COVID-19
អន្តរជាតិ
លោក ប្រាយុទ្ធ ប្រកាសដាក់ «ថៃក្នុងភាពអាសន្ន» ដើម្បីប្រយុទ្ធ COVID-19 លោកនាយករដ្ឋមន្ត្រី ប្រាយុទ្ធ ចន្ទអូចា (ទូរទស្សន៍ថៃ PBS World)
× រដ្ឋាភិបាលថៃ នឹងប្រកាសដាក់រដ្ឋក្នុងភាពអាសន្ន នាថ្ងៃព្រហស្បតិ៍ ទី២៦ ខែមីនាខាងមុខ។ លោកនាយករដ្ឋមន្ត្រី ប្រាយុទ្ធ ចន្ទអូចា បញ្ជាក់បែបនេះ ដោយបន្ថែមថា វិធានការថ្មីៗមួយចំនួនដើម្បីប្រយុទ្ធប្រឆាំងនឹងជំងឺផ្លូវដង្ហើម COVID-19 ក៏នឹងត្រូវដាក់ចេញនាថ្ងៃជាមួយគ្នាផងដែរ។
ថ្លែងលើកញ្ចក់ទូរទស្សន៍ពីវិមានរដ្ឋាភិបាលថៃ ឧត្តមសេនីយ៍ ប្រាយុទ្ធ ចន្ទអូចា បញ្ជាក់ថា ការអនុម័តនៃព្រះរាជក្រឹត្យស្តីពីស្ថានភាពអាសន្នឆ្នាំ ២០០៥ គឺជារឿងចាំបាច់ដើម្បីទប់ទល់ជំងឺរាតត្បាត COVID-19 ដែលសម្លាប់ប្រជាជនថៃអស់៤នាក់ហើយ។
ការដាក់រដ្ឋក្នុងភាពអាសន្នបែបនេះ ផ្ដល់អំណាចធំធេងដល់នាយករដ្ឋមន្ត្រី ប្រាយុទ្ធ ក្នុងការអនុវត្តគោលនយោបាយនានាក្នុងគោលដៅប្រយុទ្ធនឹងជំងឺ COVID-19 តាមរយៈគណៈកម្មាធិការមួយ។ បើតាមប្រមុខរដ្ឋាភិបាលរូបនេះ គណៈកម្មាធិការនេះ នឹងត្រូវបង្កើតឡើងដើម្បីអនុវត្ត និងតាមដានស្ថានការណ៍ COVID-19 ប្រចាំថ្ងៃ។
យ៉ាងណាមិញ លោក ប្រាយុទ្ធ អះអាងថា វិធានការជាក់លាក់មួយចំនួនទៀត នឹងត្រូវប្រកាសលម្អិតនាពេលក្រោយ ។ ទាក់ទិននឹងចំណាត់ការថ្មីដែលគ្រោងដាក់ចេញនេះ លោក ប្រាយុទ្ធ បង្ហើបថា ចំណាត់ការខ្លះ នឹងជាការស្នើសុំសម្រាប់កិច្ចសហប្រតិបត្តិការពីពលរដ្ឋ ហើយខ្លះទៀត នឹងមានលក្ខណៈចាប់បង្ខំឲ្យគោរព និងអនុវត្តតាម។
បើតាមកាសែត បាងកកប៉ុស្តិ៍ លោកប្រាយុទ្ធ សង្កត់ធ្ងន់ថា៖«ប្រសិនបើស្ថានការណ៍ ពុំធូរស្រាលទេនោះ វានឹងមានការបិទប្រទេសទាំងស្រុង»។ អំឡុងការដាក់ប្រទេសក្នុងភាពអាសន្នបែបនេះ លោកនាយករដ្ឋមន្ត្រីរូបនេះ បានព្រមានថា ពលរដ្ឋថៃ ត្រូវតែប្រុងប្រយ័ត្នចំពោះអ្វីដែលពួកគេបង្ហោះ ឬចែករំលែកលើបណ្ដាញសង្គម ហើយអ្នកដែលល្មើស នឹងត្រូវចាប់ខ្លួន និងកាត់ទោស។
អំឡុងពេលការដាក់ប្រទេសក្នុងភាពអាសន្ននេះ អ្នកលក់ដូរដែលដំឡើងថ្លៃទំនិញដោយឥតហេតុផល ក៏នឹងត្រូវរងពិន័យផងដែរ។ លោក ប្រាយុទ្ធ អះអាងបែបនេះ ដោយថា ការដាក់ប្រទេសក្នុងភាពអាសន្ននេះ នឹងចូលជាមានចាប់ពីថ្ងៃ ២៦ ខែមីនា រហូតដល់ថ្ងៃ ៣០ ខែមេសា ។
សូមបញ្ជាក់ថា គិតមកត្រឹមថ្ងៃអង្គារ ២៤ ខែមីនា ប្រទេស បានរកឃើញករណីឆ្លង COVID-19 ចំនួន ៨២៧ករណី, អ្នកស្លាប់ ៤នាក់ និងអ្នកជាសះស្បើយ ៥២នាក់៕
Tag:
ថៃ
ប្រាយុទ្ធ ចន្ទអូចា
COVID-19
© រក្សាសិទ្ធិដោយ thmeythmey.com