងដល់៣៧នាក់។

លោក Sukhum Kanchanapimai លេខាធិការអចិន្ត្រៃយ៍របស់ក្រសួងសុខាភិបាលសាធារណៈ បានបញ្ជាក់ថា ស្ត្រីថៃជាអ្នកជំងឺ មានអាយុ ៣១ឆ្នាំ ដែលមានមុខរបរជាស្ត្រីបម្រើការតាមផ្ទះ។ លោកបន្តថា ដំបូងឡើយ ស្ត្រីរូបនេះ កើតជំងឺផ្លូវដង្ហើមដោយពុំដឹងមូលហេតុ។ ក្រោយមក គ្រូពេទ្យថៃ បានដឹងថា រូបនាងមានសាចញាតិម្នាក់ដែលបានត្រលប់មកពីក្រុង Guangzhou ប្រទេសចិន។ បច្ចុប្បន្ន នាង កំពុងសម្រាកព្យាបាលនៅមន្ទីរពេទ្យមួយក្នុងទីក្រុងបាងកក ។

តាមការចុះផ្សាយរបស់កាសែតបាងកកប៉ុស្តិ៍ បុរសជាអ្នកជំងឺ ត្រូវបានគ្រូពេទ្យថៃដឹងថា បានប៉ះពាល់ដោយផ្ទាល់ជាមួយភ្ញៀវទេសចរចិន ហើយដំបូងឡើយ អ្នករត់តាក់ស៊ីថៃរូបនេះ ចេញរោគសញ្ញាក្តៅខ្លួន និងក្អក។ ទន្ទឹមនេះ មន្ត្រីសុខាភិបាលថៃ កំពុងត្រួតពិនិត្យថាតើមានមនុស្សដទៃទៀតដែលជិតស្និទ្ធនឹងពួកគេបានឆ្លងដែរឬអត់។

ទោះបីជារកឃើញករណីឆ្លង COVID-19 ថ្មីបន្ទាប់ពីស្ងាត់ជាង១សប្តាហ៍មក លោក Sukhum បានបញ្ជាក់ថា បច្ចុប្បន្ន អ្នកជំងឺចំនួន ២២នាក់ បានជាសះស្បើយ ហើយអនុញ្ញាតឲ្យចាកចេញពីមន្ទីរពេទ្យ ខណៈ១៥ នាកផ្សេងទៀត កំពុងសម្រាកព្យាបាលនៅមន្ទីរពេទ្យ។ ហើយក្នុងនោះ ១២ នាក់ គឺជាជនជាតិថៃ។

សូមបញ្ជាក់ថា ប្រទេសថៃ បានបញ្ជាក់ពីការរកឃើញករណីឆ្លង COVID-19 ទី៣៥របស់ខ្លួន កាលពីថ្ងៃទី១៧ ខែកុម្ភៈ កន្លងទៅ៕