COVID-19
អន្តរជាតិ
WHO ដាស់តឿនប្រទេសនៅអាស៊ីអាគ្នេយ៍ឲ្យចាត់វិធានការខ្លាំងក្លាប្រឆាំង COVID-19
អ្នកស្រីវេជ្ជបណ្ឌិត Poonam Khetrapal Singh ប្រធានតំបន់ WHO ទទួលបន្ទុកតំបន់អាស៊ីអាគ្នេយ៍
×![]()
អង្គការសុខភាពពិភពលោក (WHO) ជំរុញឲ្យបណ្ដាប្រទេសក្នុងតំបន់អាស៊ីអាគ្នេយ៍ដាក់ចេញចំណាត់ការខ្លាំងៗក្នុងគោលដៅប្រយុទ្ធប្រឆាំងនឹងការរីកសាយភាពយ៉ាងលឿនរបស់ COVID-19 ។ អង្គការអន្តរជាតិមួយនេះ បានព្រមានថា ប្រទេសខ្លះកំពុងឆ្ពោះទៅរកការឆ្លងរាលដាលនៃជំងឺដ៏កាចសាហាវនេះជាលក្ខណៈសហគមន៍ ដែលផ្ទុះឡើងដំបូងក្នុងប្រទេសចិន។ 
ការឆ្លងរាលដាលនៃ COVID-19 បានហក់ឡើងយ៉ាងគំហុកពាសពេញតំបន់ដែលមានប្រជាជនជាង៦៤០លាននាក់នេះ ក្នុងរយពេលប៉ុន្មានសប្តាហ៍ចុងក្រោយនេះ លើកលែង ឡាវ និងមីយ៉ាន់ម៉ា ដែលពុំបានទាន់រាយការណ៍ពីករណីឆ្លង។ ការណ៍នេះ បានបង្ខំឲ្យប្រទេសមួយចំនួនបានសម្រេចដាក់ចេញចំណាត់ការខ្លាំងៗ រាប់ចាប់ពីការបិទព្រំដែនសម្រាប់ជនបរទេស, រឹតត្បិតការដើរហើរ, បិតសាលារៀន និងលុបចោលព្រឹត្តិការណ៍កីឡា ជាដើម។
ម្យ៉ាងវិញទៀត វាក៏មានកង្វល់លើកឡើងផងដែរពាក់ព័ន្ធនឹងសមត្ថភាពប្រព័ន្ធសុខាភិបាលសាធារណៈក្នុងបណ្ដាប្រទេសក្នុងតំបន់អាស៊ីអាគ្នេយ៍ ដែលនឹងពុំមានលទ្ធភាពទប់ទល់នឹងការរីករាលដាលកាន់តែធំបាន។
ទាក់ទិនរឿងនេះ អ្នកស្រីវេជ្ជបណ្ឌិត Poonam Khetrapal Singh ប្រធានតំបន់ WHO ទទួលបន្ទុកតំបន់អាស៊ីអាគ្នេយ៍ គូសបញ្ជាក់ថា៖«យើងត្រូវបង្កើនកិច្ចប្រឹងប្រែងទាំងអស់ភ្លាមៗ ដើម្បីបង្ការមនុស្សពីការឆ្លង COVID-19 កាន់តែច្រើនថែមទៀត»។ ត្រង់ចំណុចនេះ អ្នកស្រី អះអាងថា ការឆ្លងវីរុសជាចង្កោមកាន់តែច្រើន កំពុងត្រូវបានរកឃើញ។
លោកស្រី Singh លើកឡើងទៀតថា ខណៈការរកឃើញបែបនេះ គឺជាសូចនាករមួយនៃភាពប្រុងជើងការ និងប្រសិទ្ធភាពនៃការតាមដានដិតដល់ វាក៏ជាសញ្ញាមួយដែលតម្រូវមានកិច្ចប្រឹងប្រែងខ្លាំងជាងមុន និងការចូលរួមពីសំណាក់សង្គមទាំងមូលក្នុងគោលដៅបង្ការការរាលដាល COVID-19 ធំជាងនេះ។ តាមការចុះផ្សាយរបស់ទីភ្នាក់ងារព័ត៌មាន AFP អ្នកស្រីប្រធាន សង្កត់ធ្ងន់ថា៖«ច្បាស់ណាស់ យើងត្រូវការចាត់ចំណាត់ការបន្ថែមទៀត និងបន្ទាន់បំផុត»។
ឆ្លៀតក្នុងឱកាសនេះដែរ អ្នកស្រី Singh គូសបញ្ជាក់ថា វិធានការសាមញ្ញ ដូចជា លាងសម្អាតដៃ និងគម្លាតពីគ្នា (Social Distancing) គឺពិតជាមានសារសំខាន់បំផុតសម្រាប់ប្រយុទ្ធប្រឆាំងនឹងជំងឺ COVID-19 និងអាចកាត់បន្ថយការឆ្លងរាលដាលយ៉ាងធំធេងផងដែរ។
សូមបញ្ជាក់ថា ការដាស់តឿនរបស់អង្គការសុខភាពពិភពលោកនេះ ធ្វើឡើងក្រោយពីប្រទេសម៉ាឡេស៊ី បានក្លាយជាប្រទេសដែលមានតួលេខអ្នកឆ្លង COVID-19 ច្រើនបំផុតក្នុងតំបន់អាស៊ីអាគ្នេយ៍ ដោយមាន៦៧៣ករណី។ ភាគច្រើននៃអ្នកជំងឺក្នុងប្រទេសនេះគឺជាប់ពាក់ព័ន្ធនឹងព្រឹត្តិការណ៍សាសនាឥស្លាមមួយ ដែលបានរៀបចំឡើងកាលពីចុងខែមុន និងមានចូលរួមជាង១៦០០០នាក់។
កាលពីថ្ងៃចន្ទដើមសប្តាហ៍នេះ រដ្ឋាភិបាលម៉ាឡេស៊ី នឹងដាក់បម្រាមប្រជាជនខ្លួនពីការចេញដំណើរទៅក្រៅប្រទេស និងជនបរទេសពីការចូលទៅក្នុងប្រទេសម៉ាឡេស៊ី រយៈពេល២សប្តាហ៍ ដែលចូលជាធរមាននាពីថ្ងៃពុធ ទី១៨ ខែមីនាតទៅ។ ហើយកាលពីថ្ងៃអង្គារម្សិលមិញ ម៉ាឡេស៊ី ក៏បានប្រកាសពីករណីស្លាប់ដោយសារ COVID-19 ចំនួន២នាក់ដំបូងរបស់ខ្លួនផងដែរ ក្នុងនោះម្នាក់គឺជាអ្នកចូលរួមក្នុងព្រឹត្តិការណ៍សាសនា។
ពលរដ្ឋប្រទេសក្នុងតំបន់អាស៊ីអាគ្នេយ៍៍មួយចំនួន ដូចជា សិង្ហបុរី ថៃ និងកម្ពុជា គឺសុទ្ធតែរងគ្រោះដោយសារព្រឹត្តិការណ៍ក្នុងប្រទេសម៉ាឡេស៊ីនេះ។ គិតមកត្រឹមថ្ងៃពុធ ១៨ ខែមីនា កម្ពុជាបានរកឃើញអ្នកឆ្លងថ្មីដល់ជាង៣០នាក់ហើយ ដែលក្នុងនោះជិត២០នាក់ គឺជាខ្មែរឥស្លាមដែលបានទៅចូលរួមព្រឹត្តិការណ៍សាសនានេះ។
សូមបញ្ជាក់ថា គិតមកទល់ថ្ងៃពុធនេះ ម៉ាឡេស៊ី មានអ្នកឆ្លង ៦៧៣នាក់ ខណៈស្លាប់ ២នាក់, សិង្ហបុរីមានអ្នកឆ្លង២៦៦នាក់, ហ្វីលីពីនមានអ្នកឆ្លង១៨៧នាក់ ខណៈអ្នកស្លាប់១៤នាក់, ថៃមានអ្នកឆ្លង១៧៧នាក់ ខណៈអ្នកស្លាប់ម្នាក់, ឥណ្ឌូណេស៊ី មានអ្នកឆ្លង១៧២នាក់ ខណៈអ្នកស្លាប់៧នាក់, វៀតណាមមានអ្នកឆ្លង ៦០នាក់, ព្រុយណេមានអ្នកឆ្លង ៥៤នាក់, កម្ពុជាមានអ្នកឆ្លង ៣៥នាក់។ ដោយឡែក ឡាវ និងមីយ៉ាន់ម៉ា ពុំទាន់រកឃើញអ្នកឆ្លង៕
Tag:
WHO
អាស៊ីអាគ្នេយ៍
COVID-19
© រក្សាសិទ្ធិដោយ thmeythmey.com
