COVID-19
អន្តរជាតិ
សះស្បើយម្ដងហើយ តែជាង២សប្តាហ៍ក្រោយ ស្ត្រីជប៉ុនម្នាក់កើត COVID-19 លើកទី២
ស្ត្រីម្នាក់ កំពុងតថ្លៃទិញទំនិញនៅក្រុង តូក្យូ ប្រទេសជប៉ុន នៅថ្ងៃ ១៧ ខែកុម្ភៈ ឆ្នាំ២០២០ (AFP)
×![]()
មន្ត្រីសុខាភិបាលក្រុង អូសាកា បានបញ្ជាក់ថា ស្ត្រីម្នាក់វ័យ៤០ឆ្នាំដែលទទួលការព្យាបាលជាសះស្បើយជំងឺផ្លូវដង្ហើមកូរ៉ូណា (COVID-19) ហើយបានអនុញ្ញាតឲ្យចាកចេញពីមន្ទីរពេទ្យកាលពីដើមខែកុម្ភៈនេះ បានធ្វើតេស្តជំងឺនេះវិជ្ជមានជាថ្មីម្ដងទៀត នៅថ្ងៃទី២៦ ខែកុម្ភៈ។ នេះបើតាមទូរទស្សន៍ជប៉ុន NHK ។
ស្ត្រីជនជាតិម្នាក់នោះ គឺជាមគ្គទេសិកាដែលរស់នៅក្នុងទីក្រុង អូសាកា (Osaka) ភាគខាងលិចនៃប្រទេសជប៉ុន ។ នាងបានជិះនៅលើរថយន្តក្រុងមួយដែលដឹកជូនភ្ញៀវទេសចរមកពីក្រុង វូហាន ប្រទេសចិន កាលពីពាក់កណ្ដាលខែមករា ឆ្នាំ២០២០ ហើយបានធ្វើតេស្តជំងឺ COVID-19 ដោយមានលទ្ធផលវិជ្ជមាន កាលពីថ្ងៃទី២៩ ខែមករា។
ក្រោយមក ស្ត្រីជប៉ុនរូបនេះ បានអនុញ្ញាតឲ្យចេញពីមន្ទីរពេទ្យកាលពីថ្ងៃ០១ ខែកុម្ភៈ ហើយបានបញ្ជាក់ថា លែងមានផ្ទុកវីរុសនេះ នៅថ្ងៃ០៦ ខែកុម្ភៈ។ ក៏ប៉ុន្តែនៅថ្ងៃទី ១៩ ខែកុម្ភៈ រូបនាង បានមានរោគសញ្ញាឈឹបំពង់ក និងឈឹដើមទ្រូង។ មួយសប្តាហ៍ក្រោយមក ស្ត្រីរូបនេះ ត្រូវបានពេទ្យឲ្យធ្វើតេស្ត ហើយបានរកឃើញថាឆ្លងជាថ្មី។ នេះបើតាមការចុះផ្សាយរបស់ទូរទស្សន៍ NHK ។
ស្ត្រីរូបនេះ ត្រូវបានរាយការណ៍ថា ពាក់ម៉ាស់ជាប់ជានិច្ច ពេលដើរចេញក្រៅ ហើយតែងសម្ងំនៅផ្ទះក្រោយចាកចេញពីពេទ្យមក។ នាងលែងទៅធ្វើការ ហើយគ្មានប៉ះផ្ទាល់ជាមួយនរណាម្នាក់ឡើយ។ បច្ចុប្បន្ន នាងកំពុងសម្រាកព្យាបាលក្នុងទីក្រុងនោះ។ តាមទូរទស្សន៍ NHK មន្ត្រីសុខាភិបាលក្រុងនេះ ជឿថា វីរុសកូរ៉ូណា ទំនងមានច្រើនក្នុងខ្លួនរបស់ស្ត្រីនោះ ឬក៏ស្ត្រីនេះ ទំនងឆ្លង COVID-19 ជាថ្មីទៀត។
តាមកាសែតជប៉ុន Nikkei Asian Review ក្រសួងសុខាភិបាលជប៉ុន បានបញ្ជាក់ថា ករណីស្ត្រីវ័យ៤០ឆ្នាំនេះ គឺជាករណីដំបូងក្នុងប្រទេសជប៉ុន ដែលអ្នកជំងឺរូបនេះធ្វើតេស្តវិជ្ជមានជាលើកទី២ ក្រោយអនុញ្ញាតឲ្យចាកចេញពីមន្ទីរពេទ្យ។ ទោះបីជាលើកដំបូងក្នុងប្រទេសជប៉ុន ករណីធ្វើតេស្តវិជ្ជមានជាលើកទី២បែបនេះ ធ្លាប់ត្រូវបានរកឃើញក្នុងប្រទេសចិនផងដែរ ទីដែលជំងឺនេះផ្ទុះរីករាលដាល កាលពីចុងឆ្នាំមុន។
សូមបញ្ជាក់ថា ការរីករាលដាលនៃជំងឺ COVID-19 នេះ បានឆ្លងមនុស្សប្រមាណ៨ម៉ឺនហើយជាសាកល ហើយបានសម្លាប់មនុស្សជិត២៨០០នាក់ ហើយភាគច្រើនក្នុងប្រទេសចិន។ សម្រាប់ប្រទេសជប៉ុន ករណីឆ្លង COVID-19 មានសរុប ១៨៩ករណី ហើយមានអ្នកស្លាប់៣នាក់៕
Tag:
ជប៉ុន
COVID-19
កូរ៉ូណាវីរុស
© រក្សាសិទ្ធិដោយ thmeythmey.com
