រដ្ឋាភិបាលកម្ពុជាបានត្រៀមកញ្ចប់ថវិការួចរាល់ហើយ ដើម្បីចំណាយលើការសាងសង់ ជួសជុល និងកែលម្អទីលានតាមសហព័ន្ធកីឡាជាតិនីមួយៗឲ្យស្រមតាមស្តង់ដាអន្តរជាតិ សម្រាប់ត្រៀមធ្វើម្ចាស់ផ្ទះការប្រកួតកីឡាស៊ីហ្គេមឆ្នាំ២០២៣។ គណៈកម្មាធិការជាតិរៀបចំការប្រកួតកីឡាស៊ីហ្គេម (CAMSOC) បានបញ្ជាក់ថា គម្រោងសាងសង់ ជួសជុលនិងកែលម្អទីលាននឹងបញ្ចប់ក្នុងឆ្នាំ២០២០។ CAMSOC កាលពីថ្ងៃទី២៥ កុម្ភៈ បានជួបសហព័ន្ធកីឡាជាតិទាំងអស់ ដើម្បីឲ្យពួកគេលើកពីបញ្ហាផ្សេងៗពាក់ព័ន្ធទីលានប្រកួត និងធនធានមនុស្ស។
បញ្ហាទីលានប្រកួតជាបញ្ហាចម្បងមួយក្នុងចំណោមបញ្ហាសំខាន់ៗជាច្រើន ដែលគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ ត្រូវយកចិត្តទុកដាក់និងដោះស្រាយមុនគេ មុនឈានទៅធ្វើម្ចាស់ផ្ទះការប្រកួតកីឡាស៊ីហ្គេមលើកទី៣២នៅឆ្នាំ២០២៣។ បញ្ហាអភិវឌ្ឍន៍ធនធានកីឡាករ គ្រូបង្វឹក និងមន្ត្រីបច្ចេកទេសអាជ្ញាកណ្តាលចៅក្រម ក៏ជាបញ្ហាចម្បងដែល CAMSOC ត្រូវយកចិត្តទុកដាក់ដោះស្រាយផងដែរ។ ដ្បិតម្ចាស់ផ្ទះ តែងតែចង់បានមេដាយច្រើន បន្ថែមលើការរៀបចំមានដំណើរការល្អ។
ជាក់ស្តែងកាលពីថ្ងៃទី២៥ កុម្ភៈ CAMSOC បានរៀបចំកិច្ចប្រជុំមួយ ដោយមានការចូលរួមពីតំណាងសហព័ន្ធកីឡាជាតិទាំងអស់ ដែលគ្រោងដាក់ឲ្យប្រកួតក្នុងព្រឹត្តិការណ៍ស៊ីហ្គេមពេលកម្ពុជាធ្វើជាម្ចាស់ផ្ទះ។ ក្នុងកិច្ចប្រជុំនោះលោក អ៊ុក សិទ្ធិជាតិ អគ្គនាយនៃអគ្គនាយដ្ឋានកីឡា និងជាអគ្គលេខាធិការរងនៃ CAMSOC បានធ្វើបទបង្ហាញពីផែនការយុទ្ធសាស្ត្រក្នុងការអភិវឌ្ឍធនធានកីឡាករ គ្រូបង្វឹក និងមន្ត្រីបច្ចេកទេស។ ចំណែកលោក ជា បូរ៉ា រដ្ឋលេខាធិការក្រសួងទេសចរណ៍ និងជាប្រធានគណៈកម្មការទីលានប្រកួតនៃ CAMSOC បានធ្វើបទបង្ហាញពាក់ព័ន្ធលក្ខណៈស្តង់ដានៃទីលានប្រកួត។
នាកិច្ចប្រជុំនោះដែរ CAMSOC ផ្តល់ឱកាសឲ្យតំណាងសហព័ន្ធកីឡាជាតិនីមួយៗលើកពីបញ្ហាប្រឈមនិងសំណើរនានាពាក់ព័ន្ធទីលានប្រកួត និងការអភិវឌ្ឍធនធានមនុស្ស។ តាមការលើកឡើងរបស់តំណាងសហព័ន្ធកីឡាជាតិនីមួយៗ បញ្ហាដែលសហព័ន្ធកីឡាជាតិភាគច្រើនកំពុងប្រឈម គឺពាក់ព័ន្ធភាពស្តង់ដានៃទីលាន ដ្បិតបច្ចុប្បន្នទីលានរបស់ពួកគេពុំទាន់ស្របតាមស្តង់ដានោះទេ។
ក្រោយស្តាប់ការលើកឡើងពីតំណាងសហព័ន្ធកីឡាជាតិ លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានបញ្ជាក់ថា ទីលានរបស់សហព័ន្ធមួយចំនួនត្រូវសាងសង់ថ្មី និងមួយចំនួនត្រូវជួសជុលកែលម្អ និងបំពាក់សម្ភារបច្ចេកទេសបន្ថែម ដើម្បីឲ្យស្របតាមស្តង់ដាអន្តរជាតិ។ ពាក់ព័ន្ធការរៀបចំទីលានឲ្យមានស្តង់ដានេះ លោក វ៉ាត់ ចំរើន អះអាងថា ការរៀបចំនឹងបញ្ចប់ជាស្ថាពរត្រឹមដំណាច់ឆ្នាំ២០២០នេះ។
ដើម្បីគាំទ្រដល់ដំណើរការសាងសង់ ជួលជុល កែលម្អ និងបំពាក់សម្ភារបច្ចេកទេសតាមទីលាននេះ រដ្ឋាភិបាលបានត្រៀមកញ្ចប់ថវិការួចរាល់ហើយ។ បើតាមលោក វ៉ាត់ ចំរើន រដ្ឋាភិបាលគ្រោងចំណាយថវិកា១លានដុល្លារក្នុងមួយសហព័ន្ធ ក្នុងការរៀបចំទីលានឲ្យមានគុណភាពស្របតាមស្តង់ដាអន្តរជាតិនេះ។
អគ្គលេខាធិការ CAMSOC រូបនេះបន្តថា ទោះបីរដ្ឋាភិបាលបានត្រៀមកញ្ចប់ថវិកា១លានដុល្លារក្នុងមួយសហព័ន្ធក៏ដោយ តែពុំមានន័យថា រដ្ឋាភិបាលត្រូវតែចំណាយ១លានដុល្លាររាល់ការសាងសង់ ជួសជុលកែលម្អទីលានមួយនោះទេ ព្រោះមានទីលានខ្លះគ្រាន់តែបំពាក់ឧបករណ៍បច្ចេកទេសបន្ថែម និងជួសជុលកែលម្អតិចតួចប៉ុណ្ណោះ។ ការរៀបចំទាំងអស់ក្នុងការដំណើរឆ្ពោះទៅធ្វើម្ចាស់ផ្ទះកីឡាស៊ីហ្គេមឆ្នាំ២០២៣ នឹងរួចរាល់ជាស្ថាពរត្រឹមដំណាច់ឆ្នាំ២០២២។
កិច្ចប្រជុំខាងលើធ្វើឡើងដើម្បីជំរុញនិងពន្លឿនដំណើរការរៀបចំទីលានប្រកួត និងការរៀបចំផែនការយុទ្ធសាស្ត្រ ដើម្បីអភិវឌ្ឍន៍ធនធានកីឡាករ គ្រូបង្វឹក និងមន្ត្រីបច្ចេកទេស សម្រាប់ត្រៀមការប្រកួតកីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ កិច្ចប្រជុំនេះ ក៏ធ្វើឡើងដើម្បីប្រមូលធាតុចូលផ្សេងៗពីសហព័ន្ធ ដើម្បីដាក់ក្នុងអង្គមហាសន្និបាទរបស់គណៈកម្មាធិការជាតិអូឡាំពិកកម្ពុជា នាពេលខាងមុខផងដែរ៕