COVID-19
ជាតិ
COVID-19៖អាណាព្យាបាលយកចិត្តទុកដាក់ការពារខ្លួន និងកូន ពេលទៅមន្ទីរពេទ្យគន្ធបុប្ផា
× ភ្នំពេញ៖ ជាទូទៅរៀងរាល់ព្រឹកព្រលឹម គេតែងឃើញម្ដាយជាច្រើនឈរពរកូនតូចៗតម្រង់ជួររង់ចាំចូលពិនិត្យ និងព្យាបាលជំងឺ នៅមន្ទីរពេទ្យគន្ធបុប្ផា ក្បែរវត្តភ្នំ។ ប៉ុន្តែតាំងពីជំងឺកូវីដ-១៩ ត្រូវបានរកឃើញចំនួនអ្នកដែលមកពិនិត្យ ព្យាបាលជំងឺក៏ថមថយចុះដែរ។ ទោះជាយ៉ាងនេះក្តី អាណាព្យាបាលទាំងនោះ បានយកចិត្តទុកដាក់ខ្ពស់ក្នុងការការពារខ្លួន និងកូន នៅពេលយកទៅពិនិត្យ និងព្យាបាលជំងឺនៅមន្ទីរពេទ្យគន្ធបុប្ផា។ ពួកគាត់ភាគច្រើន បានអនុវត្តវិធានអនាម័យ និងការការពារផ្សេងៗ ដូចជាការពាក់ម៉ាស់ និងប្រើអាល់កុល ឬជែលលាងសម្អាតដៃជាដើម។
សូមទស្សនាវីដេអូខាងក្រោមនេះ៖
បើទោះបីកម្ពុជាកំពុងប្រយុទ្ធប្រឆាំងនឹងការរាលដាលជំងឺឆ្លងកូវីដ-១៩ ក៏ដោយ មន្ទីរពេទ្យគន្ធបុប្ផា នៅតែបន្តផ្តល់ការព្យាបាលឥតគិតថ្លៃ ដល់កុមារកម្ពុជារាប់ពាន់នាក់ក្នុងមួយថ្ងៃៗ។ ជាក់ស្តែង នៅរយៈពេលចុងក្រោយនេះ គេសម្គាល់ឃើញថា មានការថមថយចុះគួរឲ្យកត់សម្គាល់ ចំនួនអ្នកម្តាយដែលបានយកកូនៗមកពិនិត្យព្យាបាលជំងឺនៅទីនេះ។
លោក គី សាន់ទី នាយកមន្ទីរពេទ្យគន្ធបុប្ផាភ្នំពេញបានប្រាប់សារព័ត៌មានថ្មីៗតាមទូរសព្ទថា បច្ចុប្បន្នអ្នកជំងឺបានថយចុះច្រើន តាំងពីមានការឆ្លងជំងឺកូវីដ-19 នៅកម្ពុជា។ លោក គី សាន់ទី បញ្ជាក់ដូច្នេះ៖«មានការកាត់បន្ថយច្រើន ប៉ុន្តែនៅពេលដែលកូនឈឺម្ដាយនឹងយកមកព្យាបាលនៅមន្ទីរពេទ្យដោយខានមិនបាន។ មន្ទីរពេទ្យយើង នៅតែទទួលព្យាបាលអ្នកជំងឺ គ្រប់ផ្នែកទាំងអស់»។
ក្នុងពេលជាមួយគ្នានេះ ដើម្បីទប់ស្កាត់ការរាលដាលនៃជំងឺកូវីដ-១៩ មន្ទីរពេទ្យក៏បានអនុវត្តវិធានការអនាម័យតាមការណែនាំរបស់ក្រសួងសុខាភិបាលដែរ ដូចជាការបាញ់ថ្នាំសម្លាប់មេរោគជាប្រចាំនៅបរិវេណមន្ទីរពេទ្យ គ្រូពេទ្យក៏ត្រូវលាងសម្អាតដៃឲ្យបានញឹកញាប់ជាមួយអាល់កុល ជែលលាងដៃ ឬសាប៊ូ មុន និងក្រោយប៉ះពាល់អ្នកជំងឺ ឬវត្ថុ រួមទាំងពាក់ម៉ាសផងដែរ។
អ្នកស្រី បាន សម្បត្តិ ដែលបានយកកូនមកព្យាបាលនៅមន្ទីរពេទ្យគន្ធបុប្ផា បានលើកឡើងថាអ្នកស្រីពិតជាបារម្ភខ្លាចឆ្លងជំងឺកូវីដ-១៩ នៅពេលចេញមកខាងក្រៅបែបនេះ ប៉ុន្តែគាត់គ្មានជម្រើសផ្សេង។ អ្នកស្រី សម្បត្តិបញ្ជាក់ដូច្នេះ៖ «ចៀសមិនផុត ព្រោះកូនឈឺត្រូវការមកពេទ្យ ហើយព្យាបាលពេទ្យខាងក្រៅ វាមិនត្រូវ ទាល់តែយកមកមន្ទីរពេទ្យគន្ធបុប្ផា ទើបព្យាបាលបាត់»។
ចំណែកអ្នកស្រី សេង វុដ្ឋា ក៏បារម្ភបញ្ហាកូវីដ-១៩ដែរ ប៉ុន្តែអ្នកស្រីត្រូវប្រថុយយកកូនមកព្យាបាល។ អ្នកស្រី សេង វុដ្ឋា រៀបរាប់ដូច្នេះ៖«បើយើងមិនមកព្យាបាល នឹងមានគ្រោះថ្នាក់។ តែបើមកក៏គ្រោះថ្នាក់ ចឹងយើងក៏ត្រូវតែប្រថុយមក ប៉ុន្តែក៏ត្រូវចេះការពារខ្លួន។ សម្រាប់ខ្ញុំ ពេលមកបែបនេះ ខ្ញុំតែងឲ្យកូន និងចៅរបស់ខ្ញុំ ត្រូវរក្សាអនាម័យដូចជា ពាក់ម៉ាស ហើយខ្ញុំតែងមានទឹកអាល់កុលមកជាមួយជាប់ជានិច្ច»។
សម្រាប់អ្នកស្រី ស៊ឹម លីណាវិញភ័យខ្លាចឆ្លងជំងឺកូវីដ-១៩គឺជារឿងមួយ ប៉ុន្តែសុខភាពកូនសំខាន់ជាង។ អ្នកស្រី លីណា លើកឡើងថា«ខ្ញុំខ្លាចជំងឺកូវីដ ហើយយកកូនមកព្យាបាលនេះ ក៏ចង់ឲ្យជាសះស្បើយពីជំងឺ។ ប៉ុន្តែខ្ញុំក៏បាន រក្សាអនាម័យផងដែរ»៕
© រក្សាសិទ្ធិដោយ thmeythmey.com