COVID-19
កីឡាជាតិ
ជាតិ
ទោះសហព័ន្ធអនុញ្ញាតឲ្យបើកសង្វៀនវិញ តែ PNN បន្តផ្អាករហូតដំណាច់ខែមេសា
×![]()
សហព័ន្ធកីឡាប្រដាល់គុនខ្មែរនៅថ្ងៃទី៧ មេសា ឆ្នាំ២០២០ បានអនុញ្ញាតឲ្យស្ថានីយទូរទស្សន៍ទាំងអស់ បើកដំណើរការសង្វៀនប្រដាល់ឡើងវិញ តាមអនុសាសន៍របស់សម្តេចនាយករដ្ឋមន្ត្រី ហ៊ុន សែន។ ខុសពីស្ថានីយទូរទស្សន៍ដទៃ ដែលត្រៀមប្រកួតនៅសប្តាហ៍នេះ ទូរទស្សន៍ PNN បានប្រកាន់ជំហរដោយបន្តផ្អាកសង្វៀនប្រដាល់រហូតដំណាច់ខែមេសា។ 
លោក ស្រ៊ឺ ស្រេង ហៅសំណព្វ ប្រធានផ្នែកព័ត៌មានកីឡានៃស្ថានីយទូរទស្សន៍ PNN បានបញ្ជាក់ថា សង្វៀនប្រដាល់របស់ភីអិនអិនមិនទាន់បើកដំណើរនោះទេ ទោះបីសហព័ន្ធកីឡាប្រដាល់គុនខ្មែរបើកភ្លើងបៃតងឲ្យរៀបចំឡើងវិញក៏ដោយ។ ការផ្អាកនេះ នឹងបន្តរហូតដល់ដំណាច់ខែមេសា ឆ្នាំ២០២០ ទើបបើកដំណើរការឡើងវិញ។ នេះបើតាមការលើកឡើងរបស់លោក សំណព្វ។
ការប្រកាន់ជំហរបែបនេះ ធ្វើឡើងក្រោយសហព័ន្ធកីឡាប្រដាល់គុនខ្មែរ បដិសេធសំណើរសុំបើកសង្វៀនប្រដាល់ឡើងវិញរបស់ស្ថានីយ៍ទូរទស្សន៍ PNN និងទូរទស្សន៍៤ផ្សេងទៀត កាលពីថ្ងៃទី៤ ខែមេសា ឆ្នាំ២០២០។ ភ្លាមៗនោះ លោក ស្រ៊ឺ ស្រេង បានប្រកាសពីជំហររបស់ខ្លួនថា សង្វៀនប្រដាល់របស់ស្ថានីយទូរទស្សន៍ភីអិនអិននឹងផ្អាកពេញ១ខែមេសា ទោះបីសហព័ន្ធអនុញ្ញាតឲ្យបើកវិញក៏ដោយ។
ប្រធានផ្នែកព័ត៌មានកីឡារូបនេះបានអះអាងថា ការរក្សាជំហរបន្តផ្អាកនេះមិនមែនជាការតបត ឬអន់ចិត្តជាមួយសហព័ន្ធនោះទេ។ ក្នុងបទសម្ភាសជាមួយសារព័ត៌មានថ្មីៗតាមទូរសព្ទលោក ស្រ៊ឺ ស្រេង បានបញ្ជាក់យ៉ាងដូច្នេះថា៖«និយាយរួមទៅម្តងជាពីរដង យើងបានសម្រួលជាមួយ Sponsor មុនដំបូងយើងមិនថា បើកឡើងវិញ តែក្រោយមកយើងក៏ថាបិទវិញ។ អ៊ីចឹងទៅ យើងក៏បានជជែកជាមួយ Sponsor និងថ្នាក់ដឹកនាំរបស់យើងដោយសម្រេចថា ដើម្បីជៀងវាងបើកបិទៗយើងសម្រេចផ្អាកពេញ១ខែមេសា ចាំដល់ដើមខែឧសភា ចាំបើកវិញ»។
លោក សំណព្វ បានបង្ហាញការសោកស្តាយចំពោះការសម្រេចរបស់ខ្លួន ព្រោះ លោក មិននឹកស្មានថា សហព័ន្ធអនុញ្ញាតឲ្យបើកសង្វៀនប្រដាល់ឡើងវិញលឿនបែបនេះឡើយ។ «យើងមិននឹកស្មានថា ចេញលទ្ធផល(អនុញ្ញាតឲ្យបើកសង្វៀនប្រដាល់)លឿនយ៉ាងនេះសោះ ព្រោះយើងគិតថា ប្រហែលជាអាចសម្រាកមួយរយៈរហូតដល់ស្ថានការណ៍នៃការរីករាលដាលនៃកូវីដ-១៩មានភាពធូរស្រាល»។ នេះជាការលើកឡើងរបស់លោក សំណព្វ។
លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរនៅថ្ងៃទី៧ ខែមេសា ឆ្នាំ២០២០ បានសម្រេចឲ្យស្ថានីយទូរទស្សន៍ទាំងអស់បើកដំណើរការសង្វៀនប្រដាល់របស់ខ្លួនឡើងវិញ ក្រោយផ្អាកអស់រយៈពេលប្រមាណជាង១សប្តាហ៍ ដោយសារបារម្ភពីការរីករាលដាលនៃជំងឺរលាកសួតបង្កឡើងដោយមេរោគកូរ៉ូណាប្រភេទថ្មី។ ការសម្រេចភ្លាមៗរបស់លោក តែម ម៉ឺន ធ្វើឡើងក្រោយអនុសាសន៍របស់សម្តេច ហ៊ុន សែន ដែលអនុញ្ញាតឲ្យស្ថានីយទូរទស្សន៍រៀបចំប្រដាល់ដោយបិទទ្វារវ៉ៃ ហើយផ្សាយផ្ទាល់តាមទូរទស្សន៍ ឬទំព័រហ្វេសប៊ុក។
គួររំលឹកថា កាលពីថ្ងៃទី២០ ខែមីនា ឆ្នាំ២០២០ លោក តែម ម៉ឺន បានបញ្ជាឲ្យស្ថានីយទូរទស្សន៍ទាំងអស់ផ្អាកដំណើររៀបចំការប្រកួតប្រដាល់ ដើម្បីបង្ការនិងទប់ស្កាត់ការរីករាលដាលនៃជំងឺរលាកសួតបង្កឡើងដោយកូរ៉ូណាវីរុសប្រភេទថ្មី។ ក្រោយផ្អាកបានប្រមាណពីរសប្តាហ៍ ពោលគឺនៅថ្ងៃទី៤ មេសា ស្ថានីយទូរទស្សន៍ចំនួន៥រួមមាន Bayon, PNN, SEA TV, CNC និង Town បានដាក់សំណើរទៅសហព័ន្ធ ដើម្បីសុំបើកដំណើរការឡើងវិញ តែត្រូវបានសហព័ន្ធបដិសេធ៕
Tag:
ប្រដាល់គុនខ្មែរ
PNN
ស្រ៊ឺ ស្រេង
© រក្សាសិទ្ធិដោយ thmeythmey.com
