សម្តេច ស ខេង ប្រាប់អភិបាលរាជធានី-ខេត្ត អនុវត្តឲ្យម៉ឺងម៉ាត់លើបទបញ្ជារឹតបន្តឹងការធ្វើដំណើរ

COVID-19

ជាតិ

សង្គមជាតិ

សម្តេច ស ខេង ប្រាប់អភិបាលរាជធានី-ខេត្ត អនុវត្តឲ្យម៉ឺងម៉ាត់លើបទបញ្ជារឹតបន្តឹងការធ្វើដំណើរ

10, Apr 2020 , 10:19 pm

រូបភាព

ដោយ: ថ្មីៗ

សម្តេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ណែនាំទៅអភិបាលរាជធានី-ខេត្តឲ្យអនុវត្តឲ្យបានម៉ឺងម៉ាត់ ចំពោះបទបញ្ជារបស់រាជរដ្ឋាភិបាលស្តីការការដាក់កំហិតលើការធ្វើដំណើរក្នុងប្រទស។ សម្តេច ក៏បានជំរុញអាជ្ញាធរ ឲ្យជួយសម្របសម្រួលការធ្វើចរាចរណ៍ ការពារសន្តិសុខ សុវត្ថិភាព និង បញ្ចៀសរាល់ហិង្សាផ្សេងៗ។

ដើម្បីបង្ការនិងទប់ស្កាត់ការរីករាលដាលនៃជំងឺកូវីដ-១៩ សម្តេច ស ខេង រដ្ឋមន្ត្រីក្រសួងមហាផ្ទៃនៅថ្ងៃទី១០ ខែមេសានេះ បានចេញសេចក្តីណែនាំមួយ ដោយប្រាប់ទៅអភិបាលរាជធានី-ខេត្តទាំងអស់ ឲ្យបង្កើនការយកចិត្តទុកដាក់ក្នុងការរៀបចំគោលដៅត្រួតពិនិត្យ និងហាមឃាត់ការធ្វើដំណើរឆ្លងកាត់របស់ប្រជាពលរដ្ឋពីខេត្តមួយទៅខេត្តឲ្យមានប្រសិទ្ធភាព។

ការដាក់ចេញបទបញ្ជារបស់សម្តេច ស ខេង ធ្វើឡើងស្របពេលកម្ពុជាកំពុងអនុវត្តវិធានការដាក់កំហិតការធ្វើដំណើរក្នុងប្រទេស ដែលជាបទបញ្ជារបស់សម្តេចនាយករដ្ឋមន្ត្រី ហ៊ុន សែន។ រដ្ឋមន្ត្រីក្រសួងមហាផ្ទៃ ថែមទាំងជំរុញឲ្យអាជ្ញាធររាជធានី-ខេត្ត បង្កើនការយកចិត្តទុកដាក់ក្នុងការរក្សាការពារសន្តិសុខ សុវត្ថិភាព និង សណ្តាប់ធ្នាប់ក្នុងដែនសមត្ថកិច្ចរបស់ខ្លួន ជាពិសេសត្រូវជួយសម្របសម្រួល ដោះស្រាយ និង បញ្ចៀសរាល់អំពើហិង្សាគ្រប់រូបភាព។

ទន្ទឹមនឹងនេះ សម្តេចរដ្ឋមន្ត្រី បានដាស់តឿនឲ្យរដ្ឋបាលខេត្តជាប់ព្រំដែនថៃ រួមមានបាត់ដំបង បន្ទាយមានជ័យ និង ឧត្តរមានជ័យ ត្រូវបន្តជួយសម្របសម្រួលជាមួយភាគីថៃ ក្នុងករណីមានពលរដ្ឋខ្មែរចង់ឆ្លងដែនពីថៃចូលមកកម្ពុជា។

សម្តេចនាយករដ្ឋមន្ត្រី ហ៊ុន សែន នៅយប់ថ្ងៃទី៩ ខែមេសា ឆ្នាំ២០២០ បានចេញបទបញ្ជាបន្ទាន់មួយ ដោយសម្រេចដាក់កំហិតការធ្វើដំណើរក្នុងផ្ទៃប្រទេសចាប់ពីថ្ងៃទី១០ ដល់ថ្ងៃទី១៦ ខែមេសា ឆ្នាំ២០២០។ ក្នុងនោះ ប្រមុខរដ្ឋាភិបាល ហាមមិនឲ្យមានការធ្វើដំណើរឆ្លងកាត់ពីរាជធានីភ្នំពេញ ចូលទៅខេត្ត ពីខេត្ត ចូលមករាជធានីភ្នំពេញ ពីខេត្តមួយ ទៅខេត្តមួយ ពីស្រុកមួយ ទៅស្រុកមួយ ដោយលើកលែងការដឹកជញ្ជូនទំនិញ រដ្ឋយន្តរបស់មន្ត្រីរាជការ រថយន្តរបស់កងកម្លាំងប្រដាប់អាវុធ ឡានពេទ្យរដ្ឋនិងឯកជន រថយន្តពន្លត់អគ្គិភ័យ ឡានដឹកសំរាម រថយន្តដឹកកម្មករទៅធ្វើការងារតាមរោងចក្រ-សហគ្រាស និង ការធ្វើដំណើររបស់ពលរដ្ឋទៅកាន់មន្ទីរពេទ្យ ឬមណ្ឌលសុខភាព។

វិធានការដាក់កំហិតការធ្វើដំណើរនេះ មិនទាន់ត្រូវបានអនុវត្តពេញ១ថ្ងៃផង ប្រមុខរាជរដ្ឋាភិបាលកម្ពុជា នៅថ្ងៃទី១០ ខែមេសានេះ បានចេញបទបញ្ជាថ្មី ដោយសម្រេចឲ្យប្រជាពលរដ្ឋ អាចធ្វើដំណើរទៅមករវាងរាជធានីភ្នំពេញនិងខេត្តកណ្តាល និងអាចធ្វើដំណើរពីស្រុកមួយទៅស្រុកមួយ។ តែការធ្វើដំណើរចេញខេត្តដទៃ ចូលមករាជធានីភ្នំពេញ ឬចេញពីរាជធានីភ្នំពេញ ចូលទៅខេត្តដទៃ នៅតែហាមឃាត់ ហើយការធ្វើដំណើរពីខេត្តមួយ ទៅខេត្តមួយទៀត ក៏នៅតែហាមឃាត់ដែរ។ បទបញ្ជានេះ ត្រូវអនុវត្តរហូតដល់ថ្ងៃទី១៦ ខែមេសា ឆ្នាំ២០២០៕