អន្តរជាតិ
អឺរ៉ុប និងចក្រភពអង់គ្លេសចាប់ផ្ដើមចរចាកំណត់ទំនាក់ទំនងថ្មី ក្រោយការលែងលះ លោក Michel Barnier ប្រធានក្រុមចរចារបស់សហភាពអឺរ៉ុប។ រូបភាព AFP
× មួយខែក្រោយការចែកផ្លូវគ្នាជាផ្លូវការ សហភាពអឺរ៉ុប និងចក្រភពអង់គ្លេស នៅថ្ងៃទី២ ខែមីនា ចាប់ផ្ដើមការចរចាដើម្បីកំណត់ទំនាក់ទំនងគ្នាឡើងវិញ។ ដូចគ្នានឹងការចរចាដើម្បីលែងលះគ្នានេះ ការចរចាពីទំនាក់ទំនងអនាគតនេះ ក៏មិនមែនជារឿងងាយស្រួលឡើយ ខណៈទាំងអង់គ្លេស ទាំងអឺរ៉ុបសុទ្ធតែប្រកាន់ជំហរការពារប្រយោជន៍រៀងៗខ្លួន។ បើគ្មានកិច្ចព្រមព្រៀងណាមួយនោះ ទំនាក់ទំនង រវាងភាគីទាំងពីរ ពិសេសវិស័យពាណិជ្ជកម្ម នឹងរងផលប៉ះពាល់ខ្លាំង។
ពាណិជ្ជកម្ម, បទដ្ឋានពាណិជ្ជកម្ម, នេសាទ, កសិកម្ម, សន្តិសុខ, ការដឹកជញ្ជូន, ថាមពល នឹងកិច្ចសហប្រតិបត្តិការផ្នែកប៉ូលិស គឺជាចំណុចធំៗក្នុងការចរចារវាងសហភាពអឺរ៉ុប និងចក្រភពអង់គ្លេសនៅទីក្រុងព្រុចសែលដែលចាប់ផ្ដើមពីថ្ងៃទី២ ខែមីនា។ លោក Michel Barnier ដែលជាប្រធានក្រុមចរចារបស់អឺរ៉ុបពេលបង្កើតកិច្ចព្រមព្រៀងចាកចេញរបសអង់គ្លេស នឹងចរចាទល់មុខជាមួយទីប្រឹក្សារដ្ឋាភិបាលអង់គ្លេស David Frost ។
ជំនួបចរចាដែលធ្វើឡើងមួយខែក្រោយអង់គ្លេសលែងជាសមាជិកសហភាពអឺរ៉ុប រំពឹងថា នឹងបញ្ចប់នៅដំណាច់ឆ្នាំ២០២០ យ៉ាងយូរបំផុត។ បច្ចុប្បន្ន ទំនាក់ទំនងរវាងភាគីទាំងពីរ ស្ថិតក្នុងលក្ខខណ្ឌអន្តរកាលសិន គឺអ្វីៗមានសភាពដូចកាលមុនពេលចាកចេញរបស់អង់គ្លេស ដោយអង់គ្លេសអាចបន្តនាំចេញទំនិញទៅកាន់ទីផ្សារអឺរ៉ុបដោយមិនមានឧបសគ្គពន្ធគយអ្វីឡើយ។ រយៈពេលអន្តរកាលនេះ នឹងបញ្ចប់នៅថ្ងៃទី៣១ ខែធ្នូខាងមុខ។
អ្វីដែលគេរំពឹងទុកនោះ ការចរចានេះ នឹងមិនងាយស្រួលឡើយ។ មុនការចរចាទាំងអង់គ្លេស ទាំងអឺរ៉ុប បានប្រកាសពីជំហរតឹងរ៉ឹងរៀងៗខ្លួនស្រេចទៅហើយ។ ចំណុចដែលខ្ទាស់គ្នាខ្លាំង គឺអឺរ៉ុបចង់ឲ្យអង់គ្លេសគោរពតាមគោលការណ៍របស់ខ្លួនលើវិស័យមួយចំនួនដូចជាការងារ ពន្ធដារ បរិស្ថាន និងការឧបត្ថម្ភធនដោយរដ្ឋលើក្រុមហ៊ុននានា។ ប៉ុន្តែទីក្រុងឡុងចង់បានស្តង់ដាមួយរបស់ខ្លួនដោយអនុវត្តតាមគោលការណ៍ឯករាជ្យសេដ្ឋកិច្ច និងនយោបាយ។
បើតាមទីភ្នាក់ងារព័ត៌មាន AFP លោក Barnier បានប្រាប់អង់គ្លេសរួចហើយ ឲ្យគោរពតាមកិច្ចព្រមព្រៀងបញ្ចប់សមាជិកភាពដែលមានចំណងផ្លូវច្បាប់។ ត្រង់ចំណុចនេះ អឺរ៉ុបទទូចឲ្យមានការត្រួតពិនិត្យលើទំនិញអង់គ្លេសដែលដឹកឆ្លងកាត់សមុទ្រអៀរឡង់ចូលទឹកដីអៀរឡង់ខាងជើងដែលផ្នែកមួយរបស់ចក្រភពអង់គ្លេស ប៉ុន្តែក៏ស្ថិតជាផ្នែកមួយនៃទីផ្សាររួមរបស់អង់គ្លេសដែរ។ នាយករដ្ឋមន្ត្រីអង់គ្លេស បូរីស ចនសុន និយាយថា វិធានការនេះមិនមែនជារឿងចាំបាច់ឡើយ។
បើការចរចាមិនទទួលបានផលអ្វីនោះ ទាំងអង់គ្លេស ទាំងអឺរ៉ុប សុទ្ធតែជួបបញ្ហាដូចគ្នា។ អៀរឡង់ ដែលជាសមាជិកអឺរ៉ុបនៅជាប់ចក្រភពអង់គ្លេស និងពឹងផ្អែកខ្លាំងលើពាណិជ្ជកម្មជាមួយអ្នកជិតខាងរបស់ខ្លួន ក៏រងគ្រោះធ្ងន់ដែរ។ បើតាមការគន់គូររបស់អ្នកជំនាញអង្គការសហប្រជាជាតិ ផលប៉ះពាល់សេដ្ឋកិច្ចលើអង់គ្លេស អាចមានទំហំដល់ទៅ៣២ពាន់លានដុល្លារ ព្រោះអឺរ៉ុបជាអ្នកទិញទំនិញអង់គ្លេសពាក់កណ្ដាលនៃការនាំចូលទាំងអស់៕
Tag:
អឺរ៉ុប
អង់គ្លេស
Brexit
© រក្សាសិទ្ធិដោយ thmeythmey.com