COVID-19
អន្តរជាតិ
ម៉ាឡេស៊ី ពន្យារពេលរឹតត្បិតការដើរហើរ១៤ថ្ងៃបន្ថែម រហូតដល់ចុងខែមេសា នាយករដ្ឋមន្ត្រីម៉ាឡេស៊ី Muhyiddin Yassin ថ្លែងលើកញ្ចក់ទូរទស្សន៍ផ្សាយផ្ទាល់ (Malay mail)
× រដ្ឋាភិបាលម៉ាឡេស៊ី បានសម្រេចប្រកាសលើកពេលបទបញ្ជាគ្រប់គ្រងការចល័ត (MCO) រយៈពេល២សប្តាហ៍បន្ថែម ពោលគឺនឹងអនុវត្តរហូតដល់ថ្ងៃទី ២៨ ខែមេសា។ ប្រមុខរដ្ឋាភិបាលម៉ាឡេស៊ី ក៏បានបង្ហាញក្តីសង្ឃឹមថាអាចទប់ស្កាត់ COVID-19 ផងដែរ។
ថ្លែងតាមកញ្ចក់ទូរទស្សន៍ដែលផ្សាយផ្ទាល់នៅថ្ងៃទី១០ ខែមេសា នាយករដ្ឋមន្ត្រីម៉ាឡេស៊ី Muhyiddin Yassin លើកឡើងថា បទបញ្ជារឹតត្បិតការដើរហើរនេះ បានជួយកាត់បន្ថយការរីករាលដាល COVID-19 ហើយកំណើនករណីឆ្លង ត្រូវបានកម្រិតត្រឹម៧ភាគរយ ពោលគឺទាបជាង១០ភាគរយកំណត់ដោយអង្គការសុខភាពពិភពលោក (WHO)។
«ចំនួនករណីវិជ្ជមានប្រចាំថ្ងៃ ក៏បានធ្លាក់ចុះ។ ប្រសិនបើនិន្នាការនេះ បន្តទៅមុខសម្រាប់២សប្តាហ៍ទៀតនោះ យើងអាចបង្ការការរីករាលដាលនៃ COVID-19។ ក៏ប៉ុន្តែយើងពុំអាចមើលស្រាលស្ថានការណ៍នេះឡើយ»។ លោកនាយករដ្ឋមន្ត្រី Muhyiddin បញ្ជាក់បែបនេះ ដែលដកស្រង់ចុះផ្សាយដោយទូរទស្សន៍សិង្ហបុរី Channel NewsAsia ។
តាមពិតទៅ ដំណាក់កាលទី១នៃបទបញ្ជាគ្រប់គ្រងការចល័ត (MCO) ដែលបានអនុវត្តដើម្បីបំបែកសង្វាក់នៃការឆ្លង COVID-19 ត្រូវបានកំណត់បញ្ចប់កាលពីថ្ងៃ៣១ ខែមីនា។ ក៏ប៉ុន្តែក្រោយមក វាបានលើករហូតដល់ថ្ងៃទី១៤ ខែមេសា។
ក្រោមបទបញ្ជានេះ សាលារៀន និងអាជីវកម្មដែលពុំចាំបាច់ ត្រូវបិទទ្វារ។ ប្រជាជនត្រូវលើកទឹកចិត្តឲ្យស្នាក់នៅផ្ទះ ដើម្បីកាត់បន្ថយការប្រាស្រ័យទាក់ទងផ្ទាល់ ខណៈអាជ្ញាធរសុខាភិបាលប្រឹងញាប់ដៃញាប់ជើងទប់ស្កាត់ការរីកសាយភាយនៃ COVID-19 ។
គិតត្រឹមថ្ងៃសុក្រ ១០ខែមេសា ប្រទេសម៉ាឡេស៊ី មានករណីឆ្លង COVID-19 សរុបចំនួន៤២២៨ករណីហើយ ក្នុងនោះជាសះស្បើយ១៦០៨នាក់ ខណៈអ្នកស្លាប់មាន៦៧នាក់។ នេះបើតាមវេបសាយ worldometers.info ដែលតាមដាន COVID-19 នៅទូទាំងពិភពលោក៕
© រក្សាសិទ្ធិដោយ thmeythmey.com