ជាតិ
វត្ថុធាតុដើមជិត១ពាន់កុងតឺន័រពីចិន បានមកដល់កម្ពុជា ខណៈរោងចក្រជាង៥០ បានព្យួរការងារ រូបភាពទំព័រហ្វេសប៊ុករបស់កំពង់ផែស្វយ័តព្រះសីហនុ
× ភ្នំពេញ៖ គិតត្រឹមថ្ងៃទី១៥ ខែមីនា ឆ្នាំ២០២០ មានកប៉ាល់១៣គ្រឿង បានដឹកវត្ថុធាតុដើមជាង៩០០កុងតឺន័រពីចិន ចូលមកដល់កម្ពុជា សម្រាប់ផ្គត់ផ្គង់វិស័យកាត់ដេរ ។
លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជា (GMAC) បានបញ្ជាក់ថា វត្ថុធាតុដើមទាំងនេះ អាចផ្គត់ផ្គង់ដល់រោងចក្របាន៥០ភាគរយ បើចិន ស្ថិតក្នុងស្ថានភាពប្រក្រតីធម្មតាបែបនេះ។
ថ្លែងប្រាប់សារព័ត៌មានថ្មីៗ តាមទូរសព្ទ នៅថ្ងៃទី១៦ ខែមីនា លោក កាំង ម៉ូនីកា បានបញ្ជាក់ដូច្នេះថា៖«ចំពោះវត្ថុធាតុដើមដែលដឹកមកដល់ នៅមិនទាន់ដឹកចែកចាយទៅរោងចក្រព្យួរការងារឬមិនព្យួរនោះទេ។ មកដល់ពេលនេះ មានរោងចក្រចំនួន៥៤បានដាក់ពាក់ព្យួរការងារ ហើយក៏មិនទាន់មានរោងចក្រណាមួយបើកដំណើរការវិញដែរ»។ លោក មិនបានបង្ហើបឡើយថា ក្នុងរោងចក្រទាំង៥៤នោះ មានកម្មករប៉ុន្មាននាក់ ត្រូវព្យួរការងារ។
លោក អាត ធន់ ប្រធានសហភាពការងារកម្ពុជា បានបញ្ជាក់ថា ការនាំចូលវត្ថុធាតុដើមទាំងនេះ គឺអាចជួយដោះស្រាយបានមួយផ្នែកដែរ ។ លោក និយាយថា៖«ខ្ញុំគិតថាការជួយសម្រាលនៃវត្ថុធាតុដើមនេះ គឺអាចជួយបានមួយចំនួនហើយ អាចកាត់បន្ថយបានខ្លះ ប៉ុន្តែវាមិនអាចបានច្រើនទេ ដោយសារតែយើងពិនិត្យមើលធម្មតាកុងតឺន័រដែលមកកម្ពុជា១ខែមានជាង១ម៉ឺនកុងតឺន័រ ហើយឥឡូវបាន១ពាន់កុងតឺន័រប៉ុណ្ណោះ។ ដូច្នេះខ្ញុំគិតថាអាចនៅខ្វះច្រើន ហើយកម្ពុជាខាននាំអីវ៉ាន់ចូលជិត២ខែហើយ អ៊ីចឹងទាល់តែនាំចូលលើសចំនួនធម្មតាដែលនាំចូលបានស្មើនឹងស្ថានភាពដើម»។
លោក កាំង ម៉ូលីកា អះអាងថា បើគ្មានអ្វីប្រែលប្រួលទេនោះ ចិននឹងមានបញ្ជូនវត្ថុធាតុដើម តាមនាវាប្រមាណ១០គ្រឿងទៀត សម្រាប់វិស័យកាត់ដេរនៅកម្ពុជា។
សារព័ត៌មានថ្មីៗមិនអាចសុំការអធិប្បាយពីលោក ហេង សួរ អ្នកនាំពាក្យក្រសួងកាងារ និងបណ្ដុះបណ្ដាលវិជ្ជាជីវៈជុំវិញការបញ្ជូនវត្ថុធាតុដើម និងស្ថានភាពរោងចក្រលើវិស័យកាត់ដេរបានឡើយ ដោយលោក មិនលើកទូរស័ព្ទ៕
Tag:
វត្ថុធាតុដើម
វិស័យកាត់ដេរ
COVID-19
© រក្សាសិទ្ធិដោយ thmeythmey.com