COVID-19
អន្តរជាតិ
ករណីឆ្លង COVID-19 នៅអាមេរិកឡើងលើស៥០០, អ្នកស្លាប់មាន២២ រូបភាព Xinhua
× ករណីឆ្លងជំងឺផ្លូវដង្ហើមបង្កដោយកូរ៉ូណាវីរុស (COVID-19) នៅសហរដ្ឋអាមេរិក បានឡើងលើស៥០០ហើយ គិតត្រឹមថ្ងៃទី៨ ខែមីនា ដោយមានអ្នកស្លាប់សរុប២២ ។ ប៉ុន្តែប្រធានាធិបតី ដូណាល់ ត្រាំ នៅតែនិយាយការពារចំណាត់របស់រដ្ឋបាលរបស់លោក ពិសេសសរសើរអនុប្រធានាធិបតី ម៉ៃ ផេន ដែលដឹកនាំកិច្ចការប្រយុទ្ធប្រឆាំងវីរុសមួយនេះ។ វីរុសនេះ មានវត្តមានក្នុងរដ្ឋអាមេរិកលើសពាក់កណ្ដាលទៅហើយ។
គិតត្រឹមថ្ងៃទី៨ ខែមីនា សហរដ្ឋអាមេរិក មានករណីឆ្លង COVID-19 ចំនួន៥៤០ និងអ្នកស្លាប់២២នាក់។ នេះបើតាមការផ្សាយរបស់វេបសាយ BNO News ដែលតាមដានករណីឆ្លងកូរ៉ូណាវីរុសនៅជុំវិញពិភពលោក។ រដ្ឋសហព័ន្ធរបស់អាមេរិកប្រមាណ៣០ សុទ្ធតែរាយការណ៍ករណីឆ្លង COVID នេះ ខណៈរដ្ឋ Oregon ជារដ្ឋចុងក្រោយគេដែលប្រកាសភាពអាសន្ន ខណៈប្រជាជនជាង៦០លាននាក់ កំពុងស្ថិតក្រោមស្ថានភាពអាសន្ន។
ទោះជាយ៉ាងណា ប្រធានាធិបតីអាមេរិក ដូណាល់ ត្រាំ នៅតែសរសើរចំណាត់របស់រដ្ឋាភិបាលលោកក្នុងការទប់ស្កាត់ការរាលដាលវីរុសនេះ។ លោក ត្រាំ ថែមទាំងចោទប្រព័ន្ធផ្សព្វផ្សាយខ្លះដែលចេញព័ត៌មានរិះគន់រដ្ឋបាលរបស់លោកទៀតផង។ នៅលើបណ្ដាញសង្គម Twitter មេដឹកនាំអាមេរិករូបនេះលើកឡើងថា រដ្ឋាភិបាលមានចំណាត់ការរួមគ្នា និងផែនការដ៏ល្អប្រសើរដើម្បីប្រយុទ្ធប្រឆាំងកូរ៉ូណាវីរុសនេះដូចជាការបិទព្រំដែននៅតាមតំបន់ខ្លះជាដើម។
«អនុប្រធានាធិបតី កំពុងធ្វើការងារបានយ៉ាងល្អ។ សារព័ត៌មាន Fake News កំពុងធ្វើរឿងគ្រប់យ៉ាងដើម្បីធ្វើឲ្យយើងមើលទៅដូចជាអាក្រក់។» នេះជាសំណេរថែមទៀតរបស់លោក ត្រាំ ដែលចង់សំដៅដល់អនុប្រធានាធិបតី ម៉ៃ ផេន ដែលលោកតែងតាំងឲ្យដឹកនាំកិច្ចការប្រយុទ្ធប្រឆាំង COVID-19 ដោយផ្ទាល់។
ជាមួយករណីឆ្លងកើនរហ័សបែបនោះ សូម្បីតែសមាជិកព្រឹទ្ធសភាអាមេរិក ក៏ត្រូវប្រយ័ត្នដែរ។ លោក Ted Cruz សមាជិកព្រឹទ្ធសភារដ្ឋ Texas បានដាក់ខ្លួនឯងដោយឡែក១៤ថ្ងៃ បន្ទាប់ពីបានចាប់ដៃអ្នកចូលរួមក្នុងសន្និសីទមួយដែលក្រោយមកត្រូវបានរកឃើញថា មានឆ្លង COVID-19 ។ លោក ត្រាំ និងលោក ផេន ក៏មានមុខក្នុងសន្និសីទដែលរៀបចំកាលពីខែកុម្ភៈផងដែរ។
រឿងឈឺក្បាលមួយទៀតសម្រាប់អាមេរិក គឺករណីឆ្លងលើនាវា Grand Princess ។ ក្នុងចំណោមអ្នកដំណើរជាង៣៥០០នាក់ អ្នកដំណើរចំនួន២១ ត្រូវបានរកឃើញថា មានផ្ទុក COVID-19 ។ នាវាកម្សាន្តនេះ នឹងត្រូវចូលចតនៅ Oakland នៃរដ្ឋកាលីហ្វ័រនៅញ៉ា។ អ្នកដំណើរទាំងអស់ នឹងត្រូវពិនិត្យសុខភាព ដោយអ្នកមិនមានរោគសញ្ញា នឹងត្រូវយកទៅដាក់ដោយឡែក១៤ថ្ងៃ ឯអ្នកបញ្ហា បញ្ជូនទៅកាន់មន្ទីរពេទ្យដើម្បីព្យាបាល។ ឯជនជាតិកាណាដា នឹងត្រូវបញ្ជូនទៅព្យាបាលនៅកាណាដាវិញ៕
Tag:
COVID-19
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com