ជាតិ
×![]()
ដោយ: ថ្មីៗ
មន្ត្រីចំណុះសាលារាជធានីភ្នំពេញទាំង១៤ខណ្ឌកំពុងជួបប្រជុំគ្នារយៈពេលពីរថ្ងៃដើម្បីវាយតម្លៃលទ្ធផលការងារប្រចាំឆ្នាំ២០១៩កន្លងទៅ និងលើកទិសដៅការងារឆ្នាំ២០២០នេះ។ ការបើកសន្និបាតបូកសរុបការងារបានប្រព្រឹត្តទៅក្រោមវត្តមានរបស់លោក ប៉ា សុជាតិវង្ស ប្រធានក្រុមប្រឹក្សារាជធានី និងលោក ឃួង ស្រេង អភិបាលរាជធានីភ្នំពេញ។
ការពង្រីកដែនដីរដ្ឋបាលរបស់សាលារាជធានី សកម្មភាពអនុវត្តគោលនយោបាយភូមិសង្កាត់មានសុវត្ថិភាព ការពង្រីកទំនាក់ទំនងអន្តរជាតិជាមួយបណ្តាក្រុងបរទេស ក៏ដូចជាកំណើននៃការវិនិយោគក្នុងវិស័យសំណង់ជាដើម ទាំងនេះគឺស្ថានភាពដែលត្រូវបានលើកឡើងដោយលោកអភិបាលរាជធានី ឃួង ស្រេង នៅក្នុងសុន្ទរកថាបើកសន្និបាតបូកសរុបការងាររបស់សាលារាជធានីភ្នំពេញនាព្រឹកថ្ងៃទី២៦ខែកុម្ភៈនេះ។ សន្និបាតនេះនឹងត្រូវបិទបញ្ចប់នៅរសៀលថ្ងៃទី២៧ខែកុម្ភៈ។
កំណើនសំណង់តែងធ្វើឱ្យភ្នំពេញផ្លាស់ប្តូរទិដ្ឋភាពខ្លាំង។ យោងតាមរបាយការណ៍ដែលបង្ហាញដោយលោកអភិបាលរាជធានី គិតត្រឹមដំណាច់ឆ្នាំ ២០១៩ រាជធានីភ្នំពេញមានសំណង់បុរីចំនួន ២៣៧ កន្លែង អគារខ្ពស់ៗចាប់ពី៥ជាន់ឡើងទៅមានចំនួន ១២៤៧អគារ និងបានពិនិត្យផ្តល់យោបល់លើប្លង់ស្នើសុំលិខិតអនុញ្ញាតសាងសង់ចំនួន ១០៣០គម្រោង ដែលមានទំហំវិនិយោគប៉ាន់ស្មាន ៣,៤ពាន់លានដុល្លារ។
សមិទ្ធផលថ្មីចុងក្រោយរបស់សាលារាជធានីដែលបានធ្វើជាម្ចាស់ផ្ទះនៃមហាសន្និបាតលើកទី៣៩របស់សមាគមអន្តរជាតិនៃអភិបាលក្រុងប្រើប្រាស់ភាសាបារាំងកាលពីចុងឆ្នាំ២០១៩ ក៏ត្រូវបានលើកឡើងដោយលោកអភិបាលរាជធានីដែលថ្លែងចាត់ទុកថា មោទនភាពរបស់រាជធានីភ្នំពេញផងដែរ។
នៅចំពោះមុខមន្ត្រីរបស់លោកជាច្រើនរយនាក់ លោក ឃួង ស្រេង បានថ្លែងយ៉ាងដូច្នេះថា៖«សមិទ្ធផល និងស្នាដៃសំខាន់ៗរបស់រដ្ឋបាលរាជធានីភ្នំពេញសម្រេចបានក្នុងឆ្នាំ២០១៩ សុទ្ធសឹងតែបានមកពីការចូលរួមចំណែកយ៉ាងសកម្មពីក្រុមការងារថ្នាក់ចុះមូលដ្ឋាន ក្រុមប្រឹក្សា គណៈអភិបាល ថ្នាក់ដឹកនាំមន្ត្រីរាជការ អង្គការសង្គមស៊ីវិល វិស័យឯកជន និងប្រជាពលរដ្ឋក្នុងរាជធានីភ្នំពេញ»។
គួរបញ្ជាក់ឱ្យដឹងថា សព្វថ្ងៃនេះរាជធានីភ្នំពេញមានខណ្ឌចំនួន១៤ ស្មើនឹង១០៥សង្កាត់ និង៩៥៣ភូមិ នៅលើផ្ទៃក្រឡា ៦៩២,៦៤ គីឡូម៉ែត្រក្រឡា។ រាជធានីភ្នំពេញមានប្រជាពលរដ្ឋរស់នៅអចិន្ត្រៃយ៍ចំនួន ២,២លាននាក់ និងមានប្រជាជនស្នាក់នៅបម្រើការងារប្រមាណ១លាននាក់ផ្សេងទៀត៕
រូបថតពីហ្វេសប៊ុកសាលារាជធានីភ្នំពេញ៖
រូបថតពីហ្វេសប៊ុកសាលារាជធានីភ្នំពេញ៖
© រក្សាសិទ្ធិដោយ thmeythmey.com
