កម្ពុជា វៀតណាម ណេប៉ាល់ ស្រីលង្កា និងហ្វីលីពីន ស្ថិតក្នុងចំណោមជាង៧០ប្រទេសដែលបានរកឃើញករណីឆ្លងកូរ៉ូណាវីរុស (COVID-19) ប៉ុន្តែប្រទេសទាំងនេះ បានព្យាបាលជាសះស្បើយករណីរៀងៗខ្លួន ហើយមិនទាន់មានករណីឆ្លងថ្មីនោះឡើយ។
នាសន្និសីទសារព័ត៌មានកាលពីថ្ងៃចន្ទ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានអះអាងថា កម្ពុជាមិនទាន់មានករណីឆ្លងថ្មីនោះឡើយ ខណៈមនុស្ស១៣៥នាក់ ទាំងខ្មែរ និងបរទេស បន្ថែមពីលើអ្នកដំណើរប្រមាណ២០០០នាក់នៅនាវា Westerdam សុទ្ធតែមានលទ្ធផលអវិជ្ជមាន។
កម្ពុជារកឃើញករណីឆ្លង COVID-19 ដំបូងលើជនជាតិចិនអាយុ៦០ឆ្នាំម្នាក់នៅខេត្តព្រះសីហនុ កាលពីថ្ងៃទី២៧ ខែមករា។ អ្នកជំងឺនោះបានជាសះស្បើយ ហើយបានចេញពីមន្ទីរពេទ្យកាលពីថ្ងៃទី១០ ខែកុម្ភៈ។ បើទោះជារកមិនទាន់ឃើញករណីឆ្លងថ្មីក៏ដោយ ក៏រដ្ឋមន្ត្រីសុខាភិបាល បានអះអាងថា កម្ពុជាចាត់វិធានការ និងត្រៀមលក្ខណៈរួចរាល់ក្នុងការដោះស្រាយបញ្ហានេះ ជាពិសេសការទប់ស្កាត់មិនឲ្យមានការរាលដាលនៅក្នុងប្រទេស។
វៀតណាម ក្លាយជាប្រទេសដ៏គួរឲ្យស្ងើចសរសើរចំពោះប្រព័ន្ធសុខាភិបាល។ ករណីឆ្លងដល់ទៅ១៦នាក់ បានសះស្បើយ និងចេញពីមន្ទីរពេទ្យជាបន្តបន្ទាប់ ដែលក្នុងនោះមានចិន២នាក់ វៀតណាម៦នាក់ពីក្រុងវូហាន វៀតណាម៦នាក់ដែលឆ្លងតាមគ្នា អាមេរិក១នាក់ រួមទាំងទារិកាវៀតណាម១នាក់ដែលឆ្លងពីជីដូន។ បើគិតចាប់តាំងពីថ្ងៃទី១៣ ខែកុម្ភៈ មក វៀតណាម មិនទាន់មានករណីឆ្លងថ្មីទៀតនោះឡើយ។
នៅណេប៉ាល់ និស្សិតអាយុ៣២ឆ្នាំម្នាក់ដែលបានត្រឡប់ពីសាកលវិទ្យាល័យ Wuhan University of Technology ក្លាយជាអ្នកជំងឺដំបូងដែលតេស្តឃើញនៅអាស៊ីខាងត្បូង។ ក្រោយចូលសម្រាកនៅពេលនាថ្ងៃទី១៣ ខែមករា ស្ថានភាពជំងឺរបស់និស្សិតណេប៉ាល់រូបនេះ បានធូរស្រាលជាបន្តបន្ទាប់ ហើយក្រោយមកត្រូវបានអនុញ្ញាតឲ្យចេញពីមន្ទីរពេទ្យ និងបន្តរស់នៅដាច់ដោយឡែកក្នុងផ្ទះ។ ក្រោយការតាមដាន និងពិនិត្យបន្ថែមទៀត អ្នកជំងឺមានតេស្តអវិជ្ជមាន COVID-19។
នៅស្រីលង្កា ស្ត្រីទេសចរចិនអាយុ៤៧ឆ្នាំ ម្នាក់ ក្លាយជាករណីតែមួយគត់ដែលបានពិនិត្យឃើញវិជ្ជមាន COVID-19 កាលពីថ្ងៃទី២៧ ខែមករា។ ក្រោយមក ស្ត្រីនោះបានសះស្បើយ និងចេញពីមន្ទីរពេទ្យនៅថ្ងៃទី១៩ ខែកុម្ភៈ។ ស្រីលង្កា បានដាក់ទេសចរ និងនិស្សិតជាច្រើននាក់ពីវូហាន ក្រោមវិធានចត្តាឡីស័ក ប៉ុន្តែមិនទាន់មានករណីថ្មីឡើយ។
ដោយឡែកនៅហ្វីលីពីន ការឆ្លង៣ករណីសុទ្ធតែកើតលើជនជាតិចិន។ ស្ត្រីអាយុ៣៨ឆ្នាំ ម្នាក់ត្រូវបានពិនិត្យឃើញនៅថ្ងៃទី៣០ ខែមករា ហើយសះស្បើយ និងចេញពីពេទ្យវិញនៅថ្ងៃទី៨ ខែកុម្ភៈ។ ប៉ុន្តែករណីទីពីរ បុរសវ័យ៤៤ឆ្នាំ បានស្លាប់កាលពីថ្ងៃទី១ ខែកុម្ភៈ និងជាករណីស្លាប់ដំបូងនៅក្រៅប្រទេសចិន។ រីឯករណីទីបី ស្ត្រីវ័យ៦០ឆ្នាំ បានសះស្បើយ និងត្រឡប់ទៅចិនវិញនៅថ្ងៃទី៣១ ខែមករា។
ប្រទេសមួយចំនួនទៀត ដូចជា ឥណ្ឌា រុស្ស៊ី ហ្វាំងឡង់ ចក្រភពអង់គ្លេស និងអេហ្ស៊ីប ជាដើម បានស្ងប់ស្ងាត់អស់រយៈពេលជាច្រើនថ្ងៃក្រោយព្យាបាលសះស្បើយអ្នកជំងឺដំបូងៗ ប៉ុន្តែក្រោយមក ប្រទេសទាំងនោះ បានកើនករណីឆ្លងជាបន្តបន្ទាប់៕