COVID-19
ជាតិ
សង្គមជាតិ
ក្រសួងសុខាភិបាល ស្នើឱ្យពលរដ្ឋជឿជាក់លើខ្លួន ខណៈក្រសួងព័ត៌មាន ចាត់វិធានការអ្នកផ្សព្វផ្សាយប្រឌិតពីCOVID-19
គណនីហ្វេសប៊ុក ដែលចេញផ្សាយព័ត៌មានមិនពិត
×![]()
ដោយ: ឡាយ សុភាវតី
ភ្នំពេញ៖ ក្រសួងសុខាភិបាល ស្នើឱ្យពលរដ្ឋជឿជាក់លើមន្ត្រីជំនាញសុខាភិបាល ជាងការជឿលើការព័ត៌មាននៅតាមបណ្ដាញសង្គម ដែលកំពុងយកករណីវីរុសកូរ៉ូណាប្រភេទថ្មី (COVID-19) មកផ្សព្វផ្សាយបំពុល និងធ្វើឱ្យពលរដ្ឋយល់ច្រឡំ។ ដោយឡែកក្រសួងព័ត៌មាន ក៏កំពុងមានចំណាត់ការលើអ្នកផ្សព្វផ្សាយព័ត៌មានប្រឌិតពីជំងឺនេះផងដែរ។
«ដើម្បីដឹងថាព័ត៌មានណាពិតឬមិន ពលរដ្ឋត្រូវជឿឬមើលលើព័ត៌មានដែលចេញពីក្រសួងសុខាភិបាលតែមួយគត់ ជុំវិញជំងឺCovid-19»។ នេះបើតាមការលើកឡើងរបស់ លោក លី សូវ៉ាន់ ដែលស្នើឱ្យពលរដ្ឋកុំជឿលើការផ្សព្វផ្សាយលើហ្វេសប៊ុកនាអំឡុងពេលនេះ ព្រោះមានជនខិលខូចមួយចំនួន ដែលបំណងមិនល្អ កំពុងប្រឌិតរឿងដែលធ្វើឱ្យពលរដ្ឋកាន់តែព្រួយបារម្ភ។
ត្រង់ចំណុចនេះអ្នកនាំពាក្យក្រសួងសុខាភិបាល បានពន្យល់ថា ជនខិលខូចខ្លះ បានយកករណីដួលសន្លប់ និងស្លាប់ ដោយសារគាំងបេះដូង និងដាច់សសៃឈាម ឬខ្វះអុកស៊ីសែនខួរក្បាល ខ្វះជាតិទឹក និងស្រវឺងជាដើម មកផ្សារភ្ជាប់ជាមួយនឹងមេរោគកូរ៉ូណាថ្មីCovid-19ទៅវិញ។
ថ្លែងប្រាប់សារព័ត៌មានថ្មីៗ លោក លី សូវ៉ាន់ បានបញ្ជាក់ដូច្នេះថា៖«កន្លងមកក៏មានមនុស្សសន្លប់ដែរ តែមិនមានអ្នកផ្សាយ ប៉ុន្តែស្របពេលមានមេរោគកូរ៉ូណាកើតឡើងនៅបណ្ដាលប្រទេសផ្សេងៗ គេទាញភ្ជាប់គ្នា ចេះតែដើរថតគ្រប់អ្នកសន្លប់ ឬរូបភាពផ្សេងមកផ្សាយលើបណ្ដាលសង្គម។ ចំពោះជំងឺឆ្លងផ្សេងៗ ឬCovid-19នេះ មិនអាចដួលសម្លប់ភ្លាមៗបាននោះទេ។ »។
បើតាមអ្នកនាំពាក្យសុខាភិបាលរូបនេះ ម្ចាស់គណនីហ្វេសប៊ុក ដែលចែកចាយព័ត៌មានមិនពិតពីវីរុសកូរ៉ូណានេះ ភាគច្រើនរស់នៅក្រៅប្រទេស ដូច្នេះក្រសួងក៏ពិបាកចាត់វិធានការលើបុគ្គលទាំងនោះ។
គណនីហ្វេសប៊ុកចំនួន៧ ដែលបានផ្សព្វផ្សាយពីករណីដួលសន្លប់ និងស្លាប់ ដោយផ្សាភ្ជាប់ជាមួយជំងឺរលាកសួតនៃវីរុសកូរ៉ូណានេះ រួមមាន ហ្វេសប៊ុកឈ្មោះ Sdam Husen, Sovannara Som, កូននាគអហិង្សា ស្វ.រ, សំលេង ពលករចង់បានការផ្លាស់ប្ដូរ, សឹម សុភា Some Sophea, Ah Song Ha និង វិទ្ធីវង្ស ឡុង។
លោក ជា ពៅ ប្រធាននាយកដ្ឋានប្រឆាំងបទល្មើសបច្ចេកវិទ្យាថា កំពុងស្រាវជ្រាវលើគ្រប់ទំព័រឬគណនីហ្វេសប៊ុក ដែលចេញផ្សាយព័ត៌មានមិនពិតជុំវិញករណីជំងឺCovid-19 ដើម្បីនាំខ្លួនជនទាំងនោះ និងចាត់វិធានការតាមផ្លូវច្បាប់៕
Tag:
Covid-19
© រក្សាសិទ្ធិដោយ thmeythmey.com
