ជាតិ
វីដេអូ
×![]()
កំពង់ធំ៖ លោក ខឿន ខួច ជាកសិករធ្វើស្រែ នៅក្នុងខេត្តកំពង់ធំ។ កសិករ ខឿន ខួច បានប្រើប្រាស់ដ្រូនកសិកម្ម ដើម្បីស្រោចស្រពដំណាំស្រូវដែលខ្លួនដាំដុះលើផ្ទៃដីជាង ៥០ហិកតា រយៈពេល១ឆ្នាំមកហើយ។ កសិកររូបនេះ អះអាងថា ការប្រើប្រាស់ដ្រូនកសិកម្ម បានសម្រាលការនឿយហត់របស់លោកបានយ៉ាងច្រើន ជាពិសេសបន្ថយចំណាយបានច្រើនលើការប្រើជី និងថ្នាំ មិនប៉ះពាល់ដល់សុខភាព ហើយថែមទាំងចំណេញពេលវេលា និងទិន្នផលស្រូវបានខ្ពស់ទៀតផង។
ដើម្បីជ្រាបច្បាស់ សូមអញ្ជើញទស្សនាបទសម្ភាសរវាងកញ្ញា ញឹក ស្រីល័ក្ខ អ្នកសារព័ត៌មានថ្មីៗ ជាមួយ កសិករ ខឿន ខួច ដូចតទៅ៖
ដ្រូនកសិកម្ម ជាឧបករណ៍ទំនើប ដែលជួយសម្រាលទុក្ខលំបាករបស់ប្រជាកសិករ។ ដ្រូនកសិកម្ម ត្រូវបានដំឡើងដោយក្រុមអ្នកជំនាញកសិកម្ម និងបច្ចេកវិទ្យា ដែលមានលោក ឡេង សុខលី ជាប្រធាន។ ឧបករណ៍នេះ អាចប្រើសម្រាប់បាញ់ថ្នាំសម្លាប់សត្វល្អិត ឬជី លើដំណាំច្រើនប្រភេទ។
ដើមឡើយកសិករ ខឿន ខួច ប្រើកម្លាំងកម្មករ ដើម្បីបាចជី និងបាញ់ថ្នាំ សម្លាប់សត្វល្អិតលើដំណាំស្រូវ។ ក្រោយទទួលបានព័ត៌មានពីការប្រើប្រាស់ដ្រូនកសិកម្ម សម្រាប់បាញ់ថ្នាំសម្លាប់សត្វ និងបាចជី លោក ខឿន ខួច ដែលជាកសិករធ្វើស្រែជាង ៥០ហិកតា ក៏បានងាកមកប្រើប្រាស់ដ្រូនកសិកម្មវិញ។ កសិករនៅខេត្តកំពង់ធំរូបនេះ រៀបរាប់ពីផលចំណេញនៃការប្រើប្រាស់ដ្រូនកសិកម្មយ៉ាងដូច្នេះ៖«ខ្ញុំចាប់ផ្ដើមប្រើប្រាស់ដ្រូននេះ គឺចំណេញពេលវេលា,ចំណេញថវិកា,ចំណេញជី ឬថ្នាំ,ចំណេញទឹក និងមិនប៉ះពាល់ដល់សុខភាព»។
ឈរនៅលើដីស្រែរបស់ខ្លួន កសិករ ខឿន ខួច បន្ថែមទាំងត្រេកអរថាការប្រើដ្រូនកសិកម្ម មានតម្លៃធូរជាងការជួលកម្លាំងកម្មករ ហើយលោកមិនខកចិត្តទាល់តែសោះ តាំងពីចាប់ផ្តើមប្រើឧបករណ៍ទំនើបមួយនេះ។ លោក ខឿន ខួច បន្ថែមថា៖«អ្វីដែលខ្ញុំសប្បាយបំផុតនៅពេលនេះ ខ្ញុំងាកមកប្រើលើដ្រូននេះឯង។ ខ្ញុំសប្បាយចិត្តណាស់ ព្រោះខ្ញុំមិនពិបាកដើររកកម្មករ និងទាន់ពេលវេលាល្អ»៕
Tag:
ដ្រូនកសិកម្ម
ស្រូវ
© រក្សាសិទ្ធិដោយ thmeythmey.com
