COVID-19
អន្តរជាតិ
×![]()
ដោយ: រួបរួម
ក្រសួងសុខាភិបាលនីហ្សេរីយ៉ា តាមរយៈបណ្តាញសង្គម Twitter របស់ខ្លួន បានអះអាងពីការរកឃើញករណីឆ្លងកូរ៉ូណាវីរុស (COVID-19) ដំបូង នៅក្នុងរដ្ឋ Lagos នាថ្ងៃទី២៧ ខែកុម្ភៈ។ នីហ្សេរីយ៉ា បានក្លាយជាប្រទេសទី៥០ ដែលរកឃើញករណីឆ្លង COVID-19 និងជាប្រទេសអាហ្វ្រិកទី៣ បន្ទាប់ពីអេហ្ស៊ីប និងអាល់ហ្សេរី។
ស្នងការទទួលបន្ទុកផ្នែកសុខាភិបាលនីហ្សេរីយ៉ា សាស្ត្រាចារ្យ Akin Abayomi បានបញ្ជាក់ថា ករណីដំបូងនៅនីហ្សេរីយ៉ា គឺជាជនជាតិអ៊ីតាលីម្នាក់ ដែលបានទៅដល់រដ្ឋ Lagos កាលពីថ្ងៃទី២៥ ខែកុម្ភៈ ក្នុងបេសកកម្មជំនួញរបស់ខ្លួន។
កន្លងមក ប្រទេស៤៩ដែលមានករណីឆ្លង COVID-19 រួមមាន ចិន (បញ្ចូលទាំងតំបន់រដ្ឋបាលពិសេសហុងកុង តៃវ៉ាន់ និងម៉ាកាវ) កូរ៉េខាងត្បូង ជប៉ុន (បូកករណីនាវា Diamond Princess) អ៊ីរ៉ង់ សិង្ហបុរី ថៃ អេមីរ៉ាតអារា់ប់រួម ម៉ាឡេស៊ី វៀតណាម អូម៉ង់ ហ្វីលីពីន លីបង់ អ៊ីរ៉ាក់ កូវ៉ែត ប៉ារែន អាហ្វហ្គានីស្ថាន ឥណ្ឌា ណេប៉ាល់ កម្ពុជា ស្រីលង្កា ប៉ាគីស្ថាន។
បណ្តាប្រទេសនៅអឺរ៉ុប មាន អ៊ីតាលី បារាំង ចក្រភពអង់គ្លេស អាល្លឺម៉ង់ ស៊ុយអែត រុស្ស៊ី អ៊ីស្រាអែល អេស្ប៉ាញ ហ្វាំងឡង់ បែលហ្ស៊ិក អូទ្រីស ក្រូអាស៊ី ស្វីស ក្រិក រូម៉ានី ន័រវេស ម៉ាសេដ្វានខាងជើង ហ្សកហ្ស៊ី ដាណឺម៉ាក អេស្តូនី ហូឡង់ និងសាំងម៉ារាំង។ ក្រៅពីនោះ មាននៅ សហរដ្ឋអាមេរិក កាណាដា អូស្ត្រាលី អេហ្ស៊ីប អាល់ហ្សេរី និងប្រេស៊ីល៕
© រក្សាសិទ្ធិដោយ thmeythmey.com
