COVID-19
អន្តរជាតិ
កីឡាករបាល់ទាត់ម្នាក់នៅក្របខណ្ឌ Serie C អ៊ីតាលី មាន COVID-19
× King Udoh ដែលលេងនៅក្លិប Pianese ក្នុងក្របខណ្ឌ Serie C អ៊ីតាលី បានក្លាយជាកីឡាករអាជីពដំបូងដែលឆ្លងកូរ៉ូណាវីរុស (COVID-19)។ នេះបើយោងតាមការផ្សាយរបស់សារព័ត៌មានអ៊ីតាលី La Gazzetta dello Sport និង La Nazione។
Udoh អាយុ២២ឆ្នាំ សញ្ជាតិអ៊ីតាលី-នីហ្សេរីយ៉ា មានអាការមិនសូវស្រួលខ្លួន នាការប្រកួតចុងសប្តាហ៍កន្លងមកជាមួយក្លិប U23 Juventus។ ក្រោយមកត្រូវបានបញ្ជូនទៅមន្ទីរពេទ្យ Sienne មុននឹងពិនិត្យឃើញវិជ្ជមានកូរ៉ូណាវីរុស។
ក្រោយករណីនេះ សមាជិកក្លិប Pianese ទាំងមូលត្រូវបានដាក់ក្រោមវិធានចត្តាឡីស័ក ដោយបច្ចុប្បន្ន មិនមានអ្នកណាម្នាក់កើតរោគសញ្ញាសង្ស័យឡើយ។ ស្របពេលជាមួយគ្នា ក្លិប Juventus បានហាមប្រាមឈុត U23 របស់ខ្លួន ទៅទំនាក់ទំនងជាមួយឈុតធំ។
គិតមកដល់ពេលនេះ អ៊ីតាលី មានអ្នកឆ្លងដល់៦៥៥ករណី ដែលក្នុងនោះ១៧ករណីបានស្លាប់ ៤៥ករណីជាសះស្បើយ និង១៩ករណីស្ថិតក្នុងស្ថានភាពធ្ងន់ធ្ងរ៕
© រក្សាសិទ្ធិដោយ thmeythmey.com