ភ្នំពេញ៖ E-learning ជាកម្មវិធីសិក្សាភាសាអង់គ្លេសតាមប្រព័ន្ធអ៊ីនធឺណិត ដែលផ្ដល់ភាពងាយស្រួលដល់សិស្សនិស្សិត និងជួយឲ្យសិស្សនិស្សិតមានចំណេះដឹងភាសាអង់គ្លេសបន្ថែម។ ក្នុងបទសម្ភាសជាមួយសារព័ត៌មានលោក ហ៊ុន ឆៃយ៉ា នាយកមជ្ឈមណ្ឌល Royal Elite E-learning Center លើកឡើងថា ការសិក្សាតាមE-learningនេះ នឹងផ្ដល់ចំណុចពិសេសចំនួន ៦យ៉ាង ដល់សិស្សនិស្សិត។
សូមអញ្ជើញទស្សនាបទសម្ភាសរវាងកញ្ញា ញឹក ស្រីល័ក្ខ អ្នកសារព័ត៌មាន ThmeyThmey.com ជាមួយលោក ហ៊ុន ឆៃយ៉ា នាយកមជ្ឈមណ្ឌល Royal Elite E-learning Center ដូចតទៅ៖
លោក ហ៊ុន ឆៃយ៉ា នាយកមជ្ឈមណ្ឌល Royal Elite E-learning Center បញ្ជាក់ថា កម្មវិធីសិក្សាបែបទំនើប (E-Learning Platform)នេះ អាចប្រើប្រាស់នៅក្នុង Computers, Ipads, Tablets, ទូរសព្ទដៃ តាមរយៈApplication (App) ដើម្បីសិក្សាភាសាអង់គ្លេស មិនថាពេលណា កន្លែងណានោះទេ។
បើតាមលោក ហ៊ុន ឆៃយ៉ា E-Learning Platform ជូននូវកម្មវិធីសិក្សាបែបទំនើបមកពីប្រទេសដៃគូសហការចំនួន២គី ប្រទេសអូស្ត្រាលី និងនូវែលសេឡង់។ កម្មវិធី Sunshine Primary Club and Sunshine Bookroom មកពីប្រទេសនូវែលសេឡង់ ជាកម្មវិធីជំនួយទៅលើការអានរបស់កុមារ ពីអាយុ ៣-៤ឆ្នាំទៅអាយុ១១-១២ឆ្នាំ។ កម្មវិធីនេះ មានសៀវភៅអេឡិចត្រូនិករាប់ពាន់ក្បាល ជាមួយនឹងសកម្មភាព និងលំហាត់ជាច្រើនសម្រាប់កុមារសិក្សា និងអនុវត្តទៅតាមកម្រិតរបស់ពួកគេ។
ចំណែកកម្មវិធីសិក្សាភាសាអង់គ្លេសមកពីប្រទេសអូស្ត្រាលីវិញ គឺសម្រាប់មនុស្សធំ ចាប់ពីអាយុ១៣ឆ្នាំ ឡើងទៅ ដែលមានមុខវិជ្ជាជាច្រើនសម្រាប់ជ្រើសរើស និងសិក្សា ដូចភាសាអង់គ្លេសទូទៅ ភាសាអង់គ្លេសសម្រាប់សិក្សានៅសាកលវិទ្យាល័យ ភាសាអង់គ្លេស ត្រៀមប្រលង IELTS ឬ TOEIC ភាសាអង់គ្លេសសម្រាប់ផ្នែកធុរកិច្ច ដោយផ្ដោតលើជំនាញនិយាយ និងសរសេរ។
លក្ខណៈពិសេសទាំង៦យ៉ាងនេះ រួមមាន ការសិក្សាទៅតាមកម្រិត ដោយផ្អែកលើការធើ្វតេស្តជាមុន។ ការសិក្សាតាមរយៈ Computers, Ipads, Tablets ទូរសព្ទដៃ ពេលណា។ កម្មវិធីនេះ មានប្រព័ន្ធតាមដានការសិក្សាច្បាស់លាស់ ដែលអាចត្រួតពិនិត្យ និងតាមដានបានគ្រប់ពេល។ ក្រុមការងារទាំងក្នុង និងក្រៅប្រទេស នឹងចាំជួយនៅពេលដែលអ្នកសិក្សាមានចម្ងល់ ឬបញ្ហាបច្ចេកទេស។ ក្រោយបញ្ចប់វគ្គសិក្សា អ្នកសិក្សា នឹងទទួលបានវិញ្ញាបនបត្រ ចេញដោយដៃគូសហការនៅបរទេស។ ជាមួយគ្នានេះ តម្លៃនៃការសិក្សា មានតម្លៃសមរម្យ បើធៀបនឹងការសិក្សាក្នុងថ្នាក់៕