សម្ភារការពារនិង ឧបករណ៍វេជ្ជាសាស្ត្រដែលជាអំណោយរបស់មហាសេដ្ឋីចិន ជេក ម៉ា បានទៅដល់រដ្ឋធានី អាឌីសអាបេបា របស់ប្រទេសអេត្យូពី កាលពីថ្ងៃអាទិត្យ ២២មីនាកន្លងទៅ។
ទ្វីបអាហ្វ្រិកដែលមាន ប្រជាជន ១.៣ពាន់លាននាក់ ទើបតែមានករណី COVID-19ចំនួន ១,១០០ ករណី នៅបណ្តាប្រទេសចំនួន៤៣ ប៉ុណ្ណោះ ដោយមានករណីស្លាប់ចំនួន៣៩ ករណី។
បើទោះបីជាចំនួននេះ នៅតិចក៏ដោយ គេមានការព្រួយបារម្ភដោយហេតុថាហេដ្ឋារចនាសម្ព័ន្ធសុខាភិបាលរបស់បណ្តាប្រទេសនៅទ្វីបអាហ្វ្រិកមានសភាពលំបាកនៅឡើយ និងមិនអាចទប់ទល់ COVID-19បានឡើយបើសិនជាមានករណីផ្ទុះជំងឺ។
សេចក្តីប្រកាសព័ត៍មានរបស់ មូលនិធិ ជេក ម៉ា ម៉ាស់ចំនួន ៥,៤លានសន្លឹក ឧបករណ៍ធ្វើតេស្តចំនួន១,០៨លានសម្រាប់ និងឧបករណ៍ការពារមុខចំនួន ៦០,០០០សម្រាប់ និងសម្លៀកបំពាក់ការពារចំនួន ៤០,០០០សម្រាប់ ត្រូវបានបញ្ជូនទៅកាន់អាហ្វ្រិក។ សម្ភារៈទាំងអស់នេះនឹងត្រូវចែកចាយទៅតាមបណ្តាប្រទេសទាំងអស់ក្នុងទ្វីបអាហ្វ្រិក និងទៅប្រទេសដែលងាយរងគ្រោះដោយការផ្ទុះជំងឺដំបូងបំផុត។
នៅតាមបណ្តាញសង្គម Twitter លោក Abiy Ahmed នាយករដ្ឋមន្ត្រីអេត្យូពី បានឲ្យដឹងថា សម្ភារទាំងអស់នោះនឹងត្រូវបែងចែកចាប់ពីថ្ងៃចន្ទនេះ។ រដ្ឋមន្ត្រីសុខាភិបាលអេត្យូពីអះអាងថាប្រដាប់ធ្វើតេស្តទាំងនោះមានសារៈសំខាន់ណាស់ដើម្បីគ្រប់គ្រងការផ្ទុះរីកសាយនៃជំងឺ។
សូមបញ្ជាក់ផងដែរថា ប៉ុន្មានថ្ងៃចុងក្រោយនេះ ប្រទេសនៅតាមបណ្តាទ្វីបអាហ្វ្រិកបានចាត់វិធានការតឹងតែងក្នុងការធ្វើដំណើរ និងបិទទីតាំងសាធារណៈ។ អង្គការសុខភាពពិភពលោក បានរៀបចំផែនការដំឡើងមន្ទីរពេទ្យ ដែលភ្ជាប់ជាមួយនឹងប្រព័ន្ធខ្យល់ និងអុកស៊ីសែន។
ដោយឡែក នៅប្រទេសកេនយ៉ា ដែលមាន COVID-19ចំនួន ១៥ ករណី រដ្ឋាភិបាលបានហាមមិនឲ្យមានការជួបជុំបែបសាសនា ឫសង្គមឡើយ ហើយកំណត់ឲ្យអ្នកចូលរួមបុណ្យសពមានត្រឹមតែ១៥នាក់ប៉ុណ្ណោះ ខណៈការហោះហើរអន្តរជាតិ និងត្រូវបិទចាប់ពីថ្ងៃទី២៥ ខែមីនាតទៅ
រីឯ ប្រទេស ម៉ូសំប៊ិកវិញបានប្រកាសពីករណី COVID-19លើកតំបូងកាលពីថ្ងៃអាទិត្យ។ ខណៈប្រទេស ម៉ាដាហ្គាស្កា និង លីបេរីយ៉ា បានប្រកាសអាសន្នសុខភាពសាធារណៈកាលពីចុងសប្តាហ៍មុន។
ចំណែកឯប្រទេស បូគីណាហ្វាសូ វិញជាប្រទេសដែលមានករណី COVID-19 ច្រើនបំផុតដល់ទៅ ៧៥ករណី ក្នុងនោះរួមមានរដ្ឋមន្ត្រី៤រូបផងដែរ។ ប្រទេសសូម៉ាលី បានសម្រេចបើកអាកាសយានដ្ឋានអន្តរជាតិរបស់ខ្លួនរយៈពេល២ថ្ងៃ ដើម្បីឲ្យពលរដ្ឋអាចត្រឡប់ចូលស្រុកវិញពីប្រទេស១៤ ដែលរងគ្រោះដោយការឆ្លង។ ប៉ុន្តែពួកគេ នឹងត្រូវដាក់ឲ្យនៅដាច់ដោយឡែក ពេលមកដល់ នេះជាការថ្លែងរបស់អ្នកនាំពាក្យរដ្ឋាភិបាលសូម៉ាលី៕