COVID-19
អន្តរជាតិ
ឥណ្ឌូណេស៊ី បញ្ជាក់ករណីឆ្លង COVID-19 ដំបូងរបស់ខ្លួន ប្រធានាធិបតីឥណ្ឌូណេស៊ី លោក ចូកូ វីដូដូ - ប្រភពរូប៖ afp
× ប្រធានាធិបតីឥណ្ឌូណេស៊ី លោក ចូកូ វីដូដូ បានបញ្ជាក់នៅថ្ងៃចន្ទ ទី២ មីនាថា ជនជាតិឥណ្ឌូណេស៊ីចំនួន ២ នាក់ បានធ្វើតេស្តវិជ្ជមានសម្រាប់ជំងឺផ្លូវដង្ហើមកូរ៉ូណា (COVID-19) ។ នេះគឺជាករណីឆ្លងដែលត្រូវបានបញ្ជាក់លើកដំបូងបង្អស់ ក្នុងប្រទេសដែលមានប្រជាជនច្រើនលំដាប់ទីបួនរបស់ពិភពលោកនេះ។ នេះបើតាមទីភ្នាក់ងារព័ត៌មាន Reuters ។
ប្រាប់អ្នកសារព័ត៌មាននៅវិមានប្រធានាធិបតី លោក វីដូដូ បានអះអាងថា អ្នកជំងឺទាំងពីរ កំពុងសម្រាកព្យាបាលនៅមន្ទីរពេទ្យមួយកន្លែង។ លោកប្រធានាធិបតី អះអាងទៀតថា អ្នកជំងឺទាំងពីរ គឺជាម្ដាយ និងកូនស្រី ដែលម្ដាយអាយុ ៦៤ឆ្នាំ និងកូនស្រីអាយុ ៣១ឆ្នាំ។ អ្នកទាំងពីរបានប៉ះផ្ទាល់ជាមួយជនជាតិជប៉ុនម្នាក់ដែលធ្វើតេស្តវិជ្ជមានក្នុងប្រទេសម៉ាឡេស៊ី កាលពីថ្ងៃ២៧ ខែកុម្ភៈ ក្រោយធ្វើដំណើរទៅកាន់ឥណ្ឌូណេស៊ី កាលពីដើមខែកុម្ភៈ។
លោក ចូកូវី សង្កត់ធ្ងន់ទៀតថា រដ្ឋាភិបាលឥណ្ឌូណេស៊ី បានត្រៀមលក្ខណៈយ៉ាងល្អសម្រាប់ទប់ទល់នឹងករណី COVID-19។ ត្រង់នេះ លោកនិយាយដូច្នេះថា៖«យើងបានត្រៀមរៀបចំមន្ទីរពេទ្យជាង១០០ ទីតាំង ជាមួយបន្ទប់ចត្តាឡីស័កប្រកបដោយបទដ្ឋានត្រឹមត្រូវ។ យើងក៏មានសម្ភារដែលត្រូវតាមបទដ្ឋានអន្តរជាតិផងដែរ»។ នេះបើតាម កាសែត The Jakarta Post ។
ឥណ្ឌូណេស៊ី ក្លាយជាប្រទេសទី៦៥លើពិភពលោក និងជាប្រទេសទី៥នៅតំបន់អាស៊ានដែលរកឃើញករណីឆ្លង COVID-19។ ប្រទេស៦៤កន្លងមកដែលមានករណីឆ្លង COVID-19 រួមមាន៖
-អាស៊ី៖ ចិន (បញ្ចូលទាំង ហុងកុង តៃវ៉ាន់ និងម៉ាកាវ) កូរ៉េខាងត្បូង ជប៉ុន (បូកករណីនាវា Diamond Princess) អ៊ីរ៉ង់ សិង្ហបុរី ថៃ អេមីរ៉ាតអារា់ប់រួម ម៉ាឡេស៊ី វៀតណាម អូម៉ង់ ហ្វីលីពីន លីបង់ អ៊ីរ៉ាក់ កូវ៉ែត ប៉ារែន អាហ្វហ្គានីស្ថាន ឥណ្ឌា ណេប៉ាល់ កម្ពុជា ស្រីលង្កា ប៉ាគីស្ថាន កាតា ។
-អឺរ៉ុប៖ អ៊ីតាលី បារាំង ចក្រភពអង់គ្លេស (មានករណីនៅអង់គ្លេស វេលស៍ ស្កុតឡេន និងអៀរឡង់ខាងជើង) អាល្លឺម៉ង់ ស៊ុយអែត រុស្ស៊ី អេស្ប៉ាញ ហ្វាំងឡង់ បែលហ្ស៊ិក អូទ្រីស ក្រូអាស៊ី ស្វីស ក្រិក រូម៉ានី ន័រវេស ម៉ាសេដ្វានខាងជើង ដាណឺម៉ាក អេស្តូនី ហូឡង់ និងសាំងម៉ារាំង លីទុយអានី បេឡារុស អ៊ីស្លង់ ម៉ូណាកូ អៀរឡង់ លុចសំបួ អាមេនី និងសាធារណរដ្ឋឆេក។
អាមេរិកខាងជើង៖ សហរដ្ឋអាមេរិក កាណាដា ម៉ិកស៊ិក។
អាមេរិកឡាទីន៖ ប្រេស៊ីល, អេក្វាឌ័រ។
អាហ្វ្រិក៖ អេហ្ស៊ីប, អាល់ហ្សេរី, នីហ្សេរីយ៉ា។
អូសេអានី៖ អូស្ត្រាលី, នូវែលសេឡង់។
ផ្សេងៗ៖ អាស៊ែបៃហ្សង់, ហ្សកហ្ស៊ី, អ៊ីស្រាអែល, សាធារណរដ្ឋដូមីនិក៕
© រក្សាសិទ្ធិដោយ thmeythmey.com