អន្តរជាតិ
ចិន៖ ក្រុងមួយនៅខេត្តហ៊ូប៉ី ឲ្យលុយ១៤០០ដុល្លារដល់អ្នកជំងឺ COVID-19 ដែលរាយការណ៍ជូនអាជ្ញាធរ បុរសម្នាក់ជិះម៉ូតូមួយគ្រឿងលើដងផ្លូវក្នុងក្រុង វូហាន កាលពីថ្ងៃ ២៦ កុម្ភៈ ឆ្នាំ២០២០ (Reuters)
× ទីក្រុងមួយក្នុងខេត្តហ៊ូប៉ី ភាគកណ្ដាលនៃប្រទេសចិនដែលជាចំណុចផ្ដើមនៃការផ្ទុះរាលដាលជំងឺឆ្លងកូរ៉ូណា នឹងផ្ដល់ប្រាក់រង្វាន់ដល់ទៅ ១ម៉ឺនយ័ន (១៤២៥ដុល្លារ) ជូនពលរដ្ឋខ្លួន ប្រសិនបើពួកគេរាយការណ៍រោគសញ្ញានៃជំងឺ COVID-19 ហើយលទ្ធផលធ្វើតេស្តបង្ហាញថាវិជ្ជមាន។
ក្រុមការងារនៃទីក្រុង Qianjiang ដែលទទួលបន្ទុកការឆ្លងកូរ៉ូណាវីរុស បានបញ្ជាក់នៅថ្ងៃទី២៧ ខែកុម្ភៈក្នុងសេចក្តីប្រកាសព័ត៌មានមួយថា ពលរដ្ឋនឹងទទួលបានប្រាក់រង្វាន់លើកទឹកចិត្ត ១ម៉ឺនយ័ន ឬស្មើជាង១៤០០ដុល្លារ ប្រសិនជំងឺ COVID-19 ពួកគេ ត្រូវបានបញ្ជាក់ថាវិជ្ជមាន។ សម្រាប់អ្នកដែលធ្លាប់កើតជំងឺនេះរួចហើយ នឹងពុំគ្មានសិទ្ធិទទួលប្រាក់រង្វាន់នេះឡើយ។ នេះបើតាមការចុះផ្សាយព័ត៌មាន Reuters ។
ក្រុង Qianjiang ដែលមានចម្ងាយ១៥០គីឡូម៉ែត្រពីក្រុងវូហាន មានមនុស្សរស់នៅជិតមួយលាននាក់។ គិតមកត្រឹមពេលនេះ ទីក្រុងនេះ បានរកឃើញករណីឆ្លង COVID-19 ចំនួន ១៩៧ នាក់ ហើយអាជ្ញាធរប្រឹងប្រែងទប់ស្កាត់ការឆ្លង និងធានាថា ពលរដ្ឋខ្លួនទទួលការព្យាបាលសមរម្យ។
ក្រៅពីទីក្រុងនេះ បណ្ដាផ្នែកផ្សេងទៀតនៃខេត្ត ហ៊ូប៉ី រួមមាន ស្រុក Hanyang នៃក្រុង វូហាន និងទីក្រុង Huangguang ក៏បានប្រកាសផ្ដល់ប្រាក់រង្វាន់ជូនអ្នកដែលស្ម័គ្រចិត្តត្រួតពិនិត្យសុខភាពផងដែរ ក៏ប៉ុន្តែត្រឹមតែ ៥០០យ័នប៉ុណ្ណោះ ឬ៧១ដុល្លារ។
សូមបញ្ជាក់ថា ខេត្ត ហ៊ូប៉ី បានបញ្ជាក់ពីការរកឃើញករណីឆ្លងសរុប ៦៥០០០ករណី និងអ្នកស្លាប់ជាង២៦០០នាក់ ដោយសារជំងឺ COVID-19។ នៅទូទាំងពិភពលោក អ្នកស្លាប់សរុប មានចំនួនប្រមាណ ២៨០០នាក់ និងអ្នកជំងឺប្រមាណ៨ម៉ឺននាក់។
មកដល់ពេលនេះ ៤៧ប្រទេសហើយដែលរកឃើញអ្នកឆ្លង COVID-19។ អេស្តូនី និងដាណឺម៉ាកនៅថ្ងៃទី២៧ ខែកុម្ភៈ នេះ បានប្រកាសពីការរកឃើញករណីឆ្លងជំងឺរលាកសួតបង្កដោយមេរោគកូរ៉ូណាប្រភេទថ្មី (COVID-19) រៀងៗខ្លួន។
កន្លងមក ប្រទេស៤៧ដែលមានករណីឆ្លង COVID-19 រួមមាន ចិន (បញ្ចូលទាំងតំបន់រដ្ឋបាលពិសេសហុងកុង តៃវ៉ាន់ និងម៉ាកាវ) កូរ៉េខាងត្បូង ជប៉ុន (បូកករណីនាវា Diamond Princess) អ៊ីរ៉ង់ សិង្ហបុរី ថៃ អេមីរ៉ាតអារា់ប់រួម ម៉ាឡេស៊ី វៀតណាម អូម៉ង់ ហ្វីលីពីន លីបង់ អ៊ីរ៉ាក់ កូវ៉ែត ប៉ារែន អាហ្វហ្គានីស្ថាន ឥណ្ឌា ណេប៉ាល់ កម្ពុជា ស្រីលង្កា ប៉ាគីស្ថាន។ បណ្តាប្រទេសនៅអឺរ៉ុប មាន អ៊ីតាលី បារាំង អង់គ្លេស អាល្លឺម៉ង់ ស៊ុយអែត រុស្ស៊ី អ៊ីស្រាអែល អេស្ប៉ាញ ហ្វាំងឡង់ បែលហ្ស៊ិក អូទ្រីស ក្រូអាស៊ី ស្វីស ក្រិក រូម៉ានី ន័រវេស ម៉ាសេដ្វានខាងជើង ហ្សកហ្ស៊ី ដាណឺម៉ាក និងអេស្តូនី។ ក្រៅពីនោះ មាននៅ សហរដ្ឋអាមេរិក កាណាដា អូស្ត្រាលី អេហ្ស៊ីប អាល់ហ្សេរី និងប្រេស៊ីល៕
Tag:
ចិន
ហូប៉ី
COVID-19
កូរ៉ាណាវីរុស
© រក្សាសិទ្ធិដោយ thmeythmey.com