COVID-19
អន្តរជាតិ
ចិនបើកភ្លើងខៀវដល់អ្នកវិទ្យាសាស្ត្រខ្លួនតេស្តវ៉ាក់សាំង COVID-19 លើកដំបូង រូបភាព People's Daily
×
ដោយ៖ គយ រតនបុរិន្ទ
រដ្ឋាភិបាលចិន បានផ្តល់ភ្លើងបៃតងឲ្យអ្នកស្រាវជ្រាវរបស់ខ្លួនចាប់ផ្តើមពិសោធវ៉ាក់សាំង COVID-19 ទៅលើមនុស្ស។ នេះបើយោងតាមទីភ្នាក់ងារព័ត៍មាន Reuters ដែលស្រង់ប្រភពពីបណ្ដាញព័ត៌មានចិន។ ការប្រកាសនេះ ធ្វើឡើងមួយថ្ងៃក្រោយ អាមេរិក បានធ្វើការសាកល្បងវ៉ាក់របស់ខ្លួនលើកដំបូងដូចគ្នាលើអ្នកកើត COVID-19 នៅក្រុង Seattle។
បើតាមការផ្សាយរបស់ទូរទស្សន៍រដ្ឋចិន នៅថ្ងៃទី១៧ ខែមីនា បណ្ឌិតសភាវិទ្យាសាស្ត្រសុខាភិបាលយោធាចិន ដែលជាផ្នែកមួយរបស់កងទ័ពរំដោះប្រជាជនចិន ទទួលការអនុញ្ញាតឲ្យចាប់ផ្តើមការធ្វើតេស្តលើមនុស្សពីសប្តាហ៍នេះទៅ។ ការធ្វើតេស្តនេះស្ថិតនៅក្នុងដំណាក់កាលទីមួយនៅឡើយ ដោយគ្រោងនឹងពិសោធលើមនុស្សដែលមានសុខភាពល្អចំនួន ១០៨នាក់ ចាប់ផ្តើមពីថ្ងៃទី១៦ ខែមីនា ដល់ថ្ងៃទី៣១ ខែធ្នូ។
បណ្ឌិតសភាវិទ្យាសាស្ត្រសុខាភិបាលយោធាចិន និងក្រុមហ៊ុន CanSino Biologics ដែលចុះបញ្ជីនៅទីក្រុងហុងកុង ជាអ្នកទទួលបន្ទុកក្នុងការពិសោធខាងលើនេះ។ នេះបើតាមការផ្សាយរបស់ Reuters ។ អ្នកជំនាញផ្នែកជំងឺឆ្លងរបស់កងទ័ពចិន Chen Wei ដឹកនាំក្រុមគ្រូពេទ្យក្នុងការធ្វើកិច្ចការនេះ។
ចំណែកឯ នៅសហរដ្ឋអាមេរិកវិញ ការពិសោធលើមនុស្សបានចាប់ផ្តើមតាំងតែពីថ្ងៃចន្ទ ១៦ មីនា ដោយមានការចូលរួមពីវិទ្យាស្ថានជាតិ អាលែកស៊ី និងជំងឺឆ្លង និងក្រុមហ៊ុន Moderna នៅក្រុង Seattle។ វ៉ាក់សាំងការពារកូរ៉ូណាវីរុសឈ្មោះ mRNA- 1273 ត្រូវបានវិទ្យាស្ថានសុខាភិបាលអាមេរិក (NIH) ចាក់សាកល្បងលើមនុស្សជាលើកដំបូងនាថ្ងៃទី១៦ ខែមីនា ក្នុងទីក្រុងSeattle។ ចំណែកលទ្ធផលនៃការធ្វើតេស្តលើវ៉ាក់សាំង គេមិនទាន់មានរបាយការណ៍នៅឡើយទេ។
ទាក់ទងនឹងរឿងវ៉ាក់សាំងនេះផងដែរ អ្នកជំនាញរបស់អង្គការសុខភាពពិភពលោកបានលើកឡើងថា គេត្រូវរងចាំដល់ពាក់កណ្តាលឆ្នាំក្រោយទើបវ៉ាក់សាំងដែលកំពុងអភិវឌ្ឍត្រូវបានអនុញ្ញាតឲ្យប្រើប្រាស់ និងមានវត្តមានក្នុងទីផ្សារ៕
© រក្សាសិទ្ធិដោយ thmeythmey.com