COVID-19
អន្តរជាតិ
កូរ៉េខាងត្បូងមានអ្នកឆ្លងដល់ជាង៤៨០០ករណី និងស្លាប់៣៤នាក់ លោក Lee Man-hee ប្រធានវិហារ Shincheonji Church of Jesus លុតជង្គង់សុំទោស មុនសន្និសីទសារព័ត៌មានកាលពីថ្ងៃចន្ទ។ រូបថត AFP
× លោកស្រី Eun-Kyung Jung ប្រធានមជ្ឈមណ្ឌលទប់ស្កាត់ និងបង្ការជំងឺឆ្លង នៅថ្ងៃទី៣ ខែមីនា បានអះអាងថា កូរ៉េខាងត្បូង បន្តរកឃើញអ្នកផ្ទុក COVID-19 ថ្មី ចំនួន ៤៧៧ករណី និងស្លាប់ ៦ករណីបន្ថែមទៀត។ ការណ៍នេះ ធ្វើឲ្យតួលេខអ្នកឆ្លងសរុបនៅកូរ៉េខាងត្បូងកើនឡើងដល់ ៤៨១២ករណី និងស្លាប់ ៣៤ករណី។ ចំនួនអ្នកផ្ទុក COVID-19 បែបនេះ បានទាញកូរ៉េខាងត្បូងឲ្យឈរនៅលំដាប់ទីពីរលើពិភពលោក បន្ទាប់ពីចិន។
ទីក្រុង Daegu នៅតែជាតំបន់ក្តៅបំផុត ដែលមានអ្នកជំងឺផ្ទុកCOVID-19 ច្រើនជាងគេ។ បើតាមការអះអាងរបស់លោកស្រី Eun-Kyung Jung ប្រធានមជ្ឈមណ្ឌលទប់ស្កាត់ និងបង្ការជំងឺឆ្លង ក្នុងចំណោមករណីថ្មីចំនួន ៤៧៧ករណីនេះ មានប្រមាណជាជាង ៤០០គឺរកឃើញមាននៅក្នុងទីក្រុង Daegu។ ប្រភពចម្លងដំបូងបំផុតគឺ ព្រះវិហារ shincheonji។ ចំណែកករណីផ្សេងទៀត ត្រូវបានគេរកឃើញមាននៅក្នុងខេត្ត North Gyeongsang។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។
ក្រៅពីតួលេខអ្នកឆ្លង ចំនួនអ្នកស្លាប់ដោយសារជំងឺរលាកសួត ដែលបណ្តាលមកពី COVID-19 នៅកូរ៉េខាងត្បូង ក៏កើនឡើងគួរឲ្យកត់សម្គាល់ផងដែរ។ សម្រាប់ព្រឹកថ្ងៃទី៣ ខែមីនានេះ អាជ្ញាធរសុខាភិបាលកូរ៉េខាងត្បូង បានឲ្យដឹងថា មាន៦ករណីបន្ថែមទៀត បានបាត់បង់ជីវិត។ ការណ៍នេះ បានធ្វើឲ្យករណីស្លាប់នៅកូរ៉េខាងត្បូងបន្តកើនដល់ ៣៤ករណីឯណោះ។
សូមបញ្ជាក់ថា ដោយសារមានករណីឆ្លងនៅក្នុងប្រទេសបែបនេះ រដ្ឋាភិបាលកូរ៉េខាងត្បូង បានពន្យារឆ្នាំសិក្សាថ្មីរយៈពេល ២សប្តាហ៍ទៀត ដើម្បីការពារក្មេងៗសិស្សសាលា។ បន្ថែមពីលើនេះ រដ្ឋាភិបាលទីក្រុងសេអ៊ូល បានប្តឹងថ្នាក់ដឹកនាំព្រះវិហារ shincheonji ដែលមិនជួយសហការជាមួយអាជ្ញាធរ ក្នុងការទប់ស្កាត់ករណីឆ្លង និងរាយការណ៍ប្រាប់អាជ្ញាធរ៕
Tag:
កូរ៉េខាងត្បូង
COVID-19
© រក្សាសិទ្ធិដោយ thmeythmey.com