COVID-19
អន្តរជាតិ
COVID-19៖លោកប្រាយុទ្ធ ប្រាប់ពលរដ្ឋកុំស្លន់ស្លោរ ហើយពុំទាន់ដល់ពេលទិញម្ហូបស្តុកឡើយ លោកប្រាយុទ្ធ ចន្ទអូចា នាយករដ្ឋមន្ត្រីថៃ (AFP)
×
ដោយ៖ គយ រតនបុរិន្ទ
«យើងមិនស្ថិតក្នុងដំណាក់កាលដែលត្រូវស្តុកម្ហូបអាហារនោះទេ»។ នេះជាប្រសាសន៍របស់លោកនាយករដ្ឋមន្ត្រីថៃ ប្រាយុទ្ធ ចន្ទអូចា ក្រោយកិច្ចប្រជុំដើម្បីដោះស្រាយការរាតត្បាតជំងឺ COVID-19 នៅក្នុងប្រទេស។ ទន្ទឹមនេះ ប្រមុខដឹកនាំរូបនេះ ក៏បានស្នើឲ្យប្រជាពលរដ្ឋស្ងប់ចិត្ត ក្រោយពេលប្រជាពលរដ្ឋសម្រុកទៅទិញម្ហូបអាហារ និងសម្ភារចាំបាច់ស្តុកទុកដោយស្លន់ស្លោដោយសារ COVID-19។
លោកនាយករដ្ឋមន្ត្រី ប្រាយុទ្ធ កាលពីថ្ងៃអាទិត្យទី១៥ ខែមីនា បានមានប្រសាសន៍ថា វិធានការបន្ថែមមួយចំនួនត្រូវបានដាក់ឲ្យអនុវត្តរួមមាន កម្មវិធីទូរសព្ទដៃដែលទើបនឹងបង្កើតដើម្បីតាមដានស្ថានការណ៍។ ចំណែកឯ ក្រុមហ៊ុនអាកាសយានដ្ឋានថៃក៏បានដាក់ផងដែរនូវកម្មវិធីទូរសព្ទសម្រាប់អ្នកដំណើរមកដល់ ដើម្បីទាក់ទងរដ្ឋាភិបាលក្នុងករណីដែលអ្នកដំណើរសង្ស័យថាឆ្លងជំងឺ។ បន្ថែមពីនេះ ផែនទីអនឡាញ ក៏ត្រូវបានបង្កើតផងដែរដើម្បីតាមដានស្ថានការណ៍វីរុសទូទាំងប្រទេស។ នេះតាមការចុះផ្សាយរបស់កាសែត បាងកកប៉ុស្តិ៍។
កាលពីថ្ងៃអាទិត្យ លោកប្រាយុទ្ធបានបើកកិច្ចប្រជុំជាមួយមជ្ឈមណ្ឌលប្រយុទ្ធនឹងវីរុស ដើម្បីបង្កើនទំនុកចិត្តរបស់សាធារណៈផង និងស្វែងរកវិធានការដើម្បីដោះស្រាយកង្វះខាតម៉ាស់ និងប្រព័ន្ធតាមដាន។ ទាក់ទងនឹងបញ្ហាម៉ាស់នេះផងដែរ លោក Vichai Pohanakit អគ្គនាយកនៃនាយកដ្ឋានពាណិជ្ជកម្មអន្តរជាតិត្រូវបានផ្ទេរមកកាន់ខុទ្ទកាល័យនាយករដ្ឋមន្ត្រីក្រោយពីលោកមិនអាចដោះស្រាយការបំប៉ោងតម្លៃ និងកង្វះខាតម៉ាសបាន។
ម្យ៉ាងទៀត រដ្ឋាភិបាលថៃគ្រោង នឹងប្រើប្រាស់មន្ទីពេទ្យដែលទើបសាងសង់រួចដើម្បីដាក់អ្នកជំងឺ COVID-19 និងដាក់ជំងឺនេះក្នុងបញ្ជីសង្គ្រោះបន្ទាន់សម្រាប់អ្នកជំងឺដែលស្ថិតក្រោម ផែនការសុខភាពសកល ( Universal Health Care Scheme)។ ការដាក់ COVID-19 ចូលក្នុងបញ្ជីនេះអនុញ្ញាតឲ្យអ្នកឆ្លងជំងឺទទួលបានការព្យាបាលពីមន្ទីពេទ្យរដ្ឋ ឫឯកជនដែលនៅជិតបំផុតក្នុងរយៈពេល ៧២ម៉ោងដោយពុំចាំបាច់ធ្វើដំណើរទៅកាន់មន្ទីពេទ្យដែលពួកគេបានចុះឈ្មោះក្នុងកម្មវិធី។
បន្ថែមពីនេះ រដ្ឋមន្ត្រីក្រសួងសុខាភិបាលថៃ កំពុងពិចារណាបិទទីកន្លែងកម្សាន្តទាំងអស់ ដើម្បីរាំងខ្ទប់ការផ្ទុះការឆ្លងជំងឺ ដូចករណីឆ្លងនៅក្នុងតៀមស្រាកាលពីខែមុន។ លោកប្រាយុទ្ធក៏បាននិយាយផងដែរថា រដ្ឋាភិបាលនឹងស្វែងរកកិច្ចសហការណ៍ជាមួយទីតាំងកម្សាន្តទាំងឡាយណាដែលនៅតំបន់ប្រឈមហានិភ័យខ្ពស់ និងពិចារណាបិទទីតាំងទាំងអស់នោះបើចាំបាច់។ ដោយហេតុតែភាពស្លន់ស្លោ ម្ហូបអាហារដូចជា មី គ្រឿង និងអាហាកំប៉ុងត្រូវបានអស់ពីធ្នើនៅតាមបណ្តាផ្សាទំនើប ខណៈអ្នកលក់មួយចំនួនធំប្រុងប្រៀបក្នុងករណីខ្វះខាត។
គួរបញ្ជាក់ផងដែរថា កាលពីថ្ងៃអាទិត្យថៃបានរាយការណ៍ពីចំនួនអ្នកឆ្លងចំនួន៣២ អ្នកដែលបណ្តាលឲ្យអ្នកឆ្លងសរុបកើនឡើងដល់ ១១៤នាក់។ ថៃបានដាក់ប្រទេសក្នុងដំណាក់កាលទី៣ ដែលជាដំណាក់កាលចម្លងទ្រង់ទ្រាយធំ(mass infection)៕
Tag:
ថៃ
ប្រាយុទ្ធ ចន្ទអូចា
COVID-19
© រក្សាសិទ្ធិដោយ thmeythmey.com