COVID-19
អន្តរជាតិ
ប្រធានាធិបតីព័រទុយហ្គាល់ ត្រូវដាក់នៅដោយឡែក២សប្ដាហ៍ ក្រោយជួបនិស្សិតដែលផ្ទុក COVID-19 ប្រធានាធិបតីព័រទុយហ្គាល់ Marcelo Rebelo de Sousa នឹងត្រូវស្ថិតដោយឡែក (ចត្តាឡីស័ក) រយៈពេលពីរសប្ដាហ៍។ រូបភាព AFP
× ប្រធានាធិបតីព័រទុយហ្គាល់ Marcelo Rebelo de Sousa នឹងត្រូវស្ថិតដោយឡែក (ចត្តាឡីស័ក) រយៈពេលពីរសប្ដាហ៍។ នេះបើតាមការប្រកាសរបស់វេបសាយប្រធានាធិបតីព័រទុយហ្គាល់នៅថ្ងៃទី៨ ខែមីនា។ វិធានការនេះ ត្រូវអនុវត្តបន្ទាប់ពីលោក Rebelo de Sousa បានជួបជាមួយនិស្សិតមួយក្រុម ដែលមានសមាជិកម្នាក់ត្រូវបានរកឃើញថា មានផ្ទុក COVID-19 ។
លោក Marcelo Rebelo de Sousa វ័យ៧១ឆ្នាំ បានជួបជាមួយនិស្សិតមកពីតំបន់ភាគខាងជើងព័រទុយហ្គាល់ ហើយបានថតរូបជាមួយពួកគេក្នុងកម្មវិធីមួយកាលពីថ្ងៃទី៣ ខែមីនាកន្លងទៅ។ នៅថ្ងៃទី៨ ខែមីនា សិស្សម្នាក់ក្នុងចំណោមនេះ ត្រូវបានប្រកាសថា មានផ្ទុក COVID-19 ហើយសាលារៀនរបស់គេ ក៏ត្រូវបានបិទផងដែរ។ លោកប្រធានាធិបតី ក៏ទទួលយកសំណើរបស់មន្ត្រីសុខាភិបាលក្នុងការដាក់ចត្តាឡីស័កខ្លួន១៤ថ្ងៃនៅនិវេសនដ្ឋានឯកជនរបស់លោក។
«ដោយបានស្ដាប់យោបល់មន្ត្រីសុខាភិបាល ប្រធានាធិបតីនៃសាធារណរដ្ឋ ទោះបីជាគ្មានរោគសញ្ញាណាមួយក្ដី សម្រេចចិត្តលុបចោលកម្មវិធីទាំងអស់អំឡុងពេលពីរសប្ដាហ៍បន្ទាប់។» នេះជាការប្រកាសលើវេបសាយប្រធានាធិបតីព័រទុយហ្គាល់នៅថ្ងៃទី៨ ខែមីនា។ ការប្រកាសព័ត៌មានបន្តថា បច្ចុប្បន្ន ពលរដ្ឋព័រទុយហ្គាល់បានបញ្ចេញសកម្មភាពល្អជាច្រើន ដូចនេះលោកប្រធានាធិបតីក៏ធ្វើជាគំរូទប់ស្កាត់ការរាលដាលសម្រាប់ប្រជាជនដែរ។
សូមបញ្ជាក់ថា តួលេខឆ្លង COVID-19 នៅព័រទុយហ្គាល់មានចំនួន៣០ករណី បន្ទាប់ពីរកឃើញថែមចំនួន៩ករណីនៅថ្ងៃទី៨ ខែមីនា។ នេះបើតាមការផ្សាយរបស់ទីភ្នាក់ងារព័ត៌មាន Xinhua ។ ករណីឆ្លងនេះ គឺភាគច្រើនមានប្រភពពីអ៊ីតាលីដែលជាប្រទេសរងការវាយប្រហារធ្ងន់ធ្ងរជាងគេនៅអឺរ៉ុប។
ដោយឡែកប្រទេសអេស្ប៉ាញ អ្នកជិតខាងតែមួយគត់របស់ព័រទុយហ្គាល់ ក៏បានរាយការណ៍ពីការកើនឡើងករណីឆ្លង COVID-19 ដែរ។ តួលេខឆ្លងសរុបនៅប្រទេសនេះ មានចំនួន៦៧៤ករណី និងស្លាប់១៧នាក់៕
Tag:
COVID-19
ព័រទុយហ្គាល់
Marcelo Rebelo de Sousa
© រក្សាសិទ្ធិដោយ thmeythmey.com