COVID-19
អន្តរជាតិ
COVID-19 ឆ្លងដល់៤៧ប្រទេសហើយ ក្រោយអេស្តូនី និងដាណឺម៉ាក រកឃើញអ្នកកើតដំបូង លោក Jakob Tage Ramlyng បុគ្គលិកទូរទស្សន៍ TV 2 ដាណឺម៉ាក មាន COVID-19 ក្រោយទៅលំហែកាយនៅអ៊ីតាលី។ Photo: Stine Ramlyng / TV 2
× អេស្តូនី និងដាណឺម៉ាកនៅថ្ងៃទី២៧ ខែកុម្ភៈ នេះ បានប្រកាសពីការរកឃើញករណីឆ្លងជំងឺរលាកសួតបង្កដោយមេរោគកូរ៉ូណាប្រភេទថ្មី (COVID-19) រៀងៗខ្លួន។ មកដល់ពេលនេះ ៤៧ប្រទេសហើយដែលរកឃើញអ្នកឆ្លង COVID-19។
បុគ្គលិកទូរទស្សន៍ TV 2 របស់ដាណឺម៉ាក លោក Jakob Tage Ramlyng មានលទ្ធផលតេស្តវិជ្ជមានមេរោគកូរ៉ូណាប្រភេទថ្មី។ នេះបើតាមការប្រកាសរបស់ក្រុមប្រឹក្សាជាតិសុខាភិបាលដាណឺម៉ាក និងទូរទស្សន៍ TV 2 ផ្ទាល់។ លោក Jakob បានទៅជិះស្គីលំហែកាយនៅភាគខាងជើងអ៊ីតាលីជាមួយក្រុមគ្រួសារ កាលពីសប្តាហ៍មុន។
TV 2 បានអះអាងថា បុគ្គលិកទូរទស្សន៍មួយចំនួន និងសមាជិកក្រុមគ្រួសារបស់លោក Jakob ក៏ត្រូវបានធ្វើតេស្ត ហើយនឹងត្រូវស្ថិតក្នុងវិធានចត្តាឡីស័កផងដែរ។
នៅអេស្តូនី រដ្ឋមន្ត្រីក្រសួងកិច្ចការសង្គម លោក Tanel Kiir ក៏បានបញ្ជាក់ផងដែរពីលទ្ធផលវិជ្ជមានបុរសម្នាក់ពីអ៊ីរ៉ង់ ដែលធ្វើដំណើរឆ្លងកាត់ក្រុង Riga ប្រទេសឡេតូនី ដោយរថយន្តក្រុង។ បច្ចុប្បន្នអាជ្ញាធរអេស្តូនី កំពុងព្យាយាមកំណត់អត្តសញ្ញាណអ្នកដែលបានជិញរថយន្តក្រុង និងអ្នកដែលមានទំនាក់ទំនងជាមួយបុរសរូបនោះ។
កន្លងមក ប្រទេស៤៥ដែលមានករណីឆ្លង COVID-19 រួមមាន ចិន (បញ្ចូលទាំងតំបន់រដ្ឋបាលពិសេសហុងកុង តៃវ៉ាន់ និងម៉ាកាវ) កូរ៉េខាងត្បូង ជប៉ុន (បូកករណីនាវា Diamond Princess) អ៊ីរ៉ង់ សិង្ហបុរី ថៃ អេមីរ៉ាតអារា់ប់រួម ម៉ាឡេស៊ី វៀតណាម អូម៉ង់ ហ្វីលីពីន លីបង់ អ៊ីរ៉ាក់ កូវ៉ែត ប៉ារែន អាហ្វហ្គានីស្ថាន ឥណ្ឌា ណេប៉ាល់ កម្ពុជា ស្រីលង្កា ប៉ាគីស្ថាន។
បណ្តាប្រទេសនៅអឺរ៉ុប មាន អ៊ីតាលី បារាំង អង់គ្លេស អាល្លឺម៉ង់ ស៊ុយអែត រុស្ស៊ី អ៊ីស្រាអែល អេស្ប៉ាញ ហ្វាំងឡង់ បែលហ្ស៊ិក អូទ្រីស ក្រូអាស៊ី ស្វីស ក្រិក រូម៉ានី ន័រវេស ម៉ាសេដ្វានខាងជើង និងហ្សកហ្ស៊ី។ ក្រៅពីនោះ មាននៅ សហរដ្ឋអាមេរិក កាណាដា អូស្ត្រាលី អេហ្ស៊ីប អាល់ហ្សេរី និងប្រេស៊ីល៕
© រក្សាសិទ្ធិដោយ thmeythmey.com