រដ្ឋមន្ត្រីកសិកម្ម ប្រាប់ឱ្យមន្ត្រីខ្លួន ប្រើប្រាស់ថវិកាប្រយ័ត្នប្រយែង ខណៈសេដ្ឋកិច្ចកំពុងប្រឈមបញ្ហាEBA និងCOVID-19

COVID-19

ជាតិ

រដ្ឋមន្ត្រីកសិកម្ម ប្រាប់ឱ្យមន្ត្រីខ្លួន ប្រើប្រាស់ថវិកាប្រយ័ត្នប្រយែង ខណៈសេដ្ឋកិច្ចកំពុងប្រឈមបញ្ហាEBA និងCOVID-19

03, Mar 2020 , 11:40 am

រូបភាព

ដោយ: រំដួល ចិត្រា (Romdoul Chetra)

ភ្នំពេញ៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ប្រាប់ឱ្យមន្ត្រីខ្លួន ចេះប្រើប្រាស់ថវិកាដោយតម្លាភាព និងប្រយ័ត្នប្រយែង ស្របពេលសេដ្ឋកិច្ចកម្ពុជា កំពុងប្រឈមមុខនឹងបញ្ហាប្រព័ន្ធអនុគ្រោះពន្ធ (Everything But Arms ) និងវីរុសកូរ៉ូណាប្រភេទថ្មី (COVID-19)។ លោក វេង សាខុន ថ្លែងបែបនេះ នៅក្នុងពិធីបើកកិច្ចប្រជុំបូកសរុបលទ្ធផលការងារនីតិកម្មកសិកម្មប្រចាំឆ្នាំ២០១៩ និងលើកទិសដៅការងារឆ្នាំ២០២០ កាលពីថ្ងៃទី២ មីនា។

ក្នុងចំណោមទិសដៅការងារចំនួន៨ ចំណុចដែលលោក វេង សាខុន បានណែនាំឱ្យមន្ត្រីខ្លួនអនុវត្តនោះ លោកបានសង្កត់ធ្ងន់ដូច្នេះថា៖« ស្ថិតក្នុងកាល:ទេស:ដែលប្រទេសយើង ក៏ដូចជាពិភពលោក កំពុងប្រឈមនឹងវិបត្តិសេដ្ឋកិច្ចដោយសារបញ្ហាជំងឺផ្លូវដង្ហើមធ្ងន់ធ្ងរ (COVID-19) និងបញ្ហា EBA ,ថ្នាក់ដឹកនាំមន្ទីរកសិកម្ម រុក្ខាប្រមាញ់ និងនេសាទ ក៏ដូចជានាយកដ្ឋាន រដ្ឋបាល និងអគ្គនាយកដ្ឋានក្រោមឱវាទ ត្រូវគិតគូយកចិត្តទុកដាក់ប្រើប្រាស់ថវិកាជាតិដោយប្រយ័ត្នប្រយែង ចំគោលដៅ តម្លាភាព និងមានប្រសិទ្ធភាពខ្ពស់»។

បើតាមច្បាប់ស្តីពីថវិកាជាតិឆ្នាំ២០២០នេះ ក្រសួងកសិកម្ម រុក្ខាប្រមាញ់ និងនេសាទ ទទួលបានថវិកាសម្រាប់ប្រើប្រាស់ មានចំនួន៦២២,៧៨៤ដុល្លារអាមេរិក ដែលកើនឡើងប្រមាណជា៤ដង បើធៀបនឹងឆ្នាំ២០១៣ ដែលមានថវិកា១៤៣,៣៤៩ដុល្លារ។

កម្ពុជា ត្រូវបានគណៈកម្មការអឺរ៉ុប សម្រេចកាត់ផ្តាច់ផ្នែកខ្លះនៃ EBA ដែលស្មើនឹងប្រមាណ២០ភាគរយ។ការកាត់ផ្នែកខ្លះនេះ គឺតម្រូវឱ្យកម្ពុជាបង់ពន្ធលើមុខទំនិញ៤០មុខ ដែលមានទំហំទឹកប្រាក់ប្រមាណ ១ពាន់លានអឺរ៉ូ ឬប្រហាក់ប្រហែលនឹង ១,១ ពាន់លានដុល្លារអាមេរិក។ យ៉ាងណាវាមិនមានការវាយតម្លៃជាក់លាក់ណាមួយពីការខាតបង់ដែលកម្ពុជានឹងជួបប្រទះ ក្រោយការអនុវត្តពន្ធលើទំនិញនាំចេញនេះឡើយ ប៉ុន្តែកន្លងមកការវាយតម្លៃជាបឋមថា កម្រិតពន្ធ ១២ ភាគរយអាចនឹងធ្វើឲ្យកម្ពុជាខាតបង់រហូតដល់ជាង ១២០ លានដុល្លារក្នុងឆ្នាំ។ការសម្រេចយកពន្ធនេះ នឹងចូលជាធរមាននៅរយៈពេល៦ខែក្រោយ ដែលមានន័យថា ទាល់តែដល់ខែសីហា ឆ្នាំ២០២០ ទើបកម្ពុជា ចាប់ផ្តើមបង់ពន្ធ ពេលនាំទំនិញចូលទៅទីផ្សារអឺរ៉ុប។

ក្រៅពីបញ្ហាEBA នេះ ក៏មានបញ្ហាវីរុសកូរ៉ូណា (COVID-19) ដែលកំពុងបង្កផលប៉ះពាល់ដល់សេដ្ឋកិច្ចប្រទេសទូទាំងពិភពលោក រួមទាំងកម្ពុជាផងដែរ។ ក្នុងនោះរោងចក្រជិត២០០នៅកម្ពុជា ត្រូវបានរដ្ឋាភិបាល សន្និដ្ឋានថា អាចប្រឈមមុខនឹងការបិទទ្វារបណ្ដោះអាសន្ន ដោយសារខ្វះវត្ថុធាតុដើមប្រើប្រាស់ ខណៈចិនដែលជាប្រទេសផ្គត់ផ្គង់សម្ភារនោះ កំពុងប្រយុទ្ធប្រឆាំងវីរុសប្រភេទថ្មីនេះ។ ដោយសារតែបញ្ហានេះហើយ ទើបរដ្ឋមន្ត្រីកសិកម្ម លោក វេង សាខុន ស្នើឱ្យប្រើប្រាស់ថវិកាជាតិឱ្យបានត្រឹមត្រូវ ដើម្បីធានាសុវត្ថិភាពដល់វិស័យកសិកម្ម។

បន្ថែមពីនេះលោក វេង សាខុន ក៏បានណែនាំឱ្យមន្ត្រីខ្លួន ពង្រឹងការងារលើកកម្ពស់កសិកម្មជាតិ តាមរយៈការបន្តរៀបចំលិខិតបទដ្ឋានគតិយុត្តក្រោមច្បាប់ ដោយសហការជាមួយអង្គភាពជំនាញ។ ជាពិសេសជំរុញការធ្វើអធិការកិច្ច និងពង្រឹងការអនុវត្ដច្បាប់ ហើយត្រូវយកចិត្តទុកដាក់ទប់ស្កាត់ចំពោះការហូរចូលថ្នាំកសិកម្ម និងជីកសិកម្មខុសច្បាប់ ក្លែងបន្លំសំបកវេចខ្ចប់ ស្លាកសញ្ញាព័ត៌មាន ទម្ងន់ និងគុណភាពជាដើម។

«ដើម្បីសម្រេចចក្ខុវិស័យនេះ នាយកដ្ឋាននីតិកម្មកសិកម្មត្រូវខិតខំអនុវត្តច្បាប់ រៀបចំលិខិតបទដ្ឋានគតិយុត្ត ការគ្រប់គ្រង សេវាសាធារណៈ ចុះត្រួតពិនិត្យលើការផ្គត់ផ្គង់ ចែកចាយ លក់ដុំលក់រាយថ្នាំ និងជីកសិកម្មដោយបានចាត់វិធានការចំពោះបទល្មើស និងបានប្រមូលប្រាក់ពិន័យជូនរដ្ឋ។ ជំរុញកម្មវិធីផ្សព្វផ្សាយអំពីសារៈប្រយោជន៍ និងហានិភ័យនៃសម្ភារកសិកម្ម ដល់អ្នកប្រើប្រាស់»។ នេះជាការបញ្ជាក់របស់លោក វេង សាខុន។

គួរបញ្ជាក់ថា យុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល និងផែនការយុទ្ធសាស្ត្រអភិវឌ្ឍន៍វិស័យកសិកម្មឆ្នាំ២០១៩-២០២៣ បានកំណត់ចក្ខុវិស័យយ៉ាងច្បាស់ដោយតម្រង់ទិសឆ្ពោះទៅរកការធ្វើទំនើបកម្មកសិកម្មដែលមានលក្ខណៈប្រកួតប្រជែង បរិយាប័ន្ន ធន់នឹងការប្រែប្រួលអាកាសធាតុ និងនិរន្តរភាព ដើម្បីកំណើនសេដ្ឋកិច្ចជាតិ៕