COVID-19
អន្តរជាតិ
រដ្ឋាភិបាលថៃ នឹងផ្តល់សំណងដល់បុគ្គលិកសណ្ឋាគារនិងផ្ទះសំណាក់ដែលប៉ះពាល់ដោយសារ COVID-19 លោក Pipat Ratchakitprakarn រដ្ឋមន្រ្តីទេសចរណ៍ និងកីឡាថៃ។ រូបភាព៖ the Nation
× គណៈរដ្ឋមន្ត្រីថៃ នាថ្ងៃទី៨ ខែមេសា បានយល់ព្រមផ្តល់ប្រាក់សំណងដល់បុគ្គលិកសណ្ឋាគារ និងផ្ទះសំណាក់ ដែលកំពុងទទួលរងផលប៉ះពាល់ពីជំងឺរលាកសួត ដែលបង្កដោយកូរ៉ូណាវីរុស (COVID-19) ។
ចាប់តាំងពីផ្ទុះកូរ៉ូណាវីរុសមក ថៃបានទទួលរងគ្រោះការខូតខាត និងរងផលប៉ះពាល់សេដ្ឋកិច្ចរាប់ពាន់លានដុល្លារ ជាពិសេសវិស័យទេសចរណ៍។ ប្រជាជនមួយចំនួន បានបាត់បង់ការងារធ្វើ ចំណែកវិស័យផ្ទះសំណាក់ និងសណ្ឋាគារក៏បាត់បង់ចំណូល ដែលបង្កប៉ះពាល់ដល់បុគ្គលិកជាច្រើនពាន់នាក់។ បន្ថែមពីលើនេះ ថៃក៏បានផ្អាកផ្តល់ទិដ្ឋាការដល់ជនបរទេស និងហាមមិនឲ្យជនបរទេសចូលប្រទេសផងដែរ។
ពាក់ព័ន្ធនឹងបញ្ហានេះ លោក Pipat Ratchakitprakarn រដ្ឋមន្ត្រីទេសចរណ៍ និងកីឡា បានលើកឡើងថា គណៈរដ្ឋមន្ត្រីថៃ បានសម្រេចផ្តល់សំណងដល់បុគ្គលិកសណ្ឋាគារ និងផ្ទះសំណាក់ទាំងឡាយណា ដែលកំពុងស្ថិតក្នុងវិធានរឹតត្បិតការធ្វើដំណើរ និងការរឹតត្បិតផ្សេងទៀត។ បើតាមលោករដ្ឋមន្ត្រី សំណងនេះ គឺផ្អែកទៅតាមច្បាប់ស្តីពីសន្តិសុខសង្គម។ នេះបើតាមការចុះផ្សាយរបស់សារព័ត៌មាន The Nation។
តាមច្បាប់ដដែលនេះ រាល់បុគ្គល ដែលរងផលប៉ះពាល់ ដោយសារវិធានសន្តិសុខសង្គម និងបណ្តាលឲ្យបាត់បង់ការងារ ដោយសារការចាប់បង្ខំពីសំណាក់រដ្ឋាភិបាល នឹងទទួលបានបានសំណង ៦២ភាគរយនៃប្រាក់ខែសរុប រហូតដល់ជំនួញសណ្ឋាគារ និងផ្ទះសំណាក់ដំណើរការឡើងវិញ។ យ៉ាងណាក៏ដោយ លោក Pipat បានបញ្ជាក់ថា បុគ្គលិក ដែលរងផងប៉ះពាល់ នឹងទទួលបានប្រាក់ជំនួយនេះ ត្រឹមតែរយៈពេល ៩០ថ្ងៃតែប៉ុណ្ណោះ។
បន្ថែមពីផ្តល់ប្រាក់ជំនួយដល់បុគ្គលិកសណ្ឋាគារ លោករដ្ឋមន្ត្រីទេសចរណ៍ និងកីឡា ក៏ត្រៀមដាក់សំណើស្តីពីសំណងដល់មគ្គទេសក៍ទេសចរណ៍ និងបុគ្គលិកផ្សេងទៀត ដែលពាក់ព័ន្ធនឹងវិស័យទេសចរណ៍ផងដែរ។
សូមបញ្ជាក់ថា គិតមកទល់ពេលនេះ ថៃមាន COVID-19 សរុបចំនួន ២៤២៣ករណី អ្នកស្លាប់ ៣២ករណី និងអ្នកជាសះស្បើយ ៩៤០ករណី៕
© រក្សាសិទ្ធិដោយ thmeythmey.com