កីឡាអន្តរជាតិ
អន្តរជាតិ
Southampton ជាក្លិបដំបូងគេនៅ EPL ដែលពន្យារបើកប្រាក់ឈ្នួលកីឡាករ ដោយសារ COVID-19
× Southampton បានក្លាយជាក្លិបដំបូងគេនៅ Premier League ដែលប្រកាសពន្យារពេលបើកប្រាក់ឈ្នួលមួយផ្នែកដល់កីឡាកររបស់ពួកគេ ចំពេលវិបត្តិជំងឺរាតត្បាត COVID-19។ សម្រាប់បុគ្គលិក ក្លិបរហស្សនាម The Saints នៅតែផ្តល់ប្រាក់ខែពេញ ១០០ភាគរយ។
លោក Ralph Hasenhuttl ដែលជាអ្នកចាត់ការទូទៅ និងបុគ្គលិកក៏ដូចជាក្រុមប្រឹក្សាភិបាល ក៏នឹងត្រូវអនុវត្តវិធានការណ៍ពន្យារពេលបើកប្រាក់ខែនេះដែរ ពោលគឺរហូតដល់ខែមិថុនា។
កន្លងមក មានក្លិបនៅក្របខណ្ឌលីគកំពូលអង់គ្លេសមួយចំនួនបានស្នើឲ្យកីឡាកររបស់ពួកគេកាត់បន្ថយប្រាក់ឈ្នួលចំនួន ៣០ ភាគរយដើម្បីការពារអនាគតក្លិប និងធានាបើកប្រាក់ខែដល់បុគ្គលិកឲ្យបានពេញលេញ។
យ៉ាណាក៏ដោយ ការស្នើបែបនេះត្រូវបានសហព័ន្ធកីឡាករបាល់ទាត់អាជីព (PFA) អះអាងថា នឹងប៉ះពាល់ដល់ការបង់ពន្ធចូលរដ្ឋ ដែលត្រូវផ្តល់បន្តទៅឲ្យសេវាសុខាភិបាលជាតិអង់គ្លេស (NHS) ដើម្បីប្រឆាំង COVID-19 នៅចក្រភពអង់គ្លេស។
ជុំវិញការពន្យារពេលនេះ Southampton បានធានាថា ក្លិបនឹងមិនប្រើគោលការណ៍កាត់ប្រាក់ឈ្នួលតាមរដ្ឋាភិបាលអង់គ្លេសក្នុងអំឡុងខែមេសា ឧសភា និងមិថុនាឡើយ ហើយបុគ្គលិកទាំងអស់ដែលមិនត្រូវឲ្យពន្យារពេលបើកប្រាក់ឈ្នួលនោះ នៅតែទទួលបានប្រាក់ខែ១០០ភាគរយដដែល។
Newcastle United, Tottenham Hotspur, Bournemouth និង Norwich City បានប្រកាសរួចហើយថា ពួកគេនឹងបញ្ឈប់បុគ្គលិកបណ្តោះអាសន្ន ខណៈគ្មានការប្រកួតដោយសារវិបត្តិ COVID-19។ Liverpool ដំបូងឡើយក៏សម្រេចធ្វើដូចគ្នានេះដែរ ប៉ុន្តែក្រោយមកក៏ផ្លាស់ប្តូរគំនិតនេះវិញ។
មួយវិញទៀត កីឡាករនៅក្របខណ្ឌ Premier League បានចាប់ផ្តើមគំនិតផ្តួចផ្តើម #PlayersTogether ដើម្បីបង្កើតមូលនិធីដើម្បីចែកចាយថវិកាដល់ NHS ផងដែរ៕
Tag:
Southampton
Premier League
COVID-19
© រក្សាសិទ្ធិដោយ thmeythmey.com