COVID-19
ជាតិ
លោក ហ៊ុន ម៉ានី៖«មិនគួរបណ្តោយឱ្យCovid-19 ផ្លាស់ប្តូរជីវិតយើងទាំងស្រុងនោះទេ»
×![]()
ដោយ: ថ្មីៗ
ចំនួននៃអ្នកផ្ទុកជំងឺ Covid-19 បានបន្តកើនឡើង។ រដ្ឋាភិបាល និងក្រសួងពាក់ព័ន្ធ កំពុងបន្តចាត់វិធានការការពារ និងទប់ស្កាត់ការរីករាលដាលនៃជំងឺនេះ។ អ្នកតំណាងរាស្ត្រ ហ៊ុន ម៉ានី បានបង្ហាញកង្វល់ចំពោះស្ថានការណ៍នេះ តែបានរំឭកប្រជាពលរដ្ឋមិនឱ្យនាំការបារម្ភរបស់ខ្លួនរហូតដល់ការភ័យខ្លាចគ្នា។
ចំពោះមុខនៃការឆ្លងរាលដាលនៃជំងឺ Covid-19 ដែលកម្ពុជាកំពុងរងប៉ះពាល់ដែរនោះ លោក ហ៊ុន ម៉ានី ប្រធានគណៈកម្មការទី៧នៃរដ្ឋសភា បានយល់អំពីអារម្មណ៍ខ្វាយខ្វល់របស់ប្រជាពលរដ្ឋដែលកំពុងព្រួយបារម្ភអំពីសុវត្ថិភាពផ្ទាល់ខ្លួន និងសមាជិកគ្រួសាររបស់ពួកគេ។ តាមរយៈគណនីហ្វេសប៊ុករបស់លោក លោក ហ៊ុន ម៉ានី លើកទឹកចិត្តឱ្យប្រជាពលរដ្ឋបន្តការយកចិត្តទុកបែបនេះបន្តទៀត។
ប៉ុន្តែមានចំណុចមួយដែលអ្នកតំណាងរាស្ត្ររូបនេះចង់ទាញចំណាប់អារម្មណ៍សាធារណជន។ គឺការភ័យខ្លាចពេក រហូតដល់ឈានដល់ការរើសអើង។
នៅក្នុងសាររបស់លោក ហ៊ុន ម៉ានី គេអាចអានឃ្លានេះ៖«ទោះជាយ៉ាងណាក្តី យើងមិនគួរបណ្ដោយឱ្យបញ្ហានេះមកផ្លាស់ប្តូរជីវិតរបស់យើងទាំងស្រុងនោះដែរ ជាពិសេសការបែរមកខ្លាចគ្នា និងឈានដល់ការរើសអើងគ្នា។ យើងជាជាតិសាសន៍ដែលនឹងមិនធ្វើដូច្នេះឡើយ។»។
ប្រធានសហភាពសហព័ន្ធយុវជនកម្ពុជាបានបញ្ជាក់ថា«យើងនឹងឆ្លងផុតគ្រាលំបាកនេះ ជាមួយគ្នា» ដោយពុំបានភ្លេចផ្តល់សារគាំទ្រ និងលើកទឹកចិត្តគ្រូពេទ្យដែលត្រូវបានចាត់ទុកថា ក្រុមកងទ័ពជួរមុខកំពុងប្រយុទ្ធនឹងជំងឺ Covid-19 នេះ តាមរយៈការព្យាបាលអ្នកជំងឺគ្រប់ជាតិសាសន៍៕
© រក្សាសិទ្ធិដោយ thmeythmey.com
