ជាតិ
សង្គមជាតិ
ដើមឈើចំណាស់បាក់រលំ តែមិនប៉ះពាល់ដល់តួប្រាសាទតាព្រហ្ម និងអង្គរវត្តឡើយ ដើមឈើនៅប្រាសាទតាព្រហ្មបានបាក់រលំកាលពីយប់ថ្ងៃទី១២ ខែមេសា ដោយសារខ្យល់កន្រា្តក់ រូបភាពពីអាជ្ញាធរជាតិអប្សរា
× ភ្នំពេញ៖ ដោយសារតែកម្លាំងខ្យល់កន្ត្រាក់ ដើមឈើចំណាស់បានរលំ នៅបរិវេណប្រាសាទតាព្រហ្ម និងអង្គរវត្តនៅខេត្តសៀមរាប ប៉ុន្តែគ្រោះមហន្តរាយកាលពីយប់ថ្ងៃទី១២ ខែមេសា កន្លងមកនេះ មិនបានប៉ះពាល់ដល់តួប្រាសាទណាមួយឡើយ។
លោក ឡុង កុសល អ្នកនាំពាក្យអាជ្ញាធរជាតិអប្សរា បានបញ្ជាក់ប្រាប់ដល់អ្នកសារព័ត៌មានថ្មីៗតាមទូរសព្ទថា ក្រោយពីខេត្តសៀមរាបទទួលរងដោយទឹកភ្លៀង និងខ្យល់កន្ទ្រាក់កើតឡើងនាយប់ថ្ងៃទី១២ ខែមេសា បានធ្វើឲ្យដើមឈើចំនួន៤ដើម បានបាក់នៅបរិវេណប្រាសាទតាព្រហ្ម ២ដើមបាក់នៅក្នុងភូមិ និងមួយដើមទៀតបាក់ក្នុងបរិវេណប្រាសាទអង្គរវត្ត។
ដើមឈើនៅប្រាសាទតាព្រហ្មបានបាក់រលំកាលពីយប់ថ្ងៃទី១២ ខែមេសា ដោយសារខ្យល់កន្រា្តក់ រូបភាពពីអាជ្ញាធរជាតិអប្សរា
បើតាមលោក ឡុង កុសល បាតុភូតទាំងអស់នេះ មិនបានប៉ះពាល់ និងធ្វើឲ្យប្រាសាទណាមួយខូចខាតឡើយ។ លោក បានប្រាប់ដូច្នេះថា៖«វារលំក្នុងបរិវេណប្រាសាទ តែមិនបានបាក់សង្កត់លើប្រាសាទទេ។ ក្រុមការងារអ្នកជំនាញផ្នែកព្រៃឈើបានចុះទៅពិនិត្យមើល និងកំពុងតែមមាញឹកកាប់ និងដកហូតដើមឈើដែលដួលរលំ កុំឲ្យមានការខូចខាតដល់ប្រាង្គប្រាសាទ។ ដើមឈើណាដែលរលំមកទាំងគល់ហើយ គឺយើងត្រូវដកចេញហើយ តែដើមឈើណារយះ យើងនៅតែរក្សាដើមឈើនោះដើម្បីបន្តលូតលាស់ទៅមុខទៀត»។
អ្នកនាំពាក្យអាជ្ញាធរជាតិអប្សរា បានបន្តបញ្ជាក់ថា ដើមឈើលើបាក់លើប្រាសាទតាព្រហ្ម និងតាមប្រាសាទនានានោះ មិនធ្វើឲ្យបាត់សោភណភាពរបស់ប្រាសាទឡើយ៕
ដើមឈើនៅប្រាសាទតាព្រហ្មបានបាក់រលំកាលពីយប់ថ្ងៃទី១២ ខែមេសា ដោយសារខ្យល់កន្រា្តក់ រូបភាពពីអាជ្ញាធរជាតិអប្សរា Tag:
ដើមឈើ
ប្រាសាទតាព្រហ្ម
អាកាសធាតុ
© រក្សាសិទ្ធិដោយ thmeythmey.com