COVID-19
អន្តរជាតិ
×![]()
ដោយ: ថ្មីៗ
ដោយ៖ គយ រតនបុរិន្ទ
អាជ្ញាធរសុខាភិបាលកូរ៉េខាងត្បូង បានឲ្យដឹងថា នៅថ្ងៃទី១៦ ខែមីនាថា ខ្លួនបានរកឃើញអ្នកឆ្លងជំងឺ COVID-19 ចំនួន ៧៤នាក់បន្ថែមទៀត។ ចំនួននេះមានការថយចុះបន្តិចបើប្រៀបទៅនឹងថ្ងៃមុន។ សរុបទៅ អ្នកឆ្លងជំងឺ COVID-19 នៅកូរ៉េខាងត្បូងឡើងដល់ ៨២៣៦នាក់ហើយ។
មជ្ឈមណ្ឌលគ្រប់គ្រងនិងការពារជំងឺកូរ៉េខាងត្បូង បានបញ្ជាក់ទៀតថាអ្នកជំងឺចំនួន ៣០៣បានជាសះស្បើយ ធ្វើឲ្យតុល្យការអ្នកដែលជាសះស្បើយពីជម្ងឺ និងចាកចេញពីកន្លែងថែទាំមានចំនួន ១១៣៧នាក់។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ជាមួយគ្នានេះ អាជ្ញាធរកូរ៉េខាងត្បូង ពុំបានរកឃើញករណីស្លាប់ថ្មីទៀតឡើយ។ មកទល់ពេលនេះ អ្នកស្លាប់នៅកូរ៉េខាងត្បូងដោយសារ COVID-19 មាន ៧៥នាក់ ដែលភាគច្រើនជាមនុស្សចាស់ និងអ្នកមានជំងឺស្រាប់។
ចំនួនអ្នកឆ្លងជំងឺ COVID-19 នៅកូរ៉េខាងត្បូងមានការថយចុះគួរឲ្យកត់សម្គាល់ពោលគឺពីចំនួន ៩០៩ករណីក្នុងមួយថ្ងៃនៅថ្ងៃទី២៩ កុម្ភៈ ធ្លាក់មកត្រឹម ៧៦ករណីត្រឹមថ្ងៃអាទិត្យ ទី១៥ ខែមីនា។
ចាប់ពីថ្ងៃអាទិត្យទី១៥ ខែមីនា អាជ្ញាធរកូរ៉េខាងត្បួងបានសម្រេចដាក់អ្នកដំណើរមកពីបារាំង អាល្លឺម៉ង់ អង់គ្លេស អេស្ប៉ាញ និងហូឡង់ឲ្យស្ថិតក្រោមការត្រួតពិនិត្យតឹងរ៉ឹងជាងមុន បន្ទាប់ពីបានចាត់វិធានការបែបនេះទៅលើប្រទេសចិន អ៊ីតាលី និងអ៊ីរង់ក្រោយពេលផ្ទុះជំងឺ COVID-19។
ដោយឡែកពីវិធានការវាស់ស្ទង់សីតុណ្ហភាពនៅអាកាសយានដ្ឋាន អ្នកដំណើរមកពីបណ្តាប្រទេសខាងលើក៏តម្រូវផងដែរឲ្យទាញយក App របស់រដ្ឋាភិបាលកូរ៉េខាងត្បូង ដើម្បីធ្វើរបាយការណ៍ស្តីពីរោគសញ្ញាទាក់ទងនឹងវីរុសជាប្រចាំថ្ងៃ។ ដើម្បីធ្វើតេស្តមនុស្សរាប់ពាន់អ្នកដែលអាចជាភ្នាក់ងារចម្លងជំងឺ កូរ៉េខាងត្បូងបានដាក់ឲ្យប្រើបច្ចេកវិទ្យាផ្កាយរណប និងទូរសព្ទដៃ៕
Tag:
កូរ៉េខាងត្បូង
COVID-19
© រក្សាសិទ្ធិដោយ thmeythmey.com
