COVID-19
អន្តរជាតិ
កូរ៉េខាងជើង បើកកិច្ចប្រជុំសភាជាន់ខ្ពស់ ឯករណីឆ្លង COVID-19 នៅតែគ្មានដដែល
រូបភាព៖ KCNA
×![]()
ដោយ: ធៀន ភារិន្ទ
សភាប្រជាជនជាន់ខ្ពស់កូរ៉េខាងជើង នាថ្ងៃទី១២ ខែមេសា បានបើកកិច្ចប្រជុំមួយ ជុំវិញការអនុម័តថវិកាជាតិ និងការផ្លាស់ប្តូរមុខតំណែងមន្ត្រីជាន់ខ្ពស់កូរ៉េខាងជើង។ កិច្ចប្រជុំនេះ ធ្វើឡើងតែមួយថ្ងៃប៉ុណ្ណោះក្រោយកិច្ចប្រជុំការិយាល័យនយោបាយនៃគណៈមជ្ឈិមបក្សពលករកូរ៉េខាងជើង។ 
ថ្ងៃទី១០ ខែមេសា គឺជាថ្ងៃកំណត់នៃការបើកកិច្ចប្រជុំកិច្ចប្រជុំសភាជាន់ខ្ពស់កូរ៉េខាងជើង ប៉ុន្តែវា ត្រូវបានគេពន្យារពេលយកមកប្រជុំនៅថ្ងៃទី១២ ខែមេសាវិញ ដោយមិនមានមូលហេតុ។ កិច្ចប្រជុំនេះ ធ្វើឡើងបន្ទាប់ពីកិច្ចប្រជុំការិយាល័យនយោបាយនៃគណៈមជ្ឈិមបក្សពលករកូរ៉េខាងជើង ដោយមានអធិបតីលោក គីម ជុងអ៊ុន មេដឹកនាំកូរ៉េខាងជើង និងពិភាក្សាពីបញ្ហាជុំវិញ COVID-19។
ក្នុងកិច្ចប្រជុំនេះ សភាប្រជាជនជាន់ខ្ពស់កូរ៉េខាងជើង បានអនុម័តកញ្ចប់ហិរញ្ញវត្ថុរបស់រដ្ឋ និងបន្ថែមមុខងារថ្មីដល់មន្ត្រីជាន់ខ្ពស់កូរ៉េខាងជើង។ ចំណែកកិច្ចការផ្សេងទៀតដូចជា ទំនាក់ទំនងជាមួយអាមេរិក គឺសភាមិនបានលើកយកមកនិយាយទេ។ នេះបើតាមការចុះផ្សាយរបស់ទីភ្នាក់ងារព័ត៌មានរដ្ឋកូរ៉េខាងជើង KCNA ។
សម្រាប់ថវិកាជាតិឆ្នាំនេះ កូរ៉េខាងជើងនឹងចំណាយបន្ថែមលើគម្រោងសាងសង់ទាក់ទងនឹងសេដ្ឋកិច្ចចំនួន ៦,២ភាគរយ។ សម្រាប់វិស័យសំណង់នេះ កូរ៉េខាងជើង នឹងចំណាយរហូតដល់ ៤៧,៨ភាគរយ លើការចំណាយសរុប។ ចំណែកវិស័យសុខភាពសាធារណៈវិញ កូរ៉េខាងជើងបានបន្ថែមថវិកាប្រមាណជា ៧,៤ភាគរយ ខណៈពេលពិភពលោកកំពុងប្រយុទ្ធប្រឆាំងនឹងកូរ៉ូណាវីរុស។ បើតាមគម្រោង កូរ៉េខាងជើង នឹងយកទៅសាងសង់មន្ទីរពេទ្យ និងដំឡើងប្រព័ន្ធអុកស៊ីសែនជាដើម។ ចំណែកថវិកាការពារជាតិ គឺកើនឡើងបន្តិចបើធៀប នឹងឆ្នាំមុន ពោលគឺឡើងពី១៥,៨ ភាគរយ មក១៥,៩ភាគរយ។ ការចំណាយលើវិស័យផ្សេងទៀត ក៏ត្រូវបានកូរ៉េខាងជើងដំឡើងផងដែរ។
បន្ថែមពីលើនេះ សភាប្រជាជនជាន់ខ្ពស់កូរ៉េខាងជើង បានបោះឆ្នោតជ្រើសតាំង លោក Ri Son Gwon រដ្ឋមន្ត្រីការបរទេសកូរ៉េខាងជើងជាសមាជិកគណៈកម្មការកិច្ចការរដ្ឋ។ ក្រៅពីលោក Ri សភាកូរ៉េខាងជើងមួយនេះ បានបោះឆ្នោតជ្រើសតាំងមន្ត្រីជាន់ខ្ពស់កូរ៉េខាងជើងផ្សេងទៀត ជាសមាជិកគណៈកម្មការកិច្ចការរដ្ឋដែរ។
ក្រៅពីការអនុម័តថវិការរដ្ឋ របាយការណ៍មួយស្តីពីយុទ្ធនាការប្រឆាំង COVId-19 ត្រូវបានគេដាក់ជូនទៅក្នុងកិច្ចប្រជុំសភានេះ។
សូមបញ្ជាក់ថា កូរ៉េខាងជើង បានចាត់វិធានការការពារ និងទប់ស្កាត់ COVID-19 យ៉ាងខ្លាំង បើទោះបីជាប្រទេសមួយនេះ មិនទាន់មានរបាយការណ៍កូរ៉ូណាវីរុសនៅក្នុងប្រទេសក៏ដោយ។ នាពេលកន្លងមក កូរ៉េខាងជើង បានធ្វើតេស្តមនុស្សចំនួន ៧០០ និងដាក់ចត្តាឡីស័កមនុស្សជាង ៥០០នាក់៕
Tag:
កូរ៉េខាងជើង
COVID-19
© រក្សាសិទ្ធិដោយ thmeythmey.com
