ថៃនិងម៉ាឡេស៊ី ហាមនាវាកម្សាន្តមួយគ្រឿងចូលចត ព្រោះបារម្ភ COVID-19

COVID-19

អន្តរជាតិ

ថៃនិងម៉ាឡេស៊ី ហាមនាវាកម្សាន្តមួយគ្រឿងចូលចត ព្រោះបារម្ភ COVID-19

08, Mar 2020 , 2:56 pm

រូបភាព

នាវាកម្សាន្ត Costa Fortuna ។រូបភាព AFP

ដោយ: តន ចាន់រិទ្ធារ៉ា

ប្រទេសថៃ និងម៉ាឡេស៊ី បានហាមនាវាកម្សាន្តមួយគ្រឿងចូលចតនៅកំពង់ផែរបស់ខ្លួន ដោយសារការបារម្ភពីការរាលដាលជំងឺរលាកសួតបង្កដោយកូរ៉ូណាវីរុសថ្មី (COVID-19) ។ នេះបើតាមការបញ្ជាក់របស់មន្ត្រីប្រទេសទាំងពីរ។ ក្នុងចំណោមអ្នកដំណរលើនាវានេះ ក៏មានជនជាតិអ៊ីតាលី៦៤នាក់ផងដែរ។

នាវាកម្សាន្ត Costa Fortuna ត្រូវបានអាជ្ញាធរថៃ ហាមចូលចតកាលពីថ្ងៃទី៦ ខែមីនាកន្លងទៅ បើទោះជាម្ចាស់នាវាអះអាងថា មិនមានករណីសង្ស័យពាក់ព័ន្ធការឆ្លង COVID-19 ក្ដី។ នេះបើតាមការផ្សាយរបស់ទីភ្នាក់ងារព័ត៌មាន AFP ។ សព្វថ្ងៃ ថៃ អនុវត្តវិធានការទុកដោយឡែក១៤ថ្ងៃសម្រាប់អ្នកពីអ៊ីតាលី។

ក្រោយត្រូវបានថៃបដិសេធ នាវានេះ ក៏ធ្វើដំណើរទៅកាន់ម៉ាឡេស៊ី។ ការព្យាយាមចូលចតនៅកំពង់ផែក្នុងងរដ្ឋ Penang ក៏ត្រូវបានបដិសេធទៀត។ នេះបើតាមសម្ដីលោក Phee Boon Poh ដែលប្រាប់ AFP នៅថ្ងៃទី៨ ខែមីនា។ ការសម្រេចចិត្តនេះ ធ្វើឡើងតាមការសម្រេចចិត្តរបស់រដ្ឋាភិបាលគួឡាឡាំពួដែលមិនអនុញ្ញាតឲ្យមានការចូលចតរបស់នាវាកម្សាន្តគ្រប់ប្រភេទ។ បើតាមលោក Phee នាវានេះបានបន្តដំណើទៅកាន់សិង្ហបុរី។

ស្ថានភាព Costa Fortuna ស្រដៀងគ្នានឹងនាវា MS Westerdam ដែលត្រូវបានប្រទេស និងកោះចំនួន៦ បដិសេធមិនឲ្យចូលចត ទោះបីមានការអះអាងពីម្ចាស់នាវាថា គ្មានមេរោគក្ដី។ ចុងក្រោយ Westerdam ត្រូវបានអនុញ្ញាតឲ្យចូលចតនៅកម្ពុជា។

សូមបញ្ជាក់ថា ករណីឆ្លង COVID-19 នៅជុំវិញពិភពលោកបានឡើងលើសមួយសែនករណី ខណៈអ្នកស្លាប់មានប្រមាណ៣៥០០នាក់ផងដែរ៕