ប្រធានសមាគមគ្រូពេទ្យអ៊ីតាលីម្នាក់ស្លាប់ ខណៈអ្នកស្លាប់សរុបឡើងជាង១០០០នាក់ហើយ

COVID-19

អន្តរជាតិ

ប្រធានសមាគមគ្រូពេទ្យអ៊ីតាលីម្នាក់ស្លាប់ ខណៈអ្នកស្លាប់សរុបឡើងជាង១០០០នាក់ហើយ

13, Mar 2020 , 7:39 pm

រូបភាព

លោក Roberto Stella ប្រធានសមាគមវេជ្ជសាស្រ្ត Medical Guild of Varese

ដោយ:

លោក Roberto Stella ប្រធានសមាគមវេជ្ជសាស្ត្រ Medical Guild of Varese នៅភាគខាងជើងនៃប្រទេសអ៊ីតាលី បានបាត់បង់ជីវិតដោយសារ COVID-19 កាលពីយប់ថ្ងៃអង្គារ ទី១០ មីនា។ គិតត្រឹមថ្ងៃព្រហស្បតិ៍ទី១២ មីនា អ្នកស្លាប់ដោយសារ COVID-19 សរុបក្នុងប្រទេសនេះឡើងជាង១ពាន់នាក់ហើយ។

លោកវេជ្ជបណ្ឌិត Roberto Stella អាយុ ៦៧ឆ្នាំ ដែលជាអ្នកចាត់ចែងកិច្ចការទប់ស្កាត់វិបត្តិ COVID-19 ក្នុងតំបន់ភាគខាងជើងនៃប្រទេសនេះ បានស្លាប់ក្រោយពីឆ្លងជំងឺ COVID-19 ក្នុងទីក្រុង Como ។ នេះបើតាមសេចក្តីថ្លែងការណ៍របស់សហព័ន្ធគ្រូពេទ្យជាតិអ៊ីតាលី ដោយដកស្រង់ចុះផ្សាយដោយព័ត៌មានរដ្ឋក្នុងស្រុក ANSA កាលពីថ្ងៃពុធ ទី១១ មីនា។

ក្នុងសេចក្តីថ្លែងការណ៍ដដែល លេខាធិការនៃសហព័ន្ធគ្រូពេទ្យនេះ លើកឡើងថា លោក វេជ្ជបណ្ឌិត Roberto Stella គឺជាគំរូដ៏ល្អសម្រាប់គ្រូពេទ្យដទៃទៀតសម្រាប់សមត្ថភាព និងកិច្ចប្រឹងប្រែងរបស់លោក។ បើតាមការចុះផ្សាយរបស់ទូរទស្សន៍ CNN លោក Roberto គឺជាវេជ្ជបណ្ឌិតដ៏ពិនប្រសព្វម្នាក់ដែលទទួលស្គាល់ទាំងថ្នាក់តំបន់និងជាតិ។

សូមបញ្ជាក់ដែរថា ករណីស្លាប់ដោយសារ COVID-19 ក្នុងប្រទេសអ៊ីតាលី បានកើនឡើងលើស១០០០ករណីហើយ គិតត្រឹមថ្ងៃទី១២ ខែមីនា ។ ចំណែកករណីឆ្លងសរុបមានដល់ជាង១៥០០០ករណី ចាប់តាំងប្រទេសនេះ បានរកឃើញករណីឆ្លងលើកដំបូង កាលពីថ្ងៃ២១ ខែកុម្ភៈ ក្នុងតំបន់ Lombardy ភាគខាងជើងនៃប្រទេស។ ក្នុងនោះ អ្នកជាសះស្បើយមានជាង១២០០នាក់៕