COVID-19
កីឡាអន្តរជាតិ
អន្តរជាតិ
អូឡាំពិកក្រុងតូក្យូ នឹងចាប់ផ្តើមពីថ្ងៃទី២៣ ខែកក្កដា ឆ្នាំ២០២១
× ការប្រកួតកីឡាអូឡាំពិកទីក្រុងតូក្យូ នឹងចាប់ផ្តើមនៅថ្ងៃទី ២៣ ខែកក្កដាឆ្នាំ ២០២១ រហូតដល់ថ្ងៃទី៨ ខែសីហា បន្ទាប់ពីត្រូវបានពន្យាពេលរយៈពេលមួយឆ្នាំ ដោយសារវិបត្តិជំងឺឆ្លង COVID-19។
ការសម្រេចនេះធ្វើឡើយ បន្ទាបពីក្រុមប្រឹក្សាប្រតិបត្តិរបស់គណៈកម្មាធិការអូឡាំពិកអន្តរជាតិ (IOC) បានជួបប្រជុំគ្នានៅថ្ងៃទី៣០ ខែមីនា។ បើទោះត្រូវពន្យារដល់ឆ្នាំ ២០២១ ក្តី ប៉ុន្តែព្រឹតិ្តការណ៍អូឡាំពិកដែលជប៉ុនធ្វើម្ចាស់ផ្ទះនេះ នឹងនៅតែហៅថាកីឡាអូឡាំពិកក្រុងតូក្យូឆ្នាំ ២០២០ ដដែល។
«ខ្ញុំជឿជាក់ថា ការធ្វើការរួមគ្នាជាមួយគណៈកម្មាធិការរៀបចំកីឡាក្រុងតូក្យូឆ្នាំ ២០២០ និងទីក្រុងតូក្យូ ជាពិសេសរដ្ឋាភិបាលជប៉ុន យើងពិតជាអាចដោះស្រាយបញ្ហាប្រឈមដែលមិនធ្លាប់នេះបាន។ ពិភពលោកកំពុងស្ថិតក្នុងភាពងងឹតដោយសារជំងឺរាតត្បាតដ៏សាហាវ ដូចច្នេះអូឡាំពិកអូឡាំពិកឆ្នាំ ២០២០ អាចជាពន្លឺមួយនៅចុងបញ្ចប់នៃភាពងងឹតផែនដីនេះ។ លោក Thomas Bach ប្រធាន IOC លើកឡើងដូច្នេះ។
ដោយសារជំងឺឆ្លងបង្កដោយកូរ៉ូណាប្រភេទថ្មី (COVID-19) រីករាលដាលខ្លាំងជុំវិញពិភពលោក និងសម្លាប់មនុស្សជាច្រើន ទើបជប៉ុន និង IOC សម្រេចគ្នាពន្យារពេលប្រកួតកីឡាអូឡាំពិកដែលគ្រោងធ្វើនៅខែកក្កដាខាងមុខ រហូតដល់ឆ្នាំក្រោយដើម្បីរក្សាសុវត្ថិភាព និងសុខភាពរបស់អត្តពលិក។
ដោយឡែក ការប្រកួតកីឡាប៉ារ៉ាឡាំពិកដែលគ្រោងនឹងចាប់ផ្តើមនៅថ្ងៃទី២៤ ខែសីហា ឆ្នាំ ២០២០ នឹងត្រូវប្តូរទៅធ្វើនៅចន្លោះថ្ងៃទី២៤ ខែសីហា ដល់ថ្ងៃទី៥ ខែកញ្ញាឆ្នាំ ២០២១ វិញផងដែរ។
គិតត្រឹមថ្ងៃទី៣១ ខែមីនា នេះ មានករណីស្លាប់ដោយសារ COVID-19 មានចំនួនជាង៣៧០០០នាក់ អ្នកឆ្លងជាង៧៨ម៉ឺននាក់ និងអ្នកជាសះស្បើយមានជាង១៦ម៉ឺនករណី៕
© រក្សាសិទ្ធិដោយ thmeythmey.com