សមាគមមូលនិធិទ្រទ្រង់សហគមន៍កម្ពុជា រៀបចំមហាសន្និបាតរបស់ខ្លួនរយៈពេល៥ឆ្នាំ(២០១៥-២០១៩) និងទិសដៅឆ្នាំ២០២០

អត្ថបទពាណិជ្ជកម្ម

សមាគមមូលនិធិទ្រទ្រង់សហគមន៍កម្ពុជា រៀបចំមហាសន្និបាតរបស់ខ្លួនរយៈពេល៥ឆ្នាំ(២០១៥-២០១៩) និងទិសដៅឆ្នាំ២០២០

07, Mar 2020 , 3:45 pm

រូបភាព

ដោយ: ថ្មីៗ

ភ្នំពេញ៖ សមាគមមូលនិធិទ្រទ្រង់សហគមន៍កម្ពុជា បានប្រារព្ធមហាសន្និបាត បូកសរុបការងាររយៈពេល៥ឆ្នាំ ចាប់ពី២០១៥ដល់២០១៩ និងគម្រោងផែនការឆ្នាំ២០២០របស់ខ្លួន ក្រោមពាក្យស្លោក«រួមគ្នាបង្កើតគណៈកម្មការដល់គោលដៅ»។ មហាសន្និបាតនេះ ត្រូវបានប្រារព្ធឡើង នាថ្ងៃទី៦ ខែមីនា ឆ្នាំ២០២០ នៅសណ្ឋាគារDyvith ដែលមានការចូលរួមជាប្រធានកិត្តិយសពីសំណាក់ លោក ធឹម សុផា និងលោក ចៅ ចាន់ធឿន ប្រធានសមាគមមូលនិធិទ្រទ្រង់សហគមន៍កម្ពុជា ព្រមទាំងគណកម្មការ និងភ្ញៀវកិត្តិយសដែលជាសមាជិករបស់សមាគមផងដែរ។

លោក ចៅ ចាន់ធឿន ប្រធានសមាគមមូលនិធិទ្រទ្រង់សហគមន៍កម្ពុជា បានមានប្រសាសន៍ថា ទស្សនវិស័យរបស់សមាគមមូលនិធិទ្រទ្រង់សហគមន៍កម្ពុជា គឺចូលរួមជាមួយរាជរដ្ឋាភិបាល ក្នុងការលើកកម្ពស់ជីវភាពសុខុមាលភាពប្រជាពលរដ្ឋ ឲ្យកាន់តែប្រសើរទ្បើង និងកាត់បន្ថយភាពក្រីក្រ។ លោកបន្ថែមថា៖«តាមរយៈគម្រោងរបស់សមាគម ដែលមានគោលបំណងធ្វើឲ្យមនុស្សកាន់តែមានគុណតម្លៃ នៃជីវិត តាមរយៈគម្រោងធំៗទាំងនេះ គឺ«កើត»មានគេគាំទ្រ «ការ»មានគេចូលរួមអបអរសាទរ «កប់» មានគេចូលរួមមូលនិធិ ដើម្បីជួយដល់ក្រុមគ្រួសារសមាជិកសមាជិកា ពេលជួបហានិភ័យជីវិតចុងក្រោយ រួមជាមួយនឹងគម្រោងសង្គ្រោះបន្ទាន់ ដែលនឹងត្រូវអនុវត្តន៍នាឆ្នាំនេះ»។

លោកបានបន្ថែមទៀតថា ទិសដៅ ឆ្នាំ២០២០ នឹងបង្កើតគណ:កម្មការឲ្យបាន ២ម៉ឺននាក់ និងសមាជិក ១០ម៉ឺននាក់ ហើយសមាជិកគ្រប់លក្ខខណ្ឌ ដែលមរណភាពនឹងទទួបានមូលនិធិ៨០% ឬស្មើនឹង៨០លានរៀល និងគណៈកម្មការស្មើនឹង២៤០លានរៀល។ គណៈកម្មការរាជធានីខេត្ត ក្រុង ស្រុក ខ័ណ្ឌ ឃុំសង្កាត់ រហូតដល់ភូមិ អាចស្នើបើកប្រាក់សន្សំបាន ទៅតាមគោលការ ហើយសមាគម នឹងខិតខំប្រឹងបង្កើតគម្រោងថ្មីៗបន្ថែមទៀត ដើម្បីផ្តល់ផលប្រយោជន៍កាន់តែច្រើន ដល់បងប្អូនគណៈកម្មការ និងសមាជិក នាឆ្នាំបន្តបន្ទាប់ទៀតតាមចក្ខុវិស័យរបស់សមាគមផងដែរ។

លោក ធឹម សុផា ដែលជាប្រធានកិត្តិយសរបស់សមាគមបានមានប្រសាសន៍ថា សមាគមមូលនិធិទ្រទ្រង់សហគមន៍កម្ពុជា បានចុះបញ្ជីនៅក្រសួងមហាផ្ទៃត្រឹមត្រូវ គឺសមាគមនេះ ធ្វើការងារមិនស្វែងរកកម្រៃជាឯកជនឡើយ ដោយបម្រើការងារប្រជាពលរដ្ឋ មិនប្រកាន់និន្នាការនយោបាយ ជាតិសាសនា។ លោក ធឹម សុផា ក៏គាំទ្រនូវទម្រង់គោលការណ៍ របស់សមាគម ក្នុងការចូលរួមជាមួយរាជរដ្ឋាភិបាល កាត់បន្ថយភាពក្រីក្រ លើកកម្ពស់ជីវភាពប្រជាពលរដ្ឋកម្ពុជា។

គួរបញ្ជាក់ផងដែរថា នៅឆ្នាំ២០២០នេះ សមាគមមូលនិធិទ្រទ្រង់សហគមន៍កម្ពុជា មានបេសកកម្ម ធំៗចំនួន៤ គឺ ១.លើកទឹកចិត្តគណៈកម្មការរាជធានីខេត្តក្រុងស្រុកខ័ណ្ឌ ឃុំសង្កាត់រហូតដល់ភូមិ។ ២.បញ្ជូនគ្រូជំនាញបើកវគ្គបណ្តុះបណ្តាល ដល់គណៈកម្មការរាជធានីខេត្ត ឲ្យមានគ្រូបង្គោល ដើម្បីចេះធ្វើបទបង្ហាញបន្ត។ ៣.ពង្រឹងការងាររដ្ឋបាល និងគណនេយ្យឲ្យបានល្អ តាមគណនេយ្យភាព សុចរឹតភាព និងមានតម្លាភាព ក្នុងការផ្ដល់សេវាមូលនិធិ ឲ្យបានទាន់ពេលវេលា។ ៤.ជំរុញការបង្កើតគណៈកម្មការឲ្យដល់គោលដៅ ក្នុងឆ្នាំ២០២០នេះ៕