COVID-19
អន្តរជាតិ
COVID-19 ឆ្លងដល់៤៩ប្រទេសហើយ ក្រោយហូឡង់ និងសាំងម៉ារ៉ាំង រកឃើញករណីដំបូង មន្ត្រីសុខាភិបាលសាន់ម៉ារីណូ ពិភាក្សាគ្នាលើករណី COVID-19។ រូបថត tuttoggi
× គិតត្រឹមព្រឹកថ្ងៃសុក្រ ទី២៨ ខែកុម្ភៈ នេះ ប្រទេសដែលឆ្លងកូរ៉ូណាវីរុស (COVID-19) ឡើងដល់៤៩ប្រទេសហើយ បន្ទាប់ពីហូឡង់ និងសាធារណរដ្ឋសាំងម៉ារ៉ាំង បានប្រកាសពីការរកឃើញករណីដំបូងនៅក្នុងប្រទេសរៀងៗខ្លួន។
ក្រសួងសុខាភិបាលហូឡង់តាមរយៈគេហទំព័រផ្លូវការរបស់ខ្លួន បានអះអាងពីការរកឃើញករណីឆ្លងកូរ៉ូណាវីរុស (COVID-19) របស់ខ្លួននាថ្ងៃទី២៧ ខែកុម្ភៈ ដោយអ្នកជំងឺទើបតែបានទៅកាន់តំបន់ Lombardy ប្រទេសអ៊ីតាលី។ ចំពោះករណីនេះ វិទ្យាស្ថានជាតិសម្រាប់សុខភាពសាធារណៈ និងបរិស្ថាន ហូឡង់ អំពាវនាវដល់អ្នកដែលធ្លាប់មានទំនាក់ទំនងជាមួយអ្នកជំងឺតាមដានសុខភាពខ្លួនឯង ឬទៅពិនិត្យសុខភាព ដើម្បីទប់ស្កាត់ការរាលដាលនៅក្នុងប្រទេស។
ស្របពេលជាមួយគ្នានេះ សាធារណរដ្ឋសាំងម៉ារ៉ាំង ដែលស្ថិតក្នុងចំណោមប្រទេសដ៏តូចជាងគេលើពិភពលោក បានតេស្តឃើញវិជ្ជមានបុរសវ័យ៨៨ឆ្នាំម្នាក់ ដែលបានចូលមន្ទីរពេទ្យ Rimini Infermi កាលពីថ្ងៃទី២៥ ខែកុម្ភៈ។ បច្ចុប្បន្នអ្នកជំងឺស្ថិតក្នុងស្ថានភាពមិនសូវល្អឡើយ ដោយសារតែគាត់មានជំងឺរ៉ាំរ៉ៃផ្សេងទៀត រីឯវេជ្ជបណ្ឌិតដែលតេស្តរកឃើញមេរោគ និងក្រុមគ្រួសារបុរសនោះ ត្រូវដាក់ក្រោមវិធានចត្តាឡីស័ក។
ដោយឡែកនៅចក្រភពអង់គ្លេស BBC បានផ្សាយពីការរកឃើញករណីដំបូងនៅអៀរឡង់ខាងជើង ដែលស្ត្រីម្នាក់ បានធ្វើដំណើរពីភាគខាងអ៊ីតាលីទៅកាន់ក្រុង Dublin។
.
កន្លងមក ប្រទេស៤៧ដែលមានករណីឆ្លង COVID-19 រួមមាន ចិន (បញ្ចូលទាំងតំបន់រដ្ឋបាលពិសេសហុងកុង តៃវ៉ាន់ និងម៉ាកាវ) កូរ៉េខាងត្បូង ជប៉ុន (បូកករណីនាវា Diamond Princess) អ៊ីរ៉ង់ សិង្ហបុរី ថៃ អេមីរ៉ាតអារា់ប់រួម ម៉ាឡេស៊ី វៀតណាម អូម៉ង់ ហ្វីលីពីន លីបង់ អ៊ីរ៉ាក់ កូវ៉ែត ប៉ារែន អាហ្វហ្គានីស្ថាន ឥណ្ឌា ណេប៉ាល់ កម្ពុជា ស្រីលង្កា ប៉ាគីស្ថាន។
បណ្តាប្រទេសនៅអឺរ៉ុប មាន អ៊ីតាលី បារាំង ចក្រភពអង់គ្លេស អាល្លឺម៉ង់ ស៊ុយអែត រុស្ស៊ី អ៊ីស្រាអែល អេស្ប៉ាញ ហ្វាំងឡង់ បែលហ្ស៊ិក អូទ្រីស ក្រូអាស៊ី ស្វីស ក្រិក រូម៉ានី ន័រវេស ម៉ាសេដ្វានខាងជើង ហ្សកហ្ស៊ី ដាណឺម៉ាក និងអេស្តូនី។ ក្រៅពីនោះ មាននៅ សហរដ្ឋអាមេរិក កាណាដា អូស្ត្រាលី អេហ្ស៊ីប អាល់ហ្សេរី និងប្រេស៊ីល៕
© រក្សាសិទ្ធិដោយ thmeythmey.com