ពីនេះ ពីនោះ
រូបត្លុក
COVID-19៖ បិទ ឬមិនបិទ? ជម្រើសដ៏លំបាករវាងសុខភាពមនុស្ស និងសុខភាពសេដ្ឋកិច្ច…!
×![]()
ដោយ: ថ្មីៗ
សុធីរ និងសំណាង ខានមិនសូវបានទៅផឹកកាហេ្វជាមួយគ្នាឡើយ ព្រោះ ទាំងពីរគ្នាប្រកាន់ខ្ជាប់បណ្តាំគ្រូពេទ្យដែលថា ស្ថិតឲ្យនៅឆ្ងាយពីគ្នា (Physical distancing or social distancing)ដើម្បីកាត់បន្ថយការរាតត្បាតមេរោគកូវីដ១៩។ ទោះជាយ៉ាងនេះក្តី សុធីរ និងសំណាង នៅតែបន្តតាមដានទាំងយប់ទាំងថ្ងៃការវិវត្តនៃមេរោគមួយនេះ។ រឿងសំខាន់ដែល សុធីរ និងសំណាង បន្តជជែកគ្នាតាម Messenger នៅថ្ងៃនេះ គឺថា តើរដ្ឋាភិបាលនៃប្រទេសនីមួយៗត្រូវប្រកាន់ជម្រើសមួយណារវាងសុខភាពមនុស្ស និងសុខភាពសេដ្ឋកិច្ច? 
សំណាង៖ អា សុធីរ! ដើម្បីកុំឲ្យមេរោគហ្នឹងវាឆ្លងកាន់តែច្រើន តើហេតុអ្វីគេមិនបិទគ្រប់ទំនាក់ទំនងមនុស្ស គ្រប់ការចរាចរណ៍ មនុស្ស និងគ្រប់សកម្មភាពសេដ្ឋកិច្ចតែម្តងទៅ?
សុធីរ៖ អា សំណាង! បើបិទភ្លាម ហើយបិទទាំងអស់ វាមិនងាប់ទៅហើយទេអី! ងាប់នឹងអត់អីស៊ីហ្នឹងតែម្តង។ បិទទាំងអស់ មានន័យថា បិទដំណើរការសេដ្ឋកិច្ចទាំងមូល។ បើបិទទាំងអស់ គឺស្មើ នឹងសម្លាប់សេដ្ឋកិច្ច។
សំណាង៖ ចុះអញលឺថា នៅអឺរ៉ុប គេប្រកាសឲ្យប្រជាជនឃុំខ្លួនឯងនៅក្នុងផ្ទះ កុំចេញក្រៅ។ ហាងមួយចំនួនត្រូវបិទទ្វារ។ល។
សុធីរ៖ អា សំណាង! អ្ហែងត្រូវមើលព័ត៌មានឲ្យច្បាស់ណា៎! ប្រទេសមួយចំនួន ដូចជា ប្រទេសបារាំង ឬអង់គ្លេស និងប្រទេសដទៃទៀត គេប្រកាសឲ្យបុគ្គលមិនចាំបាច់ត្រូវស្ថិតនៅផ្ទះ និងប្រកាសបិទតែសកម្មភាពសេដ្ឋកិច្ចណាដែលមិនចាំបាច់ ដូចជាហាងកម្សាន្ត ហាងផឹកស៊ី ហាងធម្មតា ទៅដើរកម្សាន្តនៅមាត់សមុទ្រ។ល។ មិនមែនគេប្រកាសឲ្យបិទសហគ្រាសទូទៅទេ។ នៅប្រទេសបារាំង ផ្សារទំនើបធំៗ ឱសថស្ថាន សហគ្រាសនៅបន្តបើកឲ្យដំណើការធម្មតាទេ។ និយាយយជារួម សកម្មភាពសេដ្ឋកិច្ចណាមិនចាំបាច់ គេប្រកាសឲ្យបិទ តែសកម្មភាពសេដ្ឋកិច្ចណាចាំបាច់ ជាជន្ទុលសេដ្ឋកិច្ច គឺនៅដំណើរការដដែលសិន។
សំណាង៖ ចុះនៅកម្ពុជាវិញ?
សុធីរ៖ នៅកម្ពុជា រដ្ឋាភិបាលប្រកាសឲ្យបិទសាលារៀន ខារ៉ាអូខេ ហាងកម្សាន្តមួយចំនួនដែរ។ តែហាងទូទៅ សហគ្រាស ឬក្រុមហ៊ុន មិនទាន់តម្រូវឲ្យបិទទេ។ ប្រហែលជារដ្ឋាភិបាលនៅបន្តមើលការវិវត្តមេរោគមួយនេះសិន។
សំណាង៖ ចុះកន្លែងទាំងនោះ(រោងចក្រ ក្រុមហ៊ុន សហគ្រាស) មិនមែនជាទីតាំងចម្លងមេរោគ កូវីដ ១៩ទេឬ?
សុធីរ៖ វាអាចទីតាំងចម្លងដែរ។ ប៉ុន្តែ វាទាក់ទងទៅនឹងសកម្មភាពសេដ្ឋកិច្ច ទាក់ទងទៅនឹងសរសៃឈាមសេដ្ឋកិច្ច។ ប្រសិនបើរដ្ឋាភិបាលប្រកាសឲ្យបិទទាំងអស់ វាស្មើនឹងការសម្លាប់សេដ្ឋកិច្ចទាំងមូល ដូច្នេះហើយ ទើបរដ្ឋាភិបាលចាត់វិធានការដោយប្រយ័ត្នប្រយែងបំផុត រវាងសុខភាពមនុស្សជាតិ និងសុខភាពសេដ្ឋកិច្ច។ ចាត់វិធានការស្រួលមិនស្រួល មនុស្សអត់ចំណូល អត់អ្វីហូប ដោយសារគ្រប់គ្នាគ្មានការងារធ្វើហ្នឹងណា៎។
សំណាង៖ បើអញស្តាប់អ្ហែង រឿងនេះមិនងាយស្រួលទេវើយ!
សុធីរ៖ អើ! រឿងនិយាយវាស្រួលទេ សុំឲ្យបិទអានេះ បិទអានោះ។ បិទមិនពិបាកទេ រឿងដែលពិបាក គឺក្រោយបិទ។ បិទមានន័យថា លែងឲ្យមានផលិតកម្មអ្វីទាំងអស់។ បើបិទ មានន័យថា មនុស្សទាំងអស់អត់ការងារធ្វើ ទាំងអស់គ្នាអត់លុយ។ ក្រុមហ៊ុនអត់លុយ។ រដ្ឋក៏អស់លុយ។ ហើយនៅទីបញ្ចប់ សេដ្ឋកិច្ចគាំងតែម្តង។ ចំណុចនេះហើយ ដែលអ្នកសេដ្ឋកិច្ច អ្នកនយោបាយ និងអ្នកជំនាញវេជ្ជសាស្ត្រ នៅមិនទាន់សម្រេចថា តើត្រូវដើរផ្លូវណា! តែអ្វីដែលអាចធ្វើបាននៅពេលនេះ គឺប្រកាសបិទគ្រប់សកម្មភាពជំនួញណាដែលមិនចាំបាច់តែប៉ុណ្ណោះ៕
© រក្សាសិទ្ធិដោយ thmeythmey.com
