រដ្ឋមន្ត្រីអប់រំ ស្នើឲ្យឪពុកម្តាយ បង្កើតបណ្ណាល័យនៅផ្ទះ ដើម្បីកូនបានអានសៀវភៅគ្រប់កម្រិត

ជាតិ

សង្គមជាតិ

រដ្ឋមន្ត្រីអប់រំ ស្នើឲ្យឪពុកម្តាយ បង្កើតបណ្ណាល័យនៅផ្ទះ ដើម្បីកូនបានអានសៀវភៅគ្រប់កម្រិត

07, Mar 2020 , 8:59 am

រូបភាព

លោក ហង់ ជួន ណារ៉ុន ថ្លែងក្នុងសន្និសីទសារព័ត៌មានស្តីពីការរៀបចំទិវាជាតិអំណានលើកទី៥ ដែលនឹងប្រព្រឹត្តទៅចាប់ពីថ្ងៃទី៦-១៥ ខែមីនា ឆ្នាំ២០២០

ដោយ:

ភ្នំពេញ៖ លោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និង កីឡា បានស្នើឲ្យអាណាព្យាបាលសិស្ស បង្កើតបណ្ណាល័យខ្លួនឯងនៅតាមផ្ទះ ដែលមានសៀវភៅគ្រប់គ្រាន់សម្រាប់អានដើម្បីជាចំណេះដឹងបន្ថែមទៀត។ លោក ហង់ ជួន ណារ៉ុន បានបញ្ជាក់បែបនេះនៅក្នុងសន្និសីទអ្នកសារព័ត៌មាន នាព្រឹកថ្ងៃទី២ ខែមីនា ឆ្នាំ២០២០ ស្តីពីអំពីការត្រៀមរៀបចំទិវាអំណានលើកទី៥ ក្រោមប្រធានបទ «ការអានបណ្តុះបញ្ញា ការស្រាវជ្រាវ និង នាវានុវត្តន៍» នៅថ្ងៃទី១១ ខែមីនា ដែលជាថ្ងៃរំលឹកគុណដល់សម្តេចព្រះសង្ឃរាជ ជួន ណាត។

លោក ហង់ ជួន ណារ៉ុន បានលើកឡើងថា ក្រសួងអប់រំ បានលើកកម្ពស់អំណាននៅតាមគ្រប់គ្រឹះស្ថានសិក្សា តាមរយៈការជំរុញឲ្យសាលារៀននីមួយៗ មានបណ្ណាល័យ ដែលមានសៀវភៅគ្រប់ប្រភេទ និងគ្រប់កម្រិត សម្រាប់ជាមធ្យោបាយដល់សិស្សឲ្យមានទម្លាប់អានសៀវភៅ។

លោករដ្ឋមន្ត្រី បន្តថា សៀវភៅដែលសាលារៀននីមួយៗគួរតែដាក់នៅតាមបណ្ណាល័យនោះ គឺជាសៀវភៅដែលត្រូវតាមកម្រិតសិក្សារបស់សិស្សពីថ្នាក់បឋម ដល់ថ្នាក់វិទ្យាល័យ ដោយសៀវភៅទាំងនោះមានជាប្រភេទសៀវភៅរឿងនិទាន សៀវភៅភាសាខ្មែរ សៀវភៅភាសាបរទេស និង សៀវភៅអក្សរសាស្ត្រខ្មែរ។

បន្ថែមពីនេះទៀត លោករដ្ឋមន្ត្រី បានស្នើឲ្យអាណាព្យាបាលសិស្ស បង្កើតជាបណ្ណាល័យផ្ទាល់ខ្លួនមួយនៅតាមផ្ទះ ដើម្បីជាជំនួយដល់ការសិក្សាស្រាវជ្រាវ។ លើសពីនេះទៀត លោក បានស្នើឲ្យមាតាបិតាសិស្សពង្រឹងការយកចិត្តទុកដាក់បន្ថែមទៀតលើកូន ដោយបង្រៀនកូនអានសៀវភៅនៅឯផ្ទះផងដែរ។

រដ្ឋមន្ត្រីក្រសួងអប់រំរូបនេះ ប្រសាសន៍ដូច្នេះថា៖«ការបង្កើតបណ្ណាល័យឲ្យក្មេងចូលចិត្តអានគឺសំខាន់។ បណ្ណាល័យ ត្រូវតែស្អាតជាងបន្ទប់រៀនទៀត។ ឪពុកម្តាយត្រូវមានទូរសៀវភៅ នៅតាមផ្ទះ ឲ្យកូនអាន។ មានមតិមួយចំនួនលើកឡើងថា នៅផ្ទះយើង ពេលដើរចូលមក មានតាំងអ្វីទាំងអស់ អត់តែសៀវភៅ។ គួរតែផ្លាស់ប្តូរទម្លាប់ហ្នឹង តាមរយៈការរៀបចំ ទូរសៀវភៅមួយនៅតាមផ្ទះរបស់យើងរៀងៗខ្លួន។ យើងចាប់ផ្តើមពីអាហ្នឹងទៅ ទើបយើងចូលចិត្តអាន»។

លោក ហង់ ជួន ណារ៉ុន បានបញ្ជាក់ថា ក្រសួងអប់រំ ក៏កំពុងតែជំរុញឲ្យគ្រឹះស្ថានសិក្សានីមួយៗបង្កើតជាកម្មវិធីប្រកួតប្រជែងការតែងសេចក្តី ការតែងកំណាព្យ ការស្មូតកំណាព្យ ការរៀបចំតាំងពិព័រណ៍សៀវភៅ ពិធីផ្លាស់ប្តូរសៀវភៅសម្រាប់អាន ឲ្យកាន់តែទូលំទូលាយបន្ថែមទៀត ដោយសហការជាមួយនឹងយុវជនស្ម័គ្រចិត្ត និង បណ្តាក្រសួងពាក់ព័ន្ធ ដើម្បីបង្កើនការអានអក្សរសាស្ត្រខ្មែរ។

លោក និយាយទៀតថា សិស្សានុសិស្ស និងយុវជននាពេលបច្ចុប្បន្ន មានការយកចិត្តទុកដាក់លើការអានសៀវភៅច្រើនជាងមុន។ លោក បន្ថែមថា កំណើននៃអ្នកអានសៀវភៅកាន់តែច្រើនបែបនេះ ដោយសាររាល់ឆ្នាំ ក្រសួងអប់រំ តែងតែងបង្កើតទិវាអំណានដែលមានប្រធានបទខុសៗគ្នា និងមានការរៀបចំស្តង់សៀវភៅនៅតាមគ្រឹះស្ថានសិក្សា និងបោះពុម្ភសៀវភៅគ្រប់កម្រិតសិក្សាសម្រាប់ដាក់នៅគ្រប់បណ្ណាល័យសាលារៀនទូទាំងរាជធានីខេត្ត។

លោករដ្ឋមន្ត្រីក្រសួងអប់រំ បានអះអាងថា ដើម្បីឲ្យមានកំណើនការអានសៀវភៅ និងមានគុណភាពអប់រំល្អនៅកម្ពុជា ក្រសួងអប់រំនឹងបន្តកិច្ចការងារមួយចំនួនបន្ថែមទៀត ដោយលើកកម្ពស់ស្តង់ដារបណ្ណាល័យនៅតាមសាលារៀន អនុវត្តវិធីសាស្ត្របង្រៀនតាមបែបបច្ចេកវិទ្យាទំនើប និងបង្កើតសាលារៀនជំនាន់ថ្មីបន្ថែមទៀតផងដែរ។

លោក ថ្លែងថា៖«អំណាននេះមិនមែនអានតែសៀវភៅ និងក្រដាសទេ តែក៏អាចអានដោយប្រើប្រាស់បច្ចេកវិទ្យាផងដែរ។ នៅឆ្នាំនេះ យើងនឹងរៀបចំសនិ្នបាតអប់រំមួយគឺ យុវជន និងការអប់រំតាមបែបឌីជីថល។ ឆ្នាំមុនយើងលើកកម្ពស់អក្សរសិល្បិ៍ខ្មែរ ហើយឆ្នាំនេះយើងនឹងលើកកម្ពស់កិច្ចការស្រាវជ្រាវលើសិលាចារឹក ដែលជាបេតិកភណ្ឌមួយរបស់យើង។ សិលាចារឹកនេះមិនសូវមានអ្នកដឹងច្រើនទេ អ៊ីចឹងយើងយកប្រធានបទនេះ ដើម្បីផ្សព្វផ្សាយ នៃរូបភាព និងទិដ្ឋភាពផ្សេងៗនៃវប្បធម៌ខ្មែរផងដែរ។ ម្យ៉ាងវិញទៀត យើងនឹងអញ្ជើញអ្នកគ្រប់គ្រងបណ្ណាល័យ និងនាយកសាលាគ្រប់ខេត្តដើម្បីឲ្យសាលាមានបណ្ណាល័យ មានសៀវភៅទៅតាមកម្រិតរបស់សិស្ស»។

សូមបញ្ជាក់ថា ទិវាអំណានលើកទី៥ឆ្នាំនេះ ក្រសួងអប់រំនឹងរៀបចំយុទ្ធនាការ តាំងពិព័រណ៍សៀវភៅនៅតាមបណ្តាគ្រឹះស្ថានសិក្សាទូទាំងរាជធានីខេត្តចាប់ពីថ្ងៃទី៦ ដល់ថ្ងៃទី១៥ ខែមីនា។ សម្រាប់រាជធានីភ្នំពេញចាប់ពីថ្ងៃទី៦ ដល់ថ្ងៃទី៨ ខែមីនា នៅវិទ្យាស្ថានបច្ចេកវិទ្យាកម្ពុជា ដោយមានស្តង់សៀវភៅចំនួន១០៤ស្តង់ និងមានបណ្តាអ្នកបោះពុម្ភសៀវភៅ និងបណ្តាអ្នកនិពន្ធសៀវភៅជាច្រើនរូបចូលរួមផងដែរ។ នៅទិវាអំណាននេះ ក្រសួងអប់រំនឹងរៀបចំឲ្យមានការប្រឡងប្រណាំងការអាន ការស្មូតកំណាព្យ និង ការតែងនិពន្ធ ផងដែរ៕