COVID-19
អន្តរជាតិ
មីយ៉ាន់ម៉ា ស្នើថៃឲ្យជួយប្រាប់ពលរដ្ឋខ្លួនកុំត្រឡប់ទៅផ្ទះពេលបុណ្យចូលឆ្នាំខែក្រោយ
ពលករមីយ៉ាន់ម៉ាធ្វើដំណើរទៅស្រុកកំណើតវិញ។ រូបភាព AFP
×![]()
ដោយ: តន ចាន់រិទ្ធារ៉ា
មីយ៉ាន់ម៉ា បានស្នើឲ្យរដ្ឋាភិបាលថៃ ប្រាប់ពលរដ្ឋខ្លួនដែលកំពុងធ្វើការនៅទឹកដីថៃ កុំត្រឡប់ទៅស្រុកវិញអំឡុងពេលបុណ្យចូលឆ្នាំថៃ និងមីយ៉ាន់ម៉ាខែមេសាខាងមុខ។ ការទប់ស្កាត់ការដំណើររបស់មនុស្ស ជាវិធានការមួយដើម្បីទប់ស្កាត់ការរាលដាលជំងឺ COVID-19 ។ នៅថៃមានករណីឆ្លងជិត១៨០ ប៉ុន្តែមីយ៉ាន់ម៉ាមិនទាន់ករណីឆ្លងនៅឡើយទេ។ 
លោក Suchart Pornchaiwisetkul អគ្គនាយកការងាររបស់ថៃ នៅថ្ងៃទី១៧ ខែមីនា និយាយថា មីយ៉ាន់ម៉ា បានស្នើឲ្យរដ្ឋាភិបាលថៃផ្ដល់ដំណឹងទៅកាន់ពលករមីយ៉ាន់ម៉ាដែលកំពុងធ្វើការនៅទឹកដី កុំធ្វើដំណើរទៅកាន់ស្រុកទេសរបស់ខ្លួនខែក្រោយ។ សំណើរបស់មីយ៉ាន់ម៉ា ធ្វើឡើងមួយក្រោយមុនការដល់ពិធីបុណ្យសង្ក្រាន្តរបស់ថៃ និងបុណ្យ Thingyan របស់មីយ៉ាន់ម៉ា ដែលជាពេលពលករចំណាកស្រុកនាំគ្នាទៅផ្ទះសម្បែងវិញ។
ការធ្វើដំណើររបស់ពលករច្រើនសន្ធឹកសន្ធាប់នេះ នាំឲ្យក្ដីបារម្ភពីការរាលដាលជំងឺ COVID-19 ដែលកំពុងអុកឡុកពេញពិភពលោក។ មីយ៉ាន់ម៉ាដែលមិនទាន់ករណីឆ្លងសូម្បីតែមួយនោះ បានចាត់វិធានការច្រើនដូចជាការដាក់នៅដោយឡែកជាដើម។ ដូចនេះ នៅពេលពលករទាំងនោះ ត្រឡប់ទៅផ្ទះវិញ ក៏ត្រូវឆ្លងកាត់វិធានសុខាភិបាលយ៉ាងច្រើន ហើយក៏ត្រូវនៅដោយឡែករយៈពេល១៤ថ្ងៃសិនដែរ។
បើតាមកាសែតបាងកកប៉ុស្តិ៍ លោក Suchart បញ្ជាក់ថា មីយ៉ាន់ម៉ា និងថៃ បានឯកភាពគ្នាលុបចោលសកម្មភាពធ្វើត្រឡប់ទៅស្រុកកំណើតវិញ និងសកម្មភាពឯទៀតអំឡុងពេលចូលឆ្នាំថ្មីនៅខែក្រោយនេះ។ លោកបន្ថែមថា ថៃក៏នៅតែបន្តយកលុយថ្លៃលើការអនុញ្ញាតឲ្យចូលទឹកដីថៃវិញនូវពលករទៅពីកម្ពុជា ឡាវ និងមីយ៉ាន់ម៉ាដដែល។
តាមពិតទៅ ការអបអរពិធីបុណ្យចូលឆ្នាំថ្មីនេះ ត្រូវបានលើកពេលវិញទាំងនៅថៃ និងនៅមីយ៉ាន់ម៉ាដើម្បីទប់ស្កាត់ការរាលដាលជំងឺ COVID-19 ។ នៅថៃ សាលារៀន បារ រោងកុន និងកន្លែងប្រមូលផ្ដុំមួយចំនួន ត្រូវបានបិទផងដែរ។ នៅថៃ ពិធីបុណ្យសង្ក្រានឆ្នាំ២០២០ គ្រោងធ្វើនៅថ្ងៃទី១៣ ដល់ទី១៧ ខែមេសា។
គិតត្រឹមព្រឹកថ្ងៃទី១៧ ខែមីនា ថៃមានករណីឆ្លងសរុប១៧៧នាក់ ដោយក្នុងនោះមានអ្នកស្លាប់ម្នាក់ និងអ្នកសះស្បើយចំនួន៣៦នាក់៕
Tag:
មីយ៉ាន់ម៉ា
ថៃ
COVID-19
© រក្សាសិទ្ធិដោយ thmeythmey.com
