COVID-19
កីឡាអន្តរជាតិ
អន្តរជាតិ
កីឡាករនៅ Premier League បង្កើតមូលនិធិជួយផ្នែកសុខាភិបាលប្រឆាំង COVID-19
× កីឡាករនៃក្របខណ្ឌ Premier League ចាប់ផ្តើមគំនិតផ្តួចផ្តើមមួយដើម្បីប្រមូលគ្នាបង្កើតមូលនិធិជួយដល់សេវាសុខាភិបាលជាតិអង់គ្លេស (NHS) និងចែកចាយទៅកាន់តំបន់ដែលមានតម្រូវការខ្លាំងបំផុតដែលបណ្តាលមកពី COVID-19។
គំនិតផ្តួចផ្តើមដែលមានឈ្មោះថា #PlayersTogether បានបង្កើតឡើងដើម្បីជួយដល់អ្នកប្រយុទ្ធជួរមុខរបស់ NHS ក្នុងការប្រឆាំងនឹងការរីករាលដាលនៃជំងឺឆ្លង COVID-19។ ការរួមបញ្ចូលគ្នារវាងមូលនិធិកីឡាករជាមួយ NHS ត្រូវបានបង្កើតជាឈ្មោះថ្មីមួយទៀតថា NHS Charities Together (NHSCT)។
លោក Matt Hancock រដ្ឋមន្ត្រីក្រសួងសុខាភិបាលអង់គ្លេស បានស្វាគមន៍យ៉ាងកក់ក្តៅចំពោះការជ្រោមជ្រែងពីសំណាក់កីឡាករដ៏ធំធេងនេះ។ លោក Hancock ធ្លាប់បានលើកឡើងថា កីឡាករដែលប្រកបអាជីពនៅលីគកំពូលអង់គ្លេសគួរតែ កាត់ប្រាក់ខែមួយចំនួនអំឡុងពេលមានវិបត្តិនេះ។
លោក Gary Lineker អតីតប្រធានក្រុមកីឡាបាល់ទាត់ជម្រើសជាតិអង់គ្លេស ក៏សារទរ និងបង្ហាញមោទកភាពចំពោះកីឡាករទាំងអស់ដែលមានចិត្តចេះជួយគ្នាគ្រាលំបាក។
លោក Lineker បានសរសេរលើបណ្តាញសង្គម Twitter ថា៖« កីឡាករបាល់ទាត់កំពុងបំពេញការងាររបស់ពួកគេដូចដែលខ្ញុំបានជឿជាក់ថាពួកគេនឹងធ្វើបាន។ ខ្ញុំសង្ឃឹមថានឹងមានអ្នកផ្សេងទៀតដែលនឹងធ្វើបែបនេះ»។
គិតមកទល់ថ្ងៃទី៨ ខែមេសានេះ ពលរដ្ឋចក្រភពអង់គ្លេសជាង ៧០០០ នាក់បានស្លាប់ដោយជំងឺរលាកសួតបង្កដោយកូរ៉ូណាប្រភេទថ្មី (COVID-19) ខណៈអ្នកឆ្លងកើនដល់ជាង៦ម៉ឺននាក់៕
Tag:
Premier League
COVID-19
© រក្សាសិទ្ធិដោយ thmeythmey.com